Génesis 7 - Biblia

Tumpa ombou ɨporu wasu

¹ Joko wi Tumpa jei Noé pe: “Eyu ike nde jare opaete nerëtara reta chalana wasu japɨpe,” jei. “Aecha jaeño nde ko jupi cherowai opaete ïru wae reta ipɨte wi,” jei.

² “Opaete mbaemɨmba reta ambɨe ye ye che jae ikɨa mbae wae reta ipɨte wi eraa eruike nde ndiwe chiu mɨmba kuimbae reta jare chiu mɨmba kuña reta. Jare opaete mbaemɨmba reta ambɨe ye ye che jae ikɨa wae reta ipɨte wi eraa eruike mokui mokui rupi, pëti mɨmba kuimbae jare pëti mɨmba kuña,” jei Tumpa Noé pe.

³ “Jae ramiño wi opaete wɨra reta ambɨe ye ye wae ipɨte wi iparawo chiu wɨra kuimbae reta jare chiu wɨra kuña reta, jukuärái uñemoña ye waerä pëti pëti ambɨe ye ye wae reta ɨwɨ pe.

⁴ Echa’ä kua wi chiu ara pe amongɨta ɨwɨ re cuarenta ara jare cuarenta pɨ̈tu rupi. Jare che ambaita ɨwɨ wi opaete ipütúe wae reta ayapo wae,” jei Tumpa Noé pe.

⁵ Jayawe Noé uyapo opaete Tumpa jei chupe wae rupi.

⁶ Noé ime wɨreko 600 año Tumpa ombou yawe ɨporu wasu ɨwɨ pe.

⁷ Jare ɨporu wasu outa wae jeko pewa Noé uike chalana wasu pe jembireko ndiwe jare taɨ reta pëti pëti jembireko ndiwe.

⁸ Jare jae reta ndiwe uike wi opaete mbaemɨmba ambɨe ye ye Tumpa jei ikɨa mbae wae reta ipɨte wi, jare ambɨe ye ye mbaemɨmba Tumpa jei ikɨa wae reta ipɨte wi, jare opaete wɨra reta ipɨte wi, jare opaete ɨwɨ rupi uyewichɨ wae reta ipɨte wi.

⁹ Jae reta yuweru uike chalana wasu pe pëti ara peño mokui mokui rupi, mɨmba kuimbae jare mɨmba kuña, kërái Tumpa jei rami.

¹⁰ Joko wi ou uwäe yawe chiu ara, Tumpa ombou ɨporu wasu ɨwɨ re.

¹¹ Jukuärái yasɨ mokui jare ara diecisiete pe, Noé ime wɨreko 600 año yawe, jokua ara etei ɨwɨ osoro jare ɨ ɨwɨwɨ pe oï wae oë tuicha ɨwɨ wi. Jare okɨ wi tuicha ara wi.

¹² Okɨ tuicha ɨwɨ re cuarenta ara jare cuarenta pɨ̈tu rupi.

¹³ Jáeramo jokua ara etei Noé uike chalana wasu japɨpe jembireko ndiwe, jare taɨ reta Sem, Cam, jare Jafet, jare pëti pëti jembireko ndiwe.

¹⁴ Jae reta ndiwe uike wi opaete mbaemɨmba ambɨe ye ye tëta rupiwa reta wi jare ñana rupiwa reta wi, jare opaete ambɨe ye ye ɨwɨ rupi uyewichɨ wae reta wi, jare opaete wɨra ambɨe ye ye wae reta jare uwewe wae reta wi.

¹⁵ Mokui mokui rupi opaete ipütúe wae reta wi yuweru chalana wasu kotɨ Noé oï wae pe.

¹⁶ Uike reta mɨmba kuimbae jare mɨmba kuña kërái Tumpa jei rami. Jare jokua ara etei Tumpa uyukenda chalana wasu jöke.

¹⁷ Joko wi ama okɨ tuichaete ɨwɨ re cuarenta ara. Jare ɨ umbɨpɨ ukuakuaa tuicha jare uyeupi chalana wasu ɨ ndiwe ɨwate kotɨ ɨwɨ wi.

¹⁸ Jeiete ukuakuaa ɨporu wasu ɨwɨ re, erëi chalana wasu uwewi kawi ɨ iáramo.

¹⁹ Jare ɨporu wasu jeieteño ukuakuaa ɨwɨ re jare opa umbɨyasoi opaete ɨwɨtu wasu reta.

²⁰ Jare ɨwɨtu wasu ɨwatete wae reta uyapɨraa ye chiu metro rupi ukuakuaa jokua ɨ.

²¹ Jayawe opa iputupa umano opaetei jekowe wae reta ɨwɨ rupiwa. Opaete wɨra reta, jare opaete mbaemɨmba tëta rupiwa reta jare ñana rupiwa reta, jare opaete ɨwɨ rupi uyewichɨ wae reta, jare opaete kuimbae reta jare kuña reta jare sambiaɨ reta wi opa iputupa umano.

²² Opaete ipütúe wae ɨwɨ rupiwa reta opa umano.

²³ Jukuärái Tumpa opa umbái opaete ɨwɨ pewa reta – jae ko kuimbae jare kuña reta, mbaemɨmba reta, wɨra reta, jare ɨwɨ rupi uyewichɨ wae reta. Opaetei Tumpa opa umbái. Jaeño upɨta jekowe rewe Noé jare opaete jae ndiwe chalana wasu pe ñonoï wae reta.

²⁴ Jare 150 ara rupi imeño ɨ tuicha ɨwɨ re.