Hebreos 10 - Biblia

Jesús umano pëti weseño jaeño mái pewa yanderé

¹ Tumpa arakae uikuaaka yanderamɨkue judío reta pe iñee, jare Moisés uikuatía kawi. Erëi jokua ñee jaeño umbɨjaanga yandewe mbaembae ikawi wae Tumpa uyapota iko wae re. Jae’ä ko jokua mbaembae etei. Jokua ñee pe jei ime yawe kía uipota oya Tumpa re wae, turaa mbaemɨmba tuyuka tumee Tumpa pe. Jare jekuaeño jukuärái tuyapo opa año rupi. Erëitu jokua ndarau etei ipuere umbái chuwi mbaembae uyawɨ Tumpa kotɨ wae.

² Echa’ä jukuärái yawe moná, jayawe awɨyeta tëi ma jekuaeño wɨraa reta mbaemɨmba Tumpa pe. Echa’ä ndarau tëi ma ipɨa umbɨjeko reta mbaembae Tumpa kotɨ uyawɨ reta wae re.

³ Erëi jokua mbaemɨmba reta uñemee Tumpa pe wae, jaeño ko pëti yemɨmandúa año año rupi jokua teko onoi reta Tumpa kotɨ wae re.

⁴ Ndarau etei toro juwɨ jare kapura juwɨ ipuere opa umbái teko ñanoi wae.

⁵ Jokua jeko pewa ko Cristo ou yawe kua ɨwɨ pe, jei Tumpa pe kuärái: “Nde ndipota’ä mbaemɨmba uyeyukakue reta jare mbaembae ikawi wae reta uñemee ndewe waerä. Jáeramo nde nemee chewe cherete amee waerä mbaembae ndekotɨ uyawɨ reta wae re.

⁶ Jare nde ndiyerowia’ä mbaemɨmba uyeyukakue opa okai wae reta re jare ïru mbaembae uñemee mbaembae uyawɨ reta re wae.

⁷ Jayawe che jae ndewe: ‘Mase cheRu Tumpa, ko aï ayapo waerä nde ndipota wae kërái uyekuatía oï che rewa niñeerɨru pe,’ jae.”

⁸ Kua pe tenonde Cristo jei kërái Tumpa uipota’ä mbaemɨmba uyeyukakue reta jare mbaembae ikawi wae uñemee chupe wae reta. Jare uipota’ä wi mbaemɨmba uyeyukakue opa okai wae reta jare ïru mbaembae uñemee mbaembae uyawɨ reta re wae. Yepe tëi Tumpa arakae jei opaete jokua mbaembae reta uñemee waerä, erëi Cristo jei añetete Tumpa uipota’ä.

⁹ Jare jaɨkue rupi jei: “Mase cheRu Tumpa, ko aï ayapo waerä nde ndipota wae,” jei. Jukuärái yaikuaa Cristo opa ma umbɨyapɨ mbaemɨmba uyeyukakue uñemee wae. Jare jokua ipepɨka pe jae uyapo mbae ipɨau wae.

¹⁰ Jare añawe kua mbae ipɨau wae rupi Tumpa ñaneñono tee jae imaerä Jesucristo uyapo yandewe wae rupi. Echa’ä Cristo uñemee umano waerä pëti weseño jaeño mái pewa yanderé.

¹¹ Opa ara rupi sacerdote reta kua ɨwɨ pewa uparawɨkɨ tupao wasu pe jare jekuaeño umee ñonoï Tumpa pe mbaemɨmba uyuka reta wae. Erëi jokua ipuere’ä opa umbái mbaembae yayawɨ Tumpa kotɨ wae.

¹² Erëi yandesacerdote tenondewaete wae, Cristo, jae umee jekowe pëti weseño jaeño mái pewa mbaembae yayawɨ wae opa umbái waerä. Jare jokua jaɨkue rupi jae oo uwapɨ yandeRu Tumpa iyakata kotɨ onoi waerä mbaepuere jae ndiwe.

¹³ Jare jae oo uwapɨ wiwe, jekuaeño uäro oï Tumpa opa oñonoka rewa Cristo jowaicho reta itawa re jae jowai.

¹⁴ Jukuärái ko Cristo pëti weseño umee jekowe yanderé. Jare jukuärái jae opa yanembujupi kawi Tumpa kotɨ jaeño mái pewa opaete yande Tumpa pewarä jekuaeño ñaneñono tee oï wae reta.

¹⁵ Jae nunga wi Espíritu Santo jukuäraiete uikuaaka yandewe Tumpa iñeerɨru pe. Echa’ä joko pe uyekuatía oï jae jei wae kuärái:

¹⁶ “Che ko jae Tumpa aikoño mái wae. Jare che tae kuärái: Taɨkuete rupi ayapota aï pëti yemɨngeta ipɨau wae Israel iñemoñaa reta ndiwe. Jae ko kua: che añonota aï chiñee jae reta ipɨa pe jare jukuärái jae reta opata uikuaa kawi.” Jukuärái jei.

¹⁷ Jare jaɨkue rupi jei wi kuärái: “Ndarau ye chemandúa chupe reta mbaembae uyawɨ reta chekotɨ wae re jare mbae ikawi mbae uyapo reta wae re.” Jukuärái jei Tumpa.

¹⁸ Jayawe jokua mbaembae opa ma uyembái yandewi ramo, mbaetɨ ye ma mbae ñamee waerä mbaembae yayawɨ Tumpa kotɨ wae re.

Yaya Tumpa re yandepɨawiwe rewe

^19-20 Jáeramo hermano mii reta, añawe yandepuere yaya Tumpa re yandepɨawiwe rewe. Echa’ä Jesús umano yanderé jare juwɨ upɨyere yanemaerä, jare jukuärái uyapo ma yandewe pëti tape ipɨau wae Tumpa pe oo wae. Pemandúa kawi peï, tupao wasu pe ime pëti puyu o umbɨyao pɨpe wae awɨye waerä kiawe uike o jupiete ye wae pe Tumpa iko wae pe. Erëi añawe Cristo imano rupi jokua o umbɨyao wae uipea ma yandewe rami ko.

²¹ Jae nunga wi añawe Cristo ko jae yandesacerdote tenondewaete opaete yande Tumpa jëtararä ñaï wae reta.

²² Cristo opa ma yandepɨa oyoe awɨye waerä yandepɨa jekuaeño yanembɨjeko mbaembae kachi yayapo wae re. Jare kërái sacerdote reta jete oyoe ipuere waerä uyeyokui Tumpa pe rami, jukuärái wi Cristo opa yandepɨayoe Tumpa kotɨ ɨ jesäka kawi wae pe rami ko. Jáeramo Cristo opa ma uyapo yandewe kua mbaembae reta ramo, yaya mii Tumpa re yandepɨa añetete rewe jare yarowia katu rewe.

²³ Jare ñaäro mii yarowia katu rewe jokua mbaembae ikawiete wae Tumpa jei umeeta oï yandewe wae. Echa’ä yaikuaa Tumpa jupi ko uyapo waerä jae jei wae. Yande yamɨmbeu ma ïru wae reta pe jokua mbaembae rewa, jare Tumpa ndarau uyawɨ yandewe.

²⁴ Jae nunga wi ñañemɨatangätu mii yayerau päwe waerä jare yayapo waerä ikawi wae.

²⁵ Amokue wae uyembatɨ'ä ma ïru wae reta Cristo re wɨrowia wae ndiwe. Erëi yande reta awɨye yayapo jae reta rami. Yayembatɨ jare ñañemɨatangätu päwe mii. Jare jeieteta ko yayapo jukuärái, echa’ä yaikuaa yandeYa Jesucristo ou yeta wae koiñoete ma oï ramo.

²⁶ Echa’ä jekuaeño ñanekɨrëɨ rewe yayawɨ Tumpa kotɨ yawe yepe tëi yaikuaa ma añetete wae Cristo rewa, jayawe mbaetɨ ye ma mbae uñemee waerä mbaembae yayawɨ wae re.

²⁷ Jaeño ma ñaärota yakɨye rewe Tumpa uiporaraka waerä yandewe. Añetete koiño ma oï ara Tumpa opa umbái waerä jowaicho reta kërái tata tuicha jendɨ wae mbae opa uapɨ wae rami.

²⁸ Arakae rupi kía nunga wae yanderamɨkue reta wɨrɨ̈ro yawe Moisés uikuatía wae, jare ime mokui ani mbapɨ añetete uecha wae reta yawe, jae imeta ko umano kiawe uiparareko mbae rewe.

²⁹ ¡Oeteta oï kuri kía wɨrɨ̈ro Tumpa Taɨ yawe! Echa’ä Taɨ juwɨ rupi Tumpa uyapo yemɨngeta ipɨau wae. Erëi kía wɨrɨ̈ro Tumpa Taɨ yawe, yepe tëi jokua yemɨngeta ipɨau wae rupi jae uñeñono tee iko Tumpa pewarä, erëi jae imaerä Tumpa Taɨ juwɨ mbae’ä ko. Añetete jae Tumpa Taɨ re upɨ̈ro wae echa ko. Jare uyapo ma kachi Espíritu Santo kotɨ wi, echa’ä Espíritu Santo ipɨakawi chupe tëi.

³⁰ Jáeramo jupi ko jokua nunga uiporara waerä, echa’ä yaikuaa Tumpa jei kuärái: “Che ko jae ayepɨta aï wae. Che ko jae amɨñatimata aï chupe reta wae.” Jare jei wi kuärái: “Che ko jae peYa. Che ko puparawo chemaerä piko waerä. Piyemboɨta peï kuri cherowai che amɨñatima waerä pewe mbaembae piyapo wae re.” Jukuärái jei Tumpa.

³¹ Jae ko kɨye tuichaete ye wae Tumpa ikoño mái wae uiporaraka yandewe yawe.

³² Erëi pemandúa ara reta uasa wae re yemboe Cristo rewa umbɨembipe ma yawe pepɨa pe. Yepe tëi täta piporara parawete, erëi jesewe pemɨawäta wɨte opaete.

³³ Echa’ä amo pe ïru wae reta uyemɨngeta kachi pekotɨ opaete wae jowake jare uiporaraka pewe wi. Jare amo pe ïru wae reta uiporara yureko wi jokua nunga. Jare pe reta piñemɨïru piko wi jokua uiporara wae reta ndiwe jare pemborɨ reta wi.

³⁴ Jare jae reta uiporara yawe peresorɨru pe, pe reta pepɨatɨtɨ piko jae reta ndiwe. Jare ïru wae reta upɨ̈ro pewi yawe pembaembae, piporara wi piko piyerowia katu rewe. Echa’ä pikuaa piko ara pe ime penoi mbaembae ikawiete wae jare opa mbae wae ko.

³⁵ Jáeramo jekuaeño piyeko kawi Tumpa re, echa’ä jokua re jae jeta umɨñatimata oï pewe kuri.

³⁶ Ikawi ko jekuaeño piyeko waerä jese pepɨawasu rewe. Echa’ä opa ma piyapo yawe jae uipota wae, penoita opaete mbaembae ikawi wae Tumpa jei umeeta oï pewe wae.

³⁷ Echa’ä Tumpa jei yandewe iñeerɨru pe kuärái: “Koiñoete ma oï Upuruepɨ wae ou waerä. Ɨma’ä ma oï.

³⁸ Jare ipotawe kía wɨrowia jese wae, che amaeta jese jeko mbae wae rami, jare jae uyekouta oï tekowe ipɨau wae re. Erëi ime yawe kía uyerowa chuwi wae, che ndarau ayerowia amae jese.” Jukuärái Tumpa jei iñeerɨru pe.

³⁹ Erëi yande reta jae’ä ko jokua Cristo wi uyerowa ye wae reta. Chupe reta Tumpa uiporarakata oï jaeño mái pewa. Erëi yande yarowia ko jese añetete rewe, jare jukuärái ñanoi tekowe opa mbae wae.