Génesis 21 - Biblia

Isaac oa

¹ Joko wi, pëti año ma uasa yawe, Tumpa uyapo jae jei wae rupi Sara pe.

² Yepe tëi Abraham indechi ma iko, jesewe jembireko Sara ipurúa jare oa imembɨ kuimbae kërái Tumpa jei chupe wae rupi.

³ Jare Abraham umbɨjee taɨ Isaac.

⁴ Juri ara ma Isaac oa wiwe, Abraham umbɨcircuncida taɨ Isaac kërái Tumpa jei chupe wae rupi.

⁵ Isaac oa yawe, Abraham ime wɨreko pëti chiëto año.

⁶ Jayawe Sara jei: “¡Tumpa chembupukaka ma yerowia rewe! Jare upukata wi che ndiwe opaete kía uyandu kua rewa wae,” jei.

⁷ Jare Sara jei wi: “Yepe tëi opaete wae jei reta Abraham indechiete ma jare ndarau echa ipuere umee chewe chemembɨrä, erëi jesewe ambɨkambu aï chemembɨ kuimbae etei,” jei.

⁸ Jayawe Isaac tuicha ma yawe, ichɨ umbɨkambupoi. Jayawe Abraham uyapo arete yerowia pewa, echa’ä Isaac ukambupoi ramo.

⁹ Erëi Sara uecha Agar imembɨ Ismael oyoyai iko Isaac.

¹⁰ Jáeramo jei Abraham pe: “¡Emombo jokua kuña täta uyeyokui wae imembɨ ndiwe! Echa’ä jae imembɨ mbaetɨta uyekou nembaembae re chemembɨ Isaac ndiwe,” jei chupe.