Hebreos 4 - Biblia

Tumpa uyapo yandewe yaputuu waerä añetete pewa

¹ Erëi Tumpa jei yandewe ime kërái rupi yaputuu waerä añetete pewa, jare jokua imeño oï añawe yandepuere yayekou waerä jese. Jáeramo yande reta ikawi ko yayandareko kawi waerä yandiyé, jukuärái opaete yande reta yandepuere waerä yaputuu añetete pewa. Awɨye kía nunga awe jukuäraiño tupɨta toï.

² Echa’ä jukuärái uasa arakaete. Tumpa uikuaaka tëi yanderamɨkue reta pe jae reta ipuere uputuu añetete pewa ɨwɨ Canaán pe. Erëi jae reta uyekou’ä jese, echa’ä wɨrowia’ä reta jokua uyandu wae re. Jae ramiño wi Tumpa uikuaaka ma yandewe pëti ñee ikawi wae – jae ko yandepuere yaputuu waerä añetete pewa.

³ Erëi jaeño yande kua ñee re yarowia wae reta yandepuere yayekou jokua re. Ïru wae reta ndarau ipuere uyekou jese, echa’ä Tumpa jei jokua wɨrowia mbae wae reta rewa kuärái: “Jáeramo che jae chepochɨ rewe: ‘Che ayapota tëi aiko jae reta uputuu waerä añetete pewa. Erëi añawe ndarau ayapo chupe reta,’ jae.” Jukuärái jei Tumpa. Tumpa uyapɨkatu tëi kërái rupi jae reta uputuu waerä añetete rewe. Jare jokua uyeyapɨkatu ma oï chupe reta Tumpa kua ɨwɨ opa uyapo wiwe.

⁴ Jukuärái yande yaikuaa, echa’ä kua ko uyekuatía oï ara chiu rewa: “Tumpa opa uyapo opaete jembiapo reta owa ara pe jare uparawɨkɨ'ä chiu ara pe.” Jukuärái jei.

⁵ Jayawe Israel iñemoñaa reta ipuereta tëi uputuu añetete pewa, erëitu jae reta uyekou’ä jese. Yaecha yamɨngeta ye mbae Tumpa jei wae: “Che ayapota tëi aiko jae reta uputuu waerä añetete pewa. Erëi añawe ndarau ayapo chupe reta,” jei.

⁶ Jayawe ¿mbae pa yaikuaa kua pe? Añawe imeño oï kërái rupi yaputuu waerä añetete pewa jare amokue wae reta uyekouta oï jese. Jukuärái wi ko Tumpa uikuaaka tëi yanderamɨkue reta pe. Erëitu jae reta uyekou’ä jese, echa’ä wɨrowia’ä reta Tumpa jei wae re ramo.

⁷ Jayawe ɨma año ma uasa yawe, Tumpa uikuaaka ma yandewe imeño oï kërái rupi yaputuu waerä añetete pewa, jare kua ara etei yandepuere yayekou jokua re. Jukuärái Tumpa uikuaaka yandewe mburuwicha wasu David rupi jae uikuatía yawe kua opa ma yamɨngeta wae. Jae ko jokua yamɨngeta wae pe jei: “Kua ara chiñee piyandu yawe, awɨye pepɨa pemɨtäta,” jei.

⁸ Yande yaikuaa Josué uruike ɨwɨ Canaán pe jokua opa umano ɨwɨtini wasu rupi wae taɨ jare tayɨ reta. Erëi jae retawe uputuu’ä añetete pewa joko pe. Echa’ä añetete jae reta uyekou jese yawe, Tumpa ndarau jekuaeño uyemɨngeta tëi yandewe ïru ara mbutuu rewa.

^9-10 Jáeramo kërái Tumpa opa uyapo iparawɨkɨ chiu ara pe jare uputuu, jukuärái wi imeño oï kërái rupi Tumpa taɨ reta uputuu waerä añetete pewa. Jare jokua ko Tumpa uipota umee oï yandewe. Jare yande yaputuu ma yawe jukuärái añetete pewa, jayawe yaputuu ma ko yandeparawɨkɨ wi. Yaputuu ma ko Tumpa re kërái jae uipota wae rupi.

¹¹ Jáeramo ñañemɨatangätuta ko yaputuu waerä añetete pewa, awɨye waerä ñañererükumewa yanderamɨkue reta rami. Jae reta uñererükumewa, echa’ä uyapo’ä reta Tumpa jei wae ramo.

¹² Jayawe yayapɨsaka Tumpa iñee re, echa’ä iñee tekowe pewa ko yanemaerä jare ime onoi mbaepuere. Jare ikawiete ko pëti kɨsepuku jaimbeyowai wi. Pëti kɨsepuku ipuere uyasɨa yandewi ñanekäwe iyuapɨka rupi jare ipuere omondoo yandewi. Erëi Tumpa iñee imbaepuerete ko kɨsepuku wi. Echa’ä Tumpa iñee uike yandepɨa pe jare uikuaaka yandewe yandepɨayemɨngeta rewa ikawi ra oï ani ikawi’ä ra.

¹³ Añetete mbaetɨ kiawe Tumpa uyapo wae ipuere uñemi chuwi, echa’ä Tumpa uecha jare uikuaa opaetei mbaembae. Jare jae jowai yayemboɨta ñaï kuri yamɨmbeu waerä yandereko rewa.

Jesús ko jae yandesacerdote tenondewaete

¹⁴ Erëi yande ime ma ñanoi pëti sacerdote tenondewaete – jae ko Jesús, Tumpa Taɨ etei. Jae oo ma ara pe etei yandeRu Tumpa jowai jare joko pe jae uyerure oï yanderé. Jáeramo jekuaeñota ko yarowia kawi jese.

¹⁵ Kua yandesacerdote tenondewaete umae yanderé yandeparareko rewe ñanepɨräta’ä ñaï yawe, echa’ä jae uikuaa kërái ko jokua ñanepɨräta’ä wae. Echa’ä kua ɨwɨ pe iko rambuewe, ou Jesús pe opa kërái rupi uyawɨka waerä tëi chupe Tumpa kotɨ wae yande rami. Erëi jae pëti wese awe uyawɨ'ä Tumpa kotɨ.

¹⁶ Jare jae tuicha ipɨakawi yandewe. Jáeramo yaya mii Tumpa re yakɨye mbae rewe Tumpa yandeparareko waerä jare yanemborɨ waerä jae ipɨakawi rupi.