Génesis 25 - Biblia

Jacob jare Esaú oa ichɨ wi

¹⁹ Kua ko Abraham taɨ Isaac iñemoñaa reta rewa:

²⁰ Isaac ime wɨreko cuarenta año yawe, umenda Rebeca ndiwe. Rebeca tu jae ko Betuel jee wae, jare ikɨwɨ jae ko Labán jee wae. Jae reta arameo reta ko jare yureko ɨwɨ Padan-aram jee wae pe.

²¹ Erëi Rebeca mbaetɨ imembɨ, echa’ä ipuere’ä imembɨ ramo. Jáeramo Isaac uyerure täta rupi Tumpa pe jembireko re. Jayawe Tumpa umee chupe jae uyerure wae rupi jare Rebeca ipurúa chowakiri reta.

²² Erëi Rebeca ipɨatɨtɨ, echa’ä uyandu jɨe pe chowakiri raɨ reta omɨ pɨi uñeräro echa rami ñonoï. Jayawe oo upɨrandu Tumpa pe jokua rewa, jare jei chupe: “¿Marái pa ko aipo kua uasa oï chewe?” jei.

²³ Jáeramo Tumpa jei chupe: “Nderɨe pe oï chowakiri raɨ reta,” jei. “Jare oa reta yawe, uyeyapota mokui tëta wasu iko tee wae iyɨpɨrä,” jei. “Pëti wae imbaepuereteta ïru wae wi. Jare pëti ara nemembɨ tenondewa uyeyokuita oï taɨkuewa pe,” jei Tumpa Rebeca pe.

²⁴ Jare ara uwäe yawe Rebeca imembɨ oa waerä, oa sambiaɨ chowakiri reta.

²⁵ Tenondewa oa wae ipire pɨ̈tawe jare jawukuete ko. Jáeramo umbɨjee reta Esaú.

²⁶ Jaɨkue rupi oa tɨwɨ, jare uyepɨsɨ iko tɨkeɨ ipɨ̈tasa re. Jáeramo umbɨjee reta Jacob. Isaac ime wɨreko sesenta año yawe, oa taɨ chowakiri reta.

Esaú umee iyuwi taɨrɨpɨyekou

²⁷ Tuicha ma reta yawe, Esaú jewaerekaa ikatuete wae ko, jare ikɨrëɨñoi uwata ñana rupi wae. Erëi Jacob iko kunumi ipɨawiwe wae, jare ikɨrëɨñoi iko tëta rupiño.

²⁸ Isaac uauete Esaú, echa’ä uyuete jembia Esaú ueru chupe ramo. Erëi Rebeca uauete Jacob.

²⁹ Pëti ara Esaú ou ye jëta pe uyembiureka wae wi jare uecha Jacob uyapo oï kandu. Esaú ikandɨ jare ipɨräta’ä iyembaɨete iko ramo.

³⁰ Jayawe jei Jacob pe: “¡Cherowaruru pota aï! Emee mii tau jokua kandu pɨ̈ta ndiyapo wae,” jei chupe. Jáeramo Esaú jee ïru wae ko Edom.

³¹ Erëi Jacob jei chupe: “Tenonde emee rani chewe taɨrɨpɨyekou nenoi wae. Jayawe ramo chepuere amee ndewe ndeu waerä,” jei chupe.

³² Jayawe Esaú jei chupe: “Mase, cherowaruru pota aï. Mbae’ä ko taɨrɨpɨyekou pewa chewe amano ma yawe,” jei chupe.

³³ Jare Jacob jei ye chupe: “Ere chewe añawe woi Tumpa jowake iko waerä chemaerä,” jei. Jayawe Esaú jei Tumpa jowake umee ma Jacob pe taɨrɨpɨyekou.

³⁴ Jayawe ramo Jacob umee jou Esaú mbɨyape jare kandu kumanda raɨ pewa. Joko wi Esaú opa ma ukaru yawe, upüa oo ye. Jukuärái Esaú uipɨu mbae rewe umee iyuwi opaete taɨrɨpɨyekou.