Hechos 28 - Biblia

Pablo ɨwɨ ɨ mbɨte pe oï wae Malta jee wae pe

¹ Opa rewe noë ma ndoo ikatu pe ɨwɨ utini wae pe yawe, nduikuaa jokua ɨwɨ ɨ mbɨte pe noï wae yepe jee Malta.

² Jare joko pewa reta ipɨakawi orewe. Echa’ä orembɨasa kawi jare uyatapɨ reta, echa’ä ama okɨ jare roɨ iko ramo.

³ Jare Pablo umbatɨ yepea jare oñono iko tata pe. Aramoiño pëti mboi imbayachiete wae oë yepea wi jaku chupe ramo. Jare uichuu Pablo ipo pe jare jäi upäa jese.

⁴ Jare joko pewa reta uecha yawe mboi Pablo ipo re usawawa oï wae, jei reta iyupe: “Añetete yepe kua kuimbae upuruyuka wae ko. Yepe tëi umano’ä mar pe, erëi ndarau ikoño jupi’ä ramo,” jei reta.

⁵ Erëi Pablo umɨtɨmo ipo wi mboi tata pe jare uyeyapo’ä mbae Pablo pe.

⁶ Jare joko pewa reta ipɨa pe uyemɨngeta tëi iko iruruta chupe wae jare umano woita. Erëi jae reta uäro tëi ɨma yawe, uecha uyeyapo’ä mbae chupe wae. Jayawe jae reta jei’ä ma tenonde rami. Jei reta ma: “Kua kuimbae pëti tumpa yepe,” jei reta.

⁷ Jokua ɨwɨ pewa reta itenondewa ko jae kuimbae Publio jee wae. Jae ime onoi jokoropi iɨwɨ reta. Jae orembɨasa kawi jëta pe jare ore ndupɨta mbapɨ ara jae ndiwe.

⁸ Publio tu imbaerasɨ oï jupa pe. Jaku jare jepotiuwɨ oï. Jayawe Pablo oo umae jese, jare oñono ipo jese uyerure rewe Tumpa pe, jare umɨnguera.

⁹ Jare kua jeräkua yawe, ïru imbaerasɨ wae reta jokua ɨwɨ pewa yuweru. Jare Pablo umɨnguera reta wi.

¹⁰ Jáeramo joko pewa reta orembutuichaete. Jare ndei nduyupi mbowe ambɨe chalana wasu pe ndoo ye waerä, jae reta ueru umee orewe jeta mbaembae reta mar rupi nduiporu waerä.

Pablo oo uwäe tëta wasu Roma pe

¹¹ Jare mbapɨ yasɨ ma uasa yawe, joko wi ndoo pëti chalana wasu tëta wasu Alejandría pewa pe. Jokua chalana wasu upɨta joko pe roɨ wasu iara reta uasa rewa. Chalana wasu itï re oï ɨwɨra pewa tumparaanga chowakiri jaanga Cástor jare Pólux jee wae.

¹² Jayawe ndoo nuwäe tëta wasu Siracusa pe, jare ndupɨta joko pe mbapɨ ara rupi.

¹³ Jayawe joko wi ndoo yuapɨ ye jare nuwäe tëta wasu Regio jee wae pe. Jayawe pɨarewe pe ɨwɨtu uyepeyu sur kotɨ wi, jare pɨarewe ye pe ramo ndoo nuwäe tëta wasu Puteoli jee wae pe.

¹⁴ Jare joko pe aramoiño nuñeñowäiti amokue wae Cristo re wɨrowia wae reta ndiwe. Jare jae reta uparea orewe ndupɨta waerä jae reta ndiwe chiu ara pewa. Joko wi ndoo yuapɨ ye tëta wasu Roma kotɨ.

¹⁵ Jare orereräkua Cristo re wɨrowia wae reta Roma pewa pe. Jayawe amokue jae reta yuweru orerowäiti tëta wasu raɨ Foro Apio jee wae pe. Jare ïru wae reta yuweru orerowäiti tëta wasu raɨ Mbapɨ Tabernas jee wae pe. Jare Pablo uecha reta yawe, umee yasurupái Tumpa pe jare uñemɨatangätu.

¹⁶ Jayawe ndoo nuwäe tëta wasu Roma pe yawe, sɨndaro reta itenondewa oñono’ä Pablo peresorɨru pe. Umaeño jese iko waerä pëti tëta pe jaeño pe etei. Erëi oyokui jekuaeño oï waerä pëti sɨndaro jae ndiwe uyandareko waerä jese awɨye osi waerä.

Pablo uyemɨngeta judío itenondewa reta ndiwe Roma pe

¹⁷ Joko wi mbapɨ ara ma uasa yawe, Pablo uenika judío jokoropiwa itenondewa reta. Jare yuweru uyembatɨ reta yawe, Pablo umbɨpɨ uyemɨngeta jae reta ndiwe jei rewe: “Cherëtara reta, yepe tëi ayawɨ'ä ñanerëtara reta kotɨ, jare yanderamɨkue reta jeko kotɨ, erëi jesewe Jerusalén pewa mburuwicha reta chepɨsɨ chemee romano reta pe cheyukaka reta waerä tëi,” jei chupe reta.

