Hebreos 9 - Biblia

¹ Jayawe jokua yemɨngeta arakae uyapo reta wae uikuaaka yanderamɨkue reta pe kërái umbutuicha reta waerä Tumpa jee, jare kërái uyapo iyupe reta waerä kiape Tumpa jee umbutuicha reta waerä.

² Jáeramo jae reta uyapɨkatu tupao mokui o onoi wae. Tupao joo tenondewa wae jee o jupi wae. Joko pe iko mechero ikawiete wae oro pewa jare mbaerenda. Jokua mbaerenda re oñono reta mbɨyape uñeñono tee Tumpa pewarä wae.

³ Jare pëti puyu o umbɨyao pɨpe wae japɨpe kotɨ ime iko ïru o raɨ – jae ko o jupiete ye jee wae.

⁴ Joko pe iko mbaerenda oro pewa mbae utimbo kawi wae sacerdote reta uapɨ jese wae, jare Tumpa arakae jei wae yemɨmandúa jɨru. Jokua jɨru ɨwɨra pewa ko, erëi opaete ikupe rupi iko oro yepái. Jare jɨru japɨpe ime iko mbapɨ mbaembae: Pëti wae ko jae yapepo oro pewa maná oï pɨpe wae. Ïru wae ko jae Aarón ipopoka jokɨ wae. Jare taɨkuewaete ko jae mokui ita ipe kawi wae – jae ko jokua ita jese Tumpa uikuatía kërái jae reta yurekota ko jokua yemɨngeta rupi wae.

⁵ Jare jokua jɨru iyapeteka iáramo yureko mokui araɨwa reta echa rami ikawiete wae kerubín jee wae reta. Jae reta umbɨyasoi jɨru iyapeteka iáramo ipepo pe, kiape Tumpa uechaka Israel iñemoñaa reta pe uiparareko reta wae. Imeño oï tëi kua reta re jekuaeño yayemɨngeta waerä tëi jese. Erëi jae’ä ko kua aipota yayemboe jese waerä añawe.

⁶ Jayawe opaete kua mbaembae uyeyapɨkatu kawi ma yawe, sacerdote reta opa ara rupi uike tupao joo tenondewa wae pe uyapo reta waerä iparawɨkɨ.

⁷ Erëi o jupiete ye wae pe sacerdote tenondewaeteño ipuere uike pëti weseño año pe. Jare jae uike yawe, imeta ko uruike mbaemɨmba uyeyukakue wae juwɨ upɨyere waerä Tumpa jowai. Jukuärái uyapo awɨye waerä Tumpa uiporaraka chupe reta jae mbaembae uyawɨ Tumpa kotɨ wae rei jare Israel iñemoñaa reta mbaembae uyawɨ uikuaa mbae rewe wae re.

⁸ Opaete kua mbaembae rupi Espíritu Santo uikuaaka iko chupe reta kua: jokua tupao tenondewa imeño iko rambuewe, tape Tumpa pe oo wae ndeiño uyepea iko opaete wae reta pewarä.

^9-10 Jare jokua ko jae pëti yembɨjaanga yanemaerä añawe wi, jare jokua uikuaaka yandewe kuärái: ndarau kía ipuere opa ipɨayoe Tumpa kotɨ mbaembae wɨraa umee Tumpa pe wae rupi. Jukuärái jeta wae reta uipota tëi uyapo. Echa’ä wɨraa reta mbaemɨmba uyuka umee waerä Tumpa pe. Jae nunga wi ime amokue tembiu jae reta jou’ä wae. Jare opa kërái rái rupi uyeyoe reta wi. Añetete, opaño kërái rái uyapo reta umbutuicha waerä Tumpa jee. Erëi opaete kua mbaembae, jae ko mbaembae uyekuaa waeño jare ipuere’ä oyoe kiawe ipɨa Tumpa kotɨ. Ipɨa imeño umbɨjeko oï mbaembae kachi uyapo wae re. Erëi yande judío reta yaiko wae imeta ko yayapo yaiko kua mbaembae tenonde yawe, Tumpa uyapo ye rewa mbae ipɨau wae yanemaerä.

