Génesis 46 - Biblia

Jacob uyakao ɨwɨ Egipto pe

¹ Jacob jare jëtara reta uyapɨkatu opaete imbaembae reta jare oë yuraa reta ɨwɨ Egipto kotɨ. Uwata reta rambuewe, yuraa uwäe reta tëta wasu Beerseba jee wae pe. Joko pe Jacob uyapo pëti mbaerenda ita pewa, jare uyuka mbaemɨmba oñono iáramo uapɨ umee waerä Tumpa pe – jae ko tu Isaac iTumpa wi.

² Jokua pɨ̈tu Tumpa uyekuaa Jacob pe jare jei chupe: “Jacob.” Jare Jacob jei: “¿Mbae pa, cheYa?” jei chupe.

³ Jayawe Tumpa jei Jacob pe: “Che ko jae Tumpa. Nderu Isaac iTumpa ko che. Awɨye ekɨye ndeo waerä ɨwɨ Egipto pe, echa’ä nde rupi joko pe ayapota aï jeta niñemoñaa reta,” jei chupe.

⁴ “Che numɨïruta ɨwɨ Egipto pe, jare joko pe nderaɨ José ikota nde ndiwe nemano rewa. Erëi anoe yeta aru ye aï niñemoñaa reta kua ɨwɨ Canaán pe,” jei Tumpa Jacob pe.

⁵ Pɨarewe pe Jacob taɨ reta wɨraa opaete isambiaɨ reta jare ikuña reta tu ndiwe karosa reta pe mburuwicha wasu ɨwɨ Egipto pewa omondoka chupe wae pɨpe, jare oë yuraa reta tëta wasu Beerseba wi ɨwɨ Egipto kotɨ.

⁶ Wɨraa reta wi opaete jɨmba reta jare opaete imbaembae reta owakue ɨwɨ Canaán pe wae. Jayawe Jacob jare opaete jëtara reta yuraa uwäe reta ɨwɨ Egipto pe.

⁷ Jukuärái Jacob taɨ reta, jare tayɨ reta, jare opaete jumɨmino reta yuraa uwäe reta Jacob ndiwe ɨwɨ Egipto pe.