Hebreos 2 - Biblia

Awɨye ñarɨ̈ro ñee ikawi wae

¹ Jayawe opaete kua mbaembae añetete ko. Jáeramo imeta ko yaipɨsɨ kawi yandeyupe jokua ñee yayandu Tumpa Taɨ rewa wae, awɨye waerä yapia Tumpa jape wi.

² Echa’ä, ¿mbae ra uasa arakaete Israel iñemoñaa reta pe jae reta uyapo’ä yawe Tumpa jei wae rupi? Tumpa uiporaraka chupe reta jupi rupi. Tumpa uikuaaka chupe reta iñee araɨwa reta rupi, jare jokua ñee uyepepɨka’ä etei.

³ Erëi ñee tekowe opa mbae wae rewa ikawiete ko. Jayawe, ¿këraita pa yayepe Tumpa iarasɨ wi yayapɨsaka’ä yawe jokua ñee re? Ndarau yandepuere. Jokua ñee ipɨau wae ikawiete ko, echa’ä yandeYa etei tenonde umɨmbeu. Jare jaɨkue rupi jae iñee uyandu wae reta umɨmbeu yuapɨ ye yandewe jupi rupi.

⁴ Jare Tumpa etei uikuaaka jokua jae reta jei wae añetete ko. Echa’ä jae etei umee chupe reta ipuere waerä jae reta uyapo mbaembae opa kërái raí rupi kuimbae retaño ipuere’ä uyapo wae. Jae nunga wi Espíritu Santo umee mbaepuere ambɨe ye ye wae reta jokua ñee re wɨrowia wae reta pe kërái Tumpa uipota wae rupi.

YandeYa Cristo uyeyapo kuimbaerä yanderepɨ waerä

⁵ Tumpa pëti ara umbɨpɨauta oï kua ɨwɨ. Erëi umeeta’ä araɨwa reta pe mbaepuere onoi waerä jese.

⁶ Echa’ä Tumpa iñeerɨru pe yamɨngeta kërái pëti wae jei Tumpa pe kuärái: “¿Kía pa ko ore nemandúa waerä oreré? ¿Kía pa ko ore ndiyandareko waerä oreré?

⁷ Nde oreapo orembaepuere rewe. Jaeño araɨwa reta ime onoi mbaepuere ɨwate katu orewi. ¡Kërái etei orembutuicha ma!

⁸ Opaete mbaembae niñono ma orepo pe.” Jukuärái jei. Jayawe Tumpa oñono yawe yandepo pe opaete mbaembae, kua uikuaaka yandewe mbaetɨ ko mbae awe ñanoi’ä mbaepuere jese wae. Erëitu añawe rupi ndeiño yaecha opaete mbaembae yandepo pe oï.

⁹ Erëi yaecha ko Jesús opaete mbaembae re oï. Yepe tëi tenonde Tumpa umɨmichi Jesús araɨwa reta wi Jesús uyeyapo yawe kuimbaerä, erëi jokua michi pewaño. Añawe Jesús umano yanderé ramo, Tumpa oñono ma opaete wae imburuwicha wasurä iko waerä jare umee chupe uyepɨuka waerä opaete wae pe. Añetete Tumpa ipɨakawiete ramo, ombou Jesús umano opaete pewarä.

¹⁰ Tumpa ko jae opaete mbaembae iYa. Echa’ä jae rupi etei jare jae imaerä etei uyekuaa opaete mbaembae. Jare jae uipota ɨwɨ pewa reta jeta taɨrä yureko reta waerä jare uyekou reta waerä jae imbaepuere jupiete ye wae re. Jáeramo jae ipɨayemɨngeta ko Jesús uyapo waerä yandewe tape tekowe opa mbae wae ñanoi waerä. Jare jaeño tuicha uiporara rewe Jesús ipuere opa uyapo jokua mbarawɨkɨ.

¹¹ Jesús ko ñaneñono tee Tumpa pewarä. Jare yande ñaï pëti tëtara Jesús ndiwe ramo, jae uyerowiaete oï ñanereni tɨwɨ jare jindɨ retarä.

¹² Echa’ä yamɨngeta Tumpa iñeerɨru pe kërái Jesús jei Tu pe kuärái: “Che aikuaakata cherɨwɨ reta pe jare cherindɨ reta pe nde rewa. Ambutuichata nderee akäta wae pɨpe nderé wɨrowia wae reta uyembatɨ ñonoï wae rupi.” Jukuärái jei.

¹³ Jare Jesús jei wi kuärái: “Che arowia katuta Tumpa reño.” Jare Jesús jei wi kuärái: “Mase, ko aï, jare ime wi kua pe ñonoï Tumpa taɨ reta jae umee chewe cheïru retarä wae.” Jukuärái jei.

¹⁴ Opaete kua Tumpa taɨ reta yae chupe wae, jae reta ko jae soo jare tuwɨ jare maekäwe pewa. Jáeramo Jesús wi uyeyapo jae reta rami etei ipuere waerä imano rupi umɨamɨri mano iya – jae ko Añawasu.

¹⁵ Yande parawete reta yande michi wiwe yakɨyese mano wi jare jukuärái mano opa yandeyokua iko rami. Erëi Jesús uyapo wae yandeyora ma chuwi.

¹⁶ Yaikuaa ñaï Jesús ou’ä ko omborɨ waerä araɨwa reta. Ou ko yanemborɨ waerä yande Abraham iñemoñaa retarä yaiko wae.

¹⁷ Jáeramo jae imeta ko uyeyapo yande rami etei uyapo waerä yandewe kërái rupi yaya waerä Tumpa re. Jae uyeyapo yandesacerdote tenondewaeterä jupi wae. Jare jae uiporara wae rupi opa umbái yandewi mbaembae yayawɨ Tumpa kotɨ wae. Añawe yandepuere yarowia katu jese jae uyapo waerä mbarawɨkɨ jupi yanemaerä Tumpa jowai, jukuärái yandepuere waerä yaya Tumpa re. Jare jae yande rami etei iko ramo, jae umae yanderé yandeparareko rewe.

¹⁸ Jare Jesús ipuerete yanemborɨ ou yawe mbae uipota uyawɨka yandewe Tumpa kotɨ wae, echa’ä jae uikuaa kërái ko jokua. Chupe etei wi ou uyawɨka waerä tëi Tu kotɨ, jare jukuärái jae wi uiporara yande rami.