Génesis 39 - Biblia

José jare Potifar jembireko rewa

¹ Jokua Ismael iñemoñaa reta wɨraa uruwäe yawe José ɨwɨ Egipto pe, mburuwicha wasu isɨndaro reta itenondewa, Potifar jee wae, owa yuapɨ ye chuwi reta uyeyokui chupe waerä.

² Erëi Tumpa iko José ndiwe jare omborɨ. Jáeramo opaete José iparawɨkɨ uyapo iya jëta pe wae ikawiete.

³ Ɨmambaeño iya uecha kërái Tumpa iko José ndiwe, jare kërái opaete José uyapo wae ikawiete ko, echa’ä Tumpa omborɨ iko José ramo.

⁴ Jáeramo Potifar uyerowia umae José re. Jayawe oñono José iko waerä imborɨarä, jare jukuärái oñono ipo pe opaete imbaembae jëta pe oï wae.

⁵ Jokua ara wiwe Tumpa umbɨpɨ umbɨyekou kawi opaete Potifar imbaembae reta José jeko pewa. Opaete mbarawɨkɨ reta Potifar jëta rupi oï wae ikawiete iko. Jare iko reta pe yawɨye kawiete temitɨ reta, jare jɨmba reta uñemoña kawiete wi.

^6-7 Potifar uikuaa José uyandareko kawi opaete imbaembae reta re. Jáeramo uyembɨpɨa’ä mbae re awe, jaeño mbae nunga tembiu jouta oï wae re. Erëi jae jembireko uecha José taurusuete jare maepöra. Jáeramo ipɨa pe uipotaete umae jese. Jayawe pëti ara jae jei José pe: “Eke che ndiwe,” jei chupe.

⁸ Erëi José jei kuña pe: “¡Aipota’ä!” jei. “Mase, cheya uyembɨpɨa’ä mbae re awe, echa’ä oñono chepo pe opaete imbaembae reta,” jei.

⁹ “Cheya umee chewe mbaepuere opaete ïru uyeyokui chupe wae reta re jare opaetei imbaembae reta re. Umbɨete’ä chewe mbae awe – jaeño nde, echa’ä nde ko jae jembireko ramo. Aipota’ä etei ayapo kua mbae kachi wae, echa’ä kua mbae kachi wae rupi ayawɨta Tumpa kotɨ etei,” jei José kuña pe.

¹⁰ Jare opa ara rupi kuña jekuaeño jei chupe: “Eke che ndiwe,” jei. Erëi José uyapɨsaka’ä jese jare uipota’ä etei iko jae ndiwe.

¹¹ Pëti ara, mbaetɨ ïru uyeyokui wae reta ñonoï iya jëta pe rambuewe, José uike oo pe uyapo waerä iparawɨkɨ. Jaeño iya jembireko oï jëta pe.

¹² Jayawe kuña ou uipɨsɨ José jemimonde wi, jare jei ye chupe: “Eke che ndiwe,” jei. Erëi José uipota’ä. Jare kuña uipɨsɨ jare opoi’ä José jemimonde wi. Jáeramo José ueya jemimonde kuña ipo pe jare oë osi oo oka pe chuwi.

^13-14 Jayawe kuña uecha yawe José osi oë oo chuwi oka kotɨ jare ueya jemimonde ipo pe wae, ueni ïru ime pe uyeyokui wae reta jare jei chupe reta: “¡Mase! Cheme ueru yandewe pëti kuimbae hebreo ambɨe ɨwɨ pewa, erëi jae yandeyoyai oï,” jei. “Jae uike ou che aï wae pe, jare uipota tëi chepɨsɨ. Erëi che täta cheräse,” jei.

¹⁵ “Jare cheräse yawe, jae ukɨye jare oë osi kua wi oka pe,” jei. “Mase, kua pe ueya jemimonde cheyɨpɨ pe,” jei chupe reta.

^16-17 Jayawe kuña uyandareko José jemimonde re ime ou ye rewa. Jare ime ou uwäe jëta pe yawe, jembireko imiäri chupe ïru wae reta pe imiäri rami kuärái: “Jokua hebreo uyeyokui ndewe wae nderu ñanerëta pe wae uike ou che aï wae pe jare uipota chepɨsɨ,” jei.

¹⁸ “Erëi che täta cheräse yawe, jae oë osi kua wi oka pe jare ueya kua pe jemimonde.” Jukuärái imiäri ime pe.

¹⁹ Jayawe José iya uyandu yawe jembireko jei chupe wae opaete kua teko rewa, pochɨete José kotɨ.

²⁰ Jáeramo uipɨsɨka José jare oñonoka woi peresorɨru pe, mburuwicha wasu ipereso reta ñonoï wae pe. Jukuärái peresorɨru pe iko José.

²¹ Erëi Tumpa jekuaeño iko José ndiwe jare ipɨakawi chupe. Jáeramo uyapo peresorɨru iyandarekoa umae kawi waerä jese.

²² Jáeramo peresorɨru iyandarekoa umee José pe uyandareko waerä opaete peresorɨru pe ñonoï wae reta re.

²³ Joko wiwe peresorɨru iyandarekoa uyembɨpɨa’ä mbae re awe peresorɨru pe, echa’ä Tumpa omborɨ José uyandareko kawi waerä opaete re. Tumpa iko jae ndiwe; jáeramo opaete José uyapo wae ikawiete ko.