Génesis 16 - Biblia

Agar jare imembɨ Ismael jee wae

¹ Abram jembireko Sarai imeño imembɨ mbae iko. Jare Sarai ime wɨreko pëti kuña uyeyokui chupe wae Egipto pe owa iyupe wae, Agar jee wae.

² Jayawe pëti ara Sarai jei Abram pe: “Ndecha ma kërái Tumpa chapo chemembɨ mbae waerä. Jayawe ayerure ndewe ndeke waerä Agar ndiwe. Aramoi jae rupi anoita chemembɨ retarä,” jei chupe. Jare jokua Sarai jei wae jaekawi Abram pewarä.

³ Jayawe Abram jembireko Sarai ueru chupe Agar jare umee ime pe jembirekorä. Kua uasa payandepo año ma Abram iko yawe ɨwɨ Canaán pe.

⁴ Jayawe Abram iko Agar ndiwe Agar ipurúa rewa. Jare Agar uikuaa ipurúa ma yawe, uipɨu’ä ma iya Sarai wi.

⁵ Jáeramo Sarai jei Abram pe: “¡Jupi’ä ko kua!” jei. “Mase, che etei amee ndewe Agar nembirekorä. Erëi añawe jae uikuaa ipurúa ma oï ramo, uipɨu’ä ma chewi. ¡Jare nemaeño kua uasa waerä! ¡Ndereko pewa ko kua ikawi mbae wae oï chekotɨ! Tumpa tuikuaaka yandewe kía ra ime onoi teko – nde ra ani che ra,” jei ime pe.

⁶ Jare Abram jei Sarai pe: “Jaekawi,” jei. “Ime nenoi mbaepuere jese yewɨ. Jáeramo ndepuere ndiyapo nde ndere wae rupi,” jei chupe. Jayawe Sarai umbɨpɨ uyuwanga jese. Jáeramo iko kawi’ä yawe jae ndiwe, Agar osi iya kuña Sarai wi.

⁷ Joko wi Agar oo uwäe pëti ɨkua, tape tëta wasu Shur jee wae kotɨ oo wae iyɨpɨ pe. Jare joko pe araɨwa Tumpa etei wae uyekuaa chupe.

⁸ Jare jae upɨrandu Agar