Jesucristo umano opa umbái waerä teko ñanoi Tumpa kotɨ wae

¹¹ Erëi añawe Cristo uyeyapo ma yandesacerdote tenondewaeterä. Jare añawe jae uyapo wae rupi yandepuere yayekou mbaembae ikawiete wae re. Echa’ä jae uike ma yandepepɨka pe pëti tupao ikawiete ye ara pe oï wae pe. Jokua tupao mbaetɨ uyapo kuimbae reta jare kua ɨwɨ pewa’ä ko.

¹² Jare jae uike yawe jokua tupao joo jupiete ye wae pe, jae uike pëti weseño jaeño mái pewa. Jare uruike’ä kapura juwɨ ani toro taurusu wae juwɨ. Jae uruike jae juwɨ etei, jare jukuärái opa umbɨepɨ jaeño mái pewa mbaembae yayawɨ Tumpa kotɨ wae.

¹³ Yande judío yaiko wae reta yaikuaa kawi ñaï kía uyemɨngɨa ma Tumpa kotɨ wae ipuere’ä oo umbutuicha Tumpa jee tupao wasu pe jukuärái oï rewe. Jáeramo sacerdote reta uɨpi jokua kuimbae kapura juwɨ pe, ani toro juwɨ pe, ani waka taurusukue opa okai wae itanimbukue ndiwe ɨ uyea wae pɨpe. Jare jukuärái uyapo ma yawe, jokua ikɨa iko Tumpa kotɨ wae uyeyoe rami ma iko, jare jukuärái ipuere oo umbutuicha ye Tumpa jee tupao wasu pe.

¹⁴ Erëi Cristo juwɨ ikawiete ye ko mbaemɨmba reta juwɨ wi. Echa’ä mbaemɨmba juwɨ jare ipotawe ïru mbae uyapo reta tëi wae ipuere’ä yandepɨayoe añetete rewe. Erëi Jesucristo juwɨ opa oyoe yandepɨa yanembɨjekose wae wi, jukuärái yandepuere waerä yayeyokui Tumpa ikoño mái wae pe. Echa’ä Cristo jeko mbaei ko jare uñemee umano waerä yanderé Espíritu Santo ikoño mái wae imbaepuere rupi.

¹⁵ Jare Cristo kua uyapo ramo, jae ipo pe ma oï uyeyapo kawi waerä yemɨngeta ipɨau wae Tumpa uyapo oï yande ndiwe wae. Jokua ïru yemɨngeta arakae uyapo reta wae ipuere’ä yanemborɨ. Echa’ä jokua yemɨngeta ime wɨreko mbaepuere yanderé yawe, yayawɨñoi Tumpa kotɨ. Jare jokua teko Tumpa kotɨ yareko wae ñaneapɨ̈ti iko rami ko. Erëi añawe Cristo umano ma yanderé opa umbɨepɨ waerä mbaembae yayawɨ wae, jare jukuärái opa ma yandeyora jokua teko wi. Jáeramo añawe yande jae ñanereni wae reta yandepuere ñanoi yanemaerä opa mbaembae ikawi wae Tumpa jei umeeta oï yandewe wae jaeño mái pewa.

¹⁶ Erëi añetete kua uyeyapo waerä, imeta ko Cristo umano rani. Echa’ä yaikuaa kawi ñaï amo pe kua ɨwɨ pe ime amokue tu reta upɨta umee waerä taɨ reta pe imbaembae umano ma yawe.

¹⁷ Jare jukuärái yawe, jae reta ndarau tu imbaembae uipɨsɨ iyupe tu imeño iko rambuewe. Jare tu umano yawe ramo taɨ reta ipuere onoi imaerä tu imbaembaekue.

