Isaías 53 - Biblia

¹ ¿Ime ra kía yepe wɨrowia oriñee re wae? ¿Uecha’ä yerá reta Tumpa imbaepuere?

² Echa’ä Tumpa ipɨayemɨngeta ko uecha waerä chupe uyeyokui wae ukuakuaa oï pëti ɨwɨra jäka jeñɨ oï japo wi ɨwɨ utini oï wae pe rami. Jae mbaetɨ onoi mburuwicha imbaepuere. Jae mbaetɨ ko kuimbae maepöraete wae. Yayemboya rape’ä jese, echa’ä jae mbaetɨ uyekuaa kawi yandewe ramo.

³ Jeta wae reta uñamɨtäa jare wɨrɨ̈ro kua kuimbae uiporaraete wae jare tuicha rupi ususere wae. Jae uasa yandeyɨpɨ rupi yawe, yayerowa chuwi jare yande wi yaipota’ä ñamae jese. Jeta wae reta uñamɨtäa kua kuimbae, jare jokua mbae’ä yandewe.

⁴ Jae etei yanemɨnguera yanembaerasɨ reta wi. Jare yepe tëi jupi’ä ko jae uiporara waerä mbɨatɨtɨ yande rami, jesewe jae tuicha ipɨatɨtɨ yande awei. Erëi yande yarowia tëi Tumpa ko uiporaraka chupe mbae kachi uyapo wae rami.

⁵ Erëi Tumpa kotɨ yande yayawɨ ramo, umbɨpere reta kua kuimbae yandepepɨka pe. Jae uiporara ñenupa rupi yandepuere waerä ñañemɨïru ye Tumpa ndiwe. Jare jae ipere wae rupi yande yakuera.

⁶ Yande ko jae owecha opa uñemɨái wae reta rami, echa’ä yaipota yaiko yande yae wae rupiño. Erëitu Tumpa uitɨ kua kuimbae re teko yanderé iko wae.

⁷ Yepe tëi umbɨpere reta jasɨ rupi, jesewe kua kuimbae jei’ä mbae awe. Wɨraa uyuka reta waerä jokua kuimbae kërái pëti owecha raɨ uyuka reta rami. Kërái pëti owecha umaeño iyé iñeapika wae reta pe, jukuärái rami jae omoë'ä iñee.

⁸ Jae reta uipɨsɨ jare wɨraa umbɨjeko reta waerä teko iya ikawi mbae wae echa rami. ¿Kía ra ipuere uikuaaka jae jëtara reta rewa? Mbaetɨ kiawe, echa’ä jowaicho reta uyukaka ndei jae onoi mbowe iñemoñaa retarä. Opaete jae reta ipɨte wi, mbaetɨ kiawe uikuaa jae uiporara iko jae reta ipepɨka pe wae jare umano jae reta jeko pewa.

⁹ Yepe tëi jae upurumbɨtawɨ'ä etei jare uyapo’ä etei mbae kachi wae, jesewe oñotɨ reta pëti jeko kachiete wae rami. Erëi ikokatu wae jeöwerendarä wae pe oñono reta.

¹⁰ Tumpa ipɨayemɨngeta ko uiporaraete waerä jukuärái jokua chupe uyeyokui wae mbɨatɨtɨ tuicha wae pe. Erëi jekowe umee ma yawe ɨwɨ pewa reta jeko pewa, joko wi oïta jae iñemoñaa reta ndiwe jetaete ye ara rupi. Jae rupi Tumpa ipɨayemɨngeta opata uyeyapo kawi.

¹¹ Jetaete ma uiporara yawe, uyerowia yeta, echa’ä jae uikuaata jokua jae uiporara wae rupi jeta wae reta onoita tekowe opa mbae wae Tumpa ndiwe. Tumpa jei kuärái: “Che amaeta jeta wae reta re jeko mbae wae reta rami. Echa’ä yepe tëi uyawɨ reta ma chekotɨ, jesewe jokua chewe uyeyokui wae opata umbɨepɨ teko onoi reta chekotɨ wae.

¹² Jáeramo che ameeta jokua chewe uyeyokui wae pe jendarä opaete jeräkua kawiete wae reta ipɨte wi. Jare upurumɨamɨri wae reta imbaembaerä upɨ̈ro wae ikota imaerä wi, echa’ä jae jekowe umee ramo. Jeta wae reta umae jese pëti jeko kachi wae rami. Erëi añetete jeta wae reta jeko kachi re chearasɨ aitɨ jese. Jare jae ueka chewe aepɨ waerä teko onoi wae reta.” Jukuärái jei Tumpa.