Génesis 22 - Biblia

Tumpa jei Abraham pe uyuka umee chupe waerä taɨ

¹ Isaac taurusu ma yawe, Tumpa uipota omboporowa Abraham añetete ra wɨrowia katu jese wae. Jayawe pëti ara Tumpa ueni Abraham. Jare Abraham jei chupe: “¿Mbae pa, cheYa?” jei.

² Jare Tumpa jei chupe: “Eraa Isaac, nderaɨ jae waeño ndeauete wae, jare ekua jae ndiwe ɨwɨ Moriah jee wae kotɨ,” jei. “Jare ndeo newäe yawe pëti ɨwɨtu wasu aikuaakata aï ndewe wae pe, joko pe iyuka nderaɨ. Jare eapɨ jetekue pëti mbaerenda ita pewa re nemee waerä chewe nderaɨ,” jei Tumpa Abraham pe.

³ Jayawe pɨarewe pe ndimboweasɨ, Abraham upüa jare oyokua imburika. Jare uyapo yepea wɨraa uapɨ waerä taɨ Isaac jetekue umee waerä Tumpa pe. Jare umbɨwɨta imburika yepea pɨpe yawe, wɨraa taɨ Isaac jare mokui ipione taurusu wae reta jae ndiwe, jare opa rewe yuraa jokua ɨwɨ Tumpa jei chupe wae kotɨ.

⁴ Mbapɨ ara rupi ma uwata reta yawe, Abraham umae jare uecha mbɨrɨ oï jokua ɨwɨtu wasu Tumpa jei uikuaakata iko chupe wae.

⁵ Jayawe Abraham jei ipione reta pe: “Pepɨta kua pe mburika ndiwe. Che jare taurusu wae ndoota pea pe Tumpa jee numbutuicha waerä. Joko wi ore nuñatima yeta noï kuri,” jei chupe reta.

^6-7 Jayawe Abraham umee taɨ Isaac pe jokua yepea wɨraa waerä iyatiɨ re. Jare Abraham wɨraa ipo pe kɨse jare tatasɨwe mbae jɨru pe. Joko wi, mokui rewe yuraa rambuewe, Isaac jei tu pe: “Cheru,” jei. Jare Abraham jei chupe: “¿Mbae pa, cheraɨ?” jei. Jare Isaac upɨrandu tu pe: “Ime ma ñanoi tata jare yepea, erëi ¿kiape pa oï owecha raɨ yayukata wae yapɨ ñamee waerä Tumpa pe wae?” jei.

⁸ Jayawe Abraham jei chupe: “Tumpa etei ko umeeta yandewe owecha, cheraɨ mii,” jei chupe. Jare mokui rewe jekuaeño yuraa reta.

⁹ Jare yuraa uwäe reta yawe jokua ɨwɨtu wasu Tumpa uikuaaka chupe wae pe, joko pe Abraham uyapo pëti mbaerenda ita pewa jare oñono iáramo yepea. Jare Abraham uipokua taɨ Isaac jare oñono mbaerenda iáramo.

¹⁰ Jare ueki kɨse uyuka waerä tëi taɨ.

¹¹ Erëi aramoiño ara wi araɨwa Tumpa etei wae umɨngeta Abraham jare jei chupe: “¡Abraham, Abraham!” jei. Abraham jei chupe: “¿Mbae pa, cheYa?” jei.

¹² Jayawe Tumpa jei chupe: “¡Awɨye iyuka nderaɨ! Awɨye iyapo marái. Añawe aikuaa ma tuicha ko ndipɨu chewi wae, echa’ä mbaetɨ etei nembɨete nderaɨ jae waeño ndeauete wae ndiyuka nemee waerä chewe,” jei chupe.

¹³ Jayawe Abraham uyerowa umae jaɨkue kotɨ jare uecha pëti owecha kuimbae upäa iko jäti rupi ñana tëɨ wae ipɨte pe. Jayawe Abraham oyora taɨ. Jare oo uipɨsɨ ueru jokua owecha kuimbae jare oñono mbaerenda iáramo. Joko wi uyuka uapɨ umee waerä Tumpa pe taɨ Isaac ipepɨka pe.

¹⁴ Jáeramo Abraham umbɨjee jokua ɨwɨ, “Tumpa umeeta mbae uata wae.” Jare joko wiwe añawe rewa jeta jei reta: “Tumpa iɨwɨtu wasu re umeeta mbae uata wae,” jei reta.

^15-17 Jayawe araɨwa Tumpa etei wae ueni ye Abraham ara wi jare jei chupe: “Nde ndiyapo ma che jae wae rupi,” jei chupe. “Nde mbaetɨ etei nembɨete nderaɨ jae waeño ndeauete wae ndiyuka nemee waerä chewe. Jáeramo che etei tae ndewe, tayapo ikawi wae ndewe chiñee rupi,” jei. “Ambɨjetaeteta niñemoñaa reta yasɨtata reta jeta ye ye wae rami, jare ɨwɨkuïti mar jembeɨ rupi oï wae rami. Jare niñemoñaa reta umɨamɨrita opaete jowaicho reta wi,” jei.

¹⁸ “Niñemoñaa rupi opaete ɨwɨ pewa reta uyekouta, echa’ä nde ndiyapo che jae wae rupi ramo,” jei Tumpa Abraham pe.

¹⁹ Joko wi Abraham taɨ Isaac ndiwe yuweru ye Abraham ipione reta ñonoï wae pe, jare opa rewe uñatima reta yewɨ tëta wasu Beerseba pe. Joko pe upɨta yureko reta Abraham jare jëtara reta.