¹⁸ Jae ramiño wi jokua yemɨngeta arakae Tumpa uyapo yanderamɨkue reta ndiwe wae uyeyapo waerä imeta ko oï mano rani. Imeta ko tuwɨ uyepɨyere wae.

¹⁹ Yanemandúa kawi ñaï, Moisés opa ma umɨmbeu yawe Israel iñemoñaa reta pe mbaembae Tumpa jei chupe reta wae, jae uyuka waka taurusu wae jare kapura, jare upɨyere juwɨ. Joko wi uipɨsɨ pëti ñana mii hisopo jee wae jare owecharawe uñemɨpɨ̈ta wae, jare umäkɨ tuwɨ pɨpe jare ɨ pe. Jare jokua pɨpe Moisés uɨpi tupapire Tumpa jei wae uyekuatía pɨpe wae jare opaete Israel iñemoñaa reta wi

²⁰ jei rewe: “Kua tuwɨ pɨpe upɨta kawi ma oï kua yemɨngeta Tumpa uyapo pe reta ndiwe wae. Jare pe reta imeta ko opa piyapo kawi.” Jukuärái Moisés jei chupe reta.

²¹ Jae ramiño wi Moisés uɨpi tuwɨ pe tupao jare opaete sacerdote reta jembiporu reta wi.

²² Echa’ä Tumpa arakae jei wae rupi opaete seri uyeyoe oï Tumpa kotɨ tuwɨ pe. Jare mbaetɨ tuwɨ uyepɨyere yawe, Tumpa ndarau etei umbái mbaembae yayawɨ ikotɨ wae.

²³ Kua pe ikawi yanemandúa waerä kua re: Jokua tupao ɨwɨ pewa jare opaete mbaembae japɨpe oï wae, tupao ara pewa jaanga retaño ko. Jare jokua mbaembae imeta ko uyerɨpika mbaemɨmba juwɨ pɨpe uyeyoe waerä Tumpa kotɨ. Erëi tupao ara pewa ikawiete ramo, imeta ko uyeyoe Tumpa kotɨ mbae ikawiete wae pɨpe.

²⁴ Echa’ä jokua tupao mbaetɨ ko tupao kua ɨwɨ pewa kuimbae reta uyapo wae, jare jae’ä ko jaanga wi. Jokua tupao ara pewa etei ko. Jare joko pe ko Cristo uike Tumpa oï wae pe etei uyerure waerä yanderé.

²⁵ Jare Cristo mbaetɨ uyapo kërái sacerdote tenondewaete kua ɨwɨ pewa uyapo wae rami. Echa’ä sacerdote tenondewaete kua ɨwɨ pewa opa año rupi uruike mbaemɨmba juwɨ tupao joo jupiete ye wae pe. Erëi Cristo mbaetɨ uñemee jeta wese umano waerä.

²⁶ Jukuärái yawe, jayawe ɨwɨ uyeyapo wiwe jeta wese Cristo umanota tëi. Erëi añawe kua ara taɨkuewa rupi jae uñemee umano waerä pëti weseño jaeño mái pewa opa umbái waerä mbaembae yayawɨ Tumpa kotɨ wae.

²⁷ Opaete yande kua ɨwɨ pewa reta, pëti weseño ñamanota ñaï, jare jaɨkue rupi yayemboɨta ñaï kuri Tumpa jowai jae umɨñatima waerä yandewe mbaembae yayapo wae re.

²⁸ Jare jukuärái wi Cristo pëti weseño uñemee umano waerä jeta wae reta re mbaembae jae reta uyawɨ Tumpa kotɨ wae opa umbái waerä. Jare jae ou yeta oï, erëi mbaetɨta ma ou umbɨepɨ ye waerä mbaembae yayawɨ wae. Jae ou yeta oï umee waerä tekowe opa mbae wae opaete kía uäro ñonoï wae reta pe.