Hebreos 13 - Biblia

Kërái yambɨyerowia waerä Tumpa

¹ Jayawe, ¿këraita ra yaiko yambɨyerowia waerä Tumpa? Pe reta ko jae Tumpa jëtara reta. Jáeramo piko jekuaeño piyerau päwe rewe.

² Jare jekuaeño pembɨasa kawi mboupa reta perëta pe, echa’ä jukuärái amokue wae reta umbɨasa ma jëta pe araɨwa reta uikuaa mbae rewe.

³ Awɨye peakañɨ ïru hermano reta uiporara ñonoï peresorɨru pe wae wi. Pemandúa mii jese reta pe reta joko pe peï jae reta ndiwe rami. Jare awɨye peakañɨ wi jokua uiporara ñonoï Cristo re wɨrowia jeko pewa wae reta wi. Echa’ä pikuaa ko piporarata peï wi aramoi jae reta rami.

⁴ Umenda wae reta jekuaeño tuyerereko kawi. Awɨye kía tuyapo awasa. Echa’ä Tumpa uiporarakata oï awasa uyapo wae reta pe jare imbɨkere wae reta pe.

⁵ Awɨye pipotaete korepoti pemaeräño. Toï pepɨa jenda pe ime ma penoi wae re. Awɨye wi piyembɨpɨa’ä jeta mbaembae penoi waerä, echa’ä Tumpa etei jei ma yandewe kuärái: “Che ndarau etei ndueya. Jekuaeño ayandarekota aï nderé.” Jukuärái Tumpa jei.

⁶ Jáeramo yandepuere yae yarowia katu rewe kuärái: “Che ndarau akɨye mbae kía ipuere uyapo chewe wae wi. Echa’ä yandeYa ko jae chemborɨ wae.” Jukuärái yandepuere yae.

⁷ Jekuaeñota ko pemandúa petenondewa reta re, echa’ä jae reta ko jae Tumpa iñee umɨmbeu pewe wae. Piyemɨngeta mii pepɨa pe jae reta ikawi uyapo wae rewa. Jare jekuaeño perowia Cristo re kërái jae reta wɨrowia jese rami.

⁸ Jesucristo uyembɨambɨe’ä etei iyɨpɨ wiwe, añawe rewa, jare jaeño mái pewa.

⁹ Erëi kua ɨwɨ pe ime jeta yemboe ambɨe ye ye wae reta. Jáeramo piyandareko kawi piyé, echa’ä pemaeño piyé yawe, jokua yemboe reta ipuere pembopia Jesucristo wi. Erëi ikawi ko yande reta jekuaeño ñañemɨmɨräta waerä Tumpa ipɨakawi re. Jeta wae reta uipota tëi uñemɨmɨräta Tumpa re teko tembiu pewa rupi. Erëi mbaetɨi yanemborɨ jokua nunga teko reta.

¹⁰ Jáeramo jokua teko reta rupi uyeyokui tëi reta Tumpa pe wae ndarau etei uyekou reta añetete pewa yande rami. Echa’ä Jesucristo uyapo kurusu re waeño ko ikawiete yandewe.

¹¹ Jare kua pe ime mbae re yayemɨngeta waerä yandepɨa pe. Yande yaikuaa kawi ñaï sacerdote tenondewaete uyuka mbaemɨmba yawe, uruike juwɨ tupao joo jupiete ye wae pe. Jukuärái uyapo awɨye waerä Tumpa uiporaraka jëtáɨwa reta pe mbaembae uyawɨ reta Tumpa kotɨ wae re. Joko wi sacerdote wɨraa jokua mbaemɨmba jetekue tëta wasu wi oka pe opa uapɨ waerä.

¹² Jukuärái wi Jesús uiporara rewe umano tëta wasu oka pe. Jare jae juwɨ upɨyere wae rupi opa yandepɨayoe Tumpa kotɨ, jare jukuärái ñaneñono tee Tumpa pewarä.