¹⁸ “Erëi mburuwicha romano reta uwäe’ä etei teko ikawi mbae wae cheré amano waerä. Jáeramo uipota chembopoika reta waerä tëi,” jei.

¹⁹ “Erëi judío itenondewa reta Jerusalén pewa uipota’ä chembopoika waerä, jare mburuwicha romano reta uyapɨsaka jese reta. Jáeramo che aipota a ayemboɨ waerä mburuwicha wasu kua Roma pewa jowai jae jei waerä ime ra anoi teko wae. Erëi añeapota’ä aï Jerusalén pewa itenondewa reta re jae jowai,” jei chupe reta.

²⁰ “Jayawe che puenika peyu waerä kua pe pepou waerä chepɨ jare yayemɨngeta waerä. Che aipota jae pewe wae ko kua: amokue wae reta cheñonoka kua cadena pe, echa’ä che arowia aï ou ma ko Upuruepɨ wae Tumpa jei ombouta iko yandewe wae,” jei Pablo chupe reta.

²¹ Jayawe judío itenondewa reta jei Pablo pe: “Kía nungawe ombou’ä orewe tupapire ɨwɨ Judea wi nde rewa. Jare ñanerëtáɨwa jokoropiwa reta ou opou orepɨ reta yawe, jei’ä orewe mbae ikawi mbae wae ndekotɨ,” jei reta.

²² “Erëi jeräkua orewe opaete kerupi jei reta ikawi’ä ko kua yemboe wae. Jáeramo nduipota nduyandu nduikuaa waerä ndeporomboe wae rewa,” jei reta chupe.

²³ Jayawe jae reta upɨta pëti ara yuweru uyapɨsaka reta waerä Pablo oporomboe wae re. Jare jokua ara uwäe yawe, yuweru ye jokua judío itenondewa reta jeta ïru wae reta ndiwe. Jayawe opaete uyembatɨ reta Pablo oï wae pe. Jare jokua ndimbowe wiwe kaaruete rewa Pablo oporomboe. Jae umɨmbeu chupe reta kërái yandeRu Tumpa ombou Jesús iko waerä judío reta imburuwicha wasurä jaeño mái pewa. Jae uikuaaka wi chupe reta Jesús rewa Moisés uikuatía wae rupi jare ïru kuimbae Tumpa iñee arakae umɨmbeu wae reta uikuatía wae rupi. Jukuärái oporomboe Pablo, echa’ä jae uipotaete jae reta wi wɨrowia waerä Jesús re ramo.

Pablo umɨmbeu ñee ikawi wae Cristo rewa Roma pe

²⁴ Jare amokue wae jae reta ipɨte wi wɨrowia Pablo jei wae re, erëi ïru wae reta wɨrowia’ä.

²⁵ Jare umbɨpɨ uyeaka reta Pablo oporomboe wae re. Jayawe ndei yuraa ye reta mbowe, Pablo jei chupe reta: “Kërái Espíritu Santo jei arakae Isaías rupi yanderamɨkue reta pe, jukuärái wi pemaerä. Echa’ä jae jei Isaías pe kuärái:

²⁶ ‘Ekua ere Israel pewa reta pe che jae aï chupe reta kuärái: ‘Piyanduta tëi chiñee, erëi pikuaata’ä etei. Pechata tëi che mbaembae ayapo wae, erëi ndarau pikuaa kawi.’

²⁷ Jukuärái ere chupe reta, echa’ä jae reta ipɨatäta uyeyapo chekotɨ. Iyapɨsa oyopɨ reta awɨye waerä uyandu chiñee. Jare usapɨmi reta awɨye waerä uecha mbaembae ayapo wae. Erëi jae reta moná uyandu chiñee yawe jare uecha reta ayapo wae yawe, ipɨa rewe uikuaa kawita reta jare uyerowata reta chekotɨ che aepɨ reta waerä.’ Jukuärái jei Espíritu Santo,” jei Pablo chupe reta.

²⁸ Jare Pablo jei wi jokua judío reta pe: “Pikuaa kawi kua: Tumpa umbɨpɨ ma uikuaaka judío mbae wae reta pe kërái rupi ipuere onoi reta waerä tekowe opa mbae wae Tumpa ndiwe. Jare jae reta uyapɨsakata jese,” jei Pablo chupe reta.

²⁹ Jayawe Pablo opa ma uyemɨngeta yawe, jae reta uyeaka rewe yuraa ye joko wi.

³⁰ Jaɨkue rupi Pablo umbɨepɨ jokua tëta iko pɨpe waerä mokui año rupi. Jare jokua tëta pe iko rambuewe, jae umbɨasa kawi opaete yuweru opou ipɨ wae reta.

³¹ Jare ukɨye mbae rewe jekuaeño oporomboe yandeYa Jesucristo rewa jare këraita oï mbaembae Jesús oï ma yawe opaete wae imburuwicha wasurä jaeño mái pewa. Jare jokua mokui año rupi, mbaetɨ kiawe umbɨawái Pablo wae.