Génesis 5 - Biblia

Adán iñemoñaa reta

^1-2 Tumpa jaeramo uyapo yawe kuimbae, Tumpa echa rami uyapo. Tumpa uyapo kuimbae jare kuña, jare uyapo ikawi wae chupe reta iñee rupi. Jare jokua ara uyapo reta yawe, Tumpa jei chupe reta: “Pe reta ko jae piko waerä kua ɨwɨ pe,” jei chupe reta. Kua jae Adán iñemoñaa pewa tee reta:

³ Adán 130 año wɨreko yawe, pëti taɨ oa jae echa rami. Jare umbɨjee Set.

⁴ Joko wi Set oa wiwe, Adán iko ïru 800 año ye. Oa wi Adán pe ïru taɨ reta jare tayɨ reta.

⁵ Jayawe Adán ime wɨreko 930 año yawe, umano.

⁶ Set 105 año wɨreko yawe, oa jae taɨ Enós.

⁷ Joko wi Enós oa wiwe, Set iko ïru 807 año ye. Oa wi Set pe ïru taɨ reta jare tayɨ reta.

⁸ Jayawe Set ime wɨreko 912 año yawe, umano.

⁹ Enós 90 año wɨreko yawe, oa jae taɨ Cainán.

¹⁰ Joko wi Cainán oa wiwe, Enós iko ïru 815 año ye. Oa wi Enós pe ïru taɨ reta jare tayɨ reta.

¹¹ Jayawe Enós ime wɨreko 905 año yawe, umano.

¹² Cainán 70 año wɨreko yawe, oa jae taɨ Mahalaleel.

¹³ Joko wi Mahalaleel oa wiwe, Cainán iko ïru 840 año ye. Oa wi Cainán pe ïru taɨ reta jare tayɨ reta.

¹⁴ Jayawe Cainán ime wɨreko 910 año yawe, umano.

¹⁵ Mahalaleel 65 año wɨreko yawe, oa jae taɨ Jared.

¹⁶ Joko wi Jared oa wiwe, Mahalaleel iko ïru 830 año ye. Oa wi Mahalaleel pe ïru taɨ reta jare tayɨ reta.

¹⁷ Jayawe Mahalaleel ime wɨreko 895 año yawe, umano.

¹⁸ Jared 162 año wɨreko yawe, oa jae taɨ Enoc.

¹⁹ Joko wi Enoc oa wiwe, Jared iko ïru 800 año ye. Oa wi Jared pe ïru taɨ reta jare tayɨ reta.

²⁰ Jayawe Jared ime wɨreko 962 año yawe, umano.

²¹ Enoc 65 año wɨreko yawe, oa jae taɨ Matusalén.

²² Joko wi Matusalén oa wiwe, Enoc imeño uñemɨïru Tumpa ndiwe ïru 300 año ye, jare oa wi Enoc pe ïru taɨ reta jare tayɨ reta.

²³ Jayawe Enoc iko 365 año rupi.

²⁴ Enoc uñemɨïru kawiñoi Tumpa ndiwe. Erëi pëti ara aramoiño uyekuaa’ä ma, echa’ä Tumpa wɨraa ɨwɨ wi jekowe rewe ramo.

²⁵ Matusalén 187 año wɨreko yawe, oa jae taɨ Lamec.

²⁶ Joko wi Lamec oa wiwe, Matusalén iko ïru 782 año ye, jare oa wi Matusalén pe ïru taɨ reta jare tayɨ reta.

²⁷ Jayawe Matusalén ime wɨreko 969 año yawe, umano.

²⁸ Lamec 182 año wɨreko yawe, oa Lamec taɨ.

²⁹ Jare umbɨjee Noé, echa’ä jei: “Tumpa uyepɨpeyu kua ɨwɨ re; jáeramo yaparawɨkɨta ko täta ime waerä yanderembiurä. Erëi kua ko jae yanembuputuuta yandeparawɨkɨ täta wi,” jei.

³⁰ Joko wi Noé oa wiwe, Lamec iko ïru 595 año ye, jare oa wi Lamec pe ïru taɨ reta jare tayɨ reta.

³¹ Jayawe Lamec ime wɨreko 777 año yawe, umano.

³² Noé ime wɨreko yawe 500 año rupi, ime wɨreko mbapɨ taɨ reta: Sem, Cam, jare Jafet jee wae reta.