¹³ Jáeramo yepe tëi jeta ñanerëtara judío reta opa wɨrɨ̈ro Jesucristo, erëitu yande reta yaya mii jese. Jare Jesucristo re yaya ramo, ñanerɨ̈rota reta wi. Aramoi yanemombota iyuwi reta. Erëitu ñamaeño jese reta.

¹⁴ Echa’ä yaikuaa kua ɨwɨ jare opaete tëta wasu reta oï pɨpe wae ndarau ɨma iko. Erëi jokua tëta wasu yande ñaäro ñaï wae ara pewa ko jare ndarau etei opa.

¹⁵ Añawe rupi yande reta mbaetɨ ma yambɨyerowia Tumpa mbaemɨmba reta yaraa ñamee chupe wae rupi. Echa’ä Cristo opa ma umbɨambɨe opaete jokua yandewe. Añawe rupi yambɨyerowia ko Tumpa jae jee yambutuicha wae rupi. Jayawe yambutuicha jae jee opaete wae jowake.

¹⁶ Jare jekuaeño yanemandúa yayapo waerä ikawi wae jare yayemborɨ katu waerä päwe rewe ime ñanoi wae rupi. Echa’ä jukuärái rupi ko yambɨyerowia ñaï wi Tumpa añawe rupi.

¹⁷ Petenondewa reta uparawɨkɨ ñonoï uyandareko kawi waerä peré, echa’ä jae reta uikuaa pëti ara uyemboɨta ñonoï Tumpa jowai umɨmbeu waerä iparawɨkɨ rewa. Jáeramo piko mii jae reta jei wae rupi. Echa’ä jukuärái piyapo yawe, jae reta uyerowia rewe uyeyokuita Tumpa pe. Erëi pe reta piyapɨsaka’ä yawe jese reta, jae reta ipɨatɨtɨta, jare jokua ndarau ueru pewe mbae ikawi wae.

¹⁸ Jayawe jekuaeño piyerure mii Tumpa pe cheré jare chewataïru reta re wi. Ore nduikuaa orepɨa orembɨjeko’ä oï mbae re awe. Erëi nduipotaete jekuaeño nduiko jupi ipotawe mbae uasa orewe wae rupi.

¹⁹ Jare che pumɨñera pe reta piyerure waerä cheré Tumpa pe jae chemondo ye waerä ɨmambae pekotɨ.

Saludo reta

²⁰ YandeRu Tumpa ko jae yanembɨpɨakatu wae. Jare jae ko uyapo pëti yemɨngeta ipɨau wae yande ndiwe. Jare yandeYa Jesucristo juwɨ uyepɨyere wae pɨpe jokua yemɨngeta upɨta kawi ma oï jaeño mái pewa. Jáeramo Tumpa umbɨjekowe ye ueru Jesucristo uyandareko waerä yanderé pëti owecha reta iyandarekoa ikawi wae rami.

²¹ Che ayerure aï Tumpa pe jekuaeño pemborɨ piyapo kawi waerä opaete jae jei wae rupi. Jare jae tuparawɨkɨ yandepɨa pe yande reta jekuaeño yambɨyerowia waerä jae. Jare jukuärái tuyapo yandeYa Jesucristo imbaepuere rupi. ¡Tuyembutuichaka yandeYa Jesucristo jee jaeño mái pewa! Jukuärái tuiko.

²² Cherëtara mii reta, che pumɨñera piyapɨsaka kawi waerä kua ñee aikuatía aï pewe wae re. Puku’ä ko kua ñee reta.

²³ Aipota pikuaa waerä hermano Timoteo oë wɨte ma peresorɨru wi. Jae kua ara reta rupi uwäe yawe kua pe, araata che ndiwe a apou yawe pepɨ.

²⁴ Pembɨsaluda mii chewe kuri opaete petenondewa reta jare ïru wae reta Cristo re wɨrowia wae joko pe ñonoï wae. Kua pe ime ñonoï amokue hermano reta ɨwɨ Italia pewa. Jae reta omondo pewe saludo wi.

²⁵ Tumpa jekuaeño tipɨakawi pewe, opaete pe reta. Jukuärái tuiko.