Hebreos 5 - Biblia

¹ Opaete sacerdote tenondewaete reta uyeparawo ko kuimbae reta ipɨte wi uyapo waerä mbarawɨkɨ Tumpa pe kuimbae reta pewarä. Echa’ä ime yawe kía uyawɨ Tumpa kotɨ wae, jare jokua re uipota umee mbaemɨmba uyuka wae jare ïru mbaembae reta Tumpa pe yawe, sacerdote tenondewaete wɨraa chupe.

² Jare ime yawe kía uikuaa mbae rewe opia Tumpa jape wi wae, sacerdote tenondewaete ipuere omborɨ uiparareko rewe, echa’ä jae ko ipɨräta mbae wae wi.

³ Jare jokua jeko pewa jae imeta ko wɨraa wi mbaemɨmba uyuka umee waerä Tumpa pe jaei mbaembae uyawɨ Tumpa kotɨ wae re kërái ïru wae reta pewarä uyapo rami.

⁴ Jare yanemandúa kawi ñaï, arakaete rupi Aarón uyeparawo yawe Israel iñemoñaa reta isacerdote tenondewaeterä, ¿kía pa uiparawo? Tumpa etei ko uiparawo. Jare jukuärái yaikuaa jaeño Tumpa uiparawo wae ipuere iko sacerdote tenondewaeterä. Ndarau kía ipuere uyeparawo jaei.

⁵ Jae ramiño wi Cristo mbaetɨ ko jaei uyembɨjee sacerdote tenondewaeterä. YandeRu Tumpa ko uiparawo jare umbutuicha jei chupe yawe: “Nde ko jae cheRaɨ. Kua ara etei aikuaaka aï opaete wae pe che ko jae ndeRu.” Jukuärái jei chupe.

⁶ Jare Tumpa jei wi chupe kuärái: “Nde ndikota pëti sacerdote Melquisedec rami jaeño mái pewa,” jei chupe.

⁷ Cristo kua ɨwɨ pe iko rambuewe, uyerure usapɨkai rewe jare jesaɨ rewe yandeRu Tumpa pe jae uepɨ waerä mano wi. Jare Cristo uñemɨmichi rewe uyapo Tumpa jei wae ramo, Tumpa uyapɨsaka uyerure chupe wae re. Echa’ä umbɨjekowe ye ueru Cristo umanokue wae reta ipɨte wi.

⁸ Yepe tëi Cristo ko jae Tumpa Taɨ etei, erëi jae etei wi uiporara wae rupi uyemboe uyapo waerä Tumpa jei wae.

⁹ Jare Cristo opa uyapo yawe opaete yandeRu Tumpa jei chupe wae, jae uyeyapo tekowe opa mbae wae iYarä. Jare añawe Cristo umee tekowe opa mbae wae opaete kía kía jae jei wae uyapo wae reta pe.

¹⁰ Jare Tumpa oñono wi Cristo sacerdote tenondewaeterä Melquisedec rami.

Jekuaeño ñañemɨmɨräta Tumpa re

¹¹ Kua rewa aipota tëi jeta mbaembae amɨmbeu pewe, erëi yawái chewe amɨesäka kawi waerä pewe, echa’ä jarea’ä pikuaa ramo.

¹² Ɨma ma pe reta perowia tëi Cristo re, jare peporomboeta tëi ma ko kua mbaembae re. Erëi pepuere’ä, echa’ä jokua yemboe yawái mbae mii awe Tumpa rewa ndeiño pikuaa wi. Imeta ko ou kía pemboe pɨau ye. Añetete pe reta ko jae michi wae reta necheño jou wae rami.

¹³ Echa’ä michi wae reta necheño jou wae ndeiño uikuaa mbae jupi wae rewa. Jare jukuärái rami ko pe reta wi.

¹⁴ Erëi ukuakuaa ma Tumpa kotɨ wae reta ɨma rupi uyemboe ma uikuaa waerä mbae ra ko jae ikawi wae jare ikawi mbae wae. Jae reta ko kía ipuere jou tembiu ipɨräta wae rami, echa’ä ipuere uikuaa kawi reta yemboe yawái wae.