Hebreos 1 - Biblia

Tumpa uyemɨngeta Taɨ rupi

¹ Yande judío retarä yaiko wae, arakaete rupi yandeRu Tumpa uyemɨngetase jae iñee umɨmbeu wae reta rupi yanderamɨkue reta pe. Jeta wese jare opa kërái rái rupi uyemɨngetase chupe reta.

² Erëi añawe kua ara reta pe Tumpa uyemɨngeta ma yandewe Taɨ rupi – jae ko umbɨjee opaete mbaembae iYarä wae. Jare kua Taɨ rupi Tumpa umbɨyekuaa opaete mbaembae ime ñonoï wae.

³ Jare Taɨ iñee imbaepuerete wae rupi opaete jokua mbaembae jekuaeño ime ñonoï. Taɨ rupi uyekuaa Tumpa imbaepuere jembipete ye wae jare kërái etei ko Tumpa wae. Taɨ etei ou kua ɨwɨ pe umano waerä mbaembae yayawɨ Tumpa kotɨ wae re opa umbái waerä yandewi. Joko wi jae ikowe ye ou umanokue wae reta ipɨte wi, jare oo ye ara pe uwapɨ Tumpa iyakata kotɨ kiape onoi mbaepuere Tumpa ndiwe opaete mbaembae re.

Tumpa Taɨ ikawiete ye araɨwa reta wi

⁴ Jukuärái kua uyapo wae rupi Tumpa Taɨ uyapɨraa opaete araɨwa reta. Jare uñemee chupe imbaepuerete waerä opaete araɨwa reta wi.

⁵ Echa’ä Tumpa mbae jei Taɨ pe wae, jokua nunga jei’ä pëti awe araɨwa pe. Echa’ä jae jei Taɨ pe kuärái: “Nde ko jae cheRaɨ. Kua ara etei aikuaaka aï opaete wae pe che ko jae ndeRu.” Jae nunga wi Tumpa jei Taɨ rewa kuärái: “Che aikota chupe Tuurä jare jae ikota cheRaɨrä.” Jukuärái Tumpa jei Taɨ rewa. Erëi jokua jei’ä pëti awe araɨwa pe.

⁶ Taɨ ko jae opaete mbaembae iYa. Jare Tumpa ombou yawe kua ɨwɨ pe, jei: “Opaete araɨwa reta chewe uyeyokui wae tumbutuicha kua cheRaɨ jee,” jei.

⁷ Jokua araɨwa reta rewa Tumpa jei kuärái: “Che ayapo araɨwa reta iñäkuaete ɨwɨtu rami. Jae reta jatangätuete uyeyokui waerä chewe tata jatangätu oï wae rami,” jei.

⁸ Erëi Tumpa jei Taɨ pe kuärái: “Nde ko jae Tumpa etei, jare nembaepuere mburuwicha wasu pewa ndarau etei opa. Jekuaeño ndiyapota jupi wae rupi.

⁹ Nde ndiyerowia neï jupi wae re jare niñamɨtäa mbae ikawi mbae wae. Jáeramo che, ndeTumpa, ayapo ndewe mbae ikawiete wae opaete nde ndiwe ñonoï wae reta jowake. Echa’ä ayerowia rewe nduparawo nde ndiko waerä mburuwicha wasurä jaeño mái pewa,” jei.

¹⁰ Jare Tumpa jei wi Taɨ pe kuärái: “Nde ko jae opaete mbaembae iYa. Nde ko jae iyɨpɨ wiwe ndiyapo ɨwɨ wae. Jare opaete mbaembae ara re oï wae, nde nderembiapo ko.

¹¹ Opaete jokua reta opata ko, erëi nde ndikota jaeño mái pewa. Opaete jokua reta indechita temimonde opa indechi wae rami.

¹² Jare kërái kía temimonde indechikue umbɨyapa omombo wae rami, jare joko wi omonde temimonde ipɨau wae, jukuärái wi nde ndiyapota uyeyapo waerä opaete mbaembae ara re oï wae pe. Erëi nde ndarau etei ndiyembɨambɨe. Nde jaeño mái pewa ndikota.” Jukuärái Tumpa jei Taɨ pe.

¹³ Jare jei wi chupe kuärái: “Ewapɨ kua cheakata kotɨ, nderowaicho reta opa añonoka rewa itawa re nderowai.” Jukuärái jei Tumpa. Erëi jokua jei’ä pëti awe araɨwa pe.

¹⁴ Echa’ä araɨwa reta ko jae Tumpa pe uyeyokui wae retaño. Tumpa ombou ma araɨwa reta omborɨ waerä tekowe opa mbae wae onoita wae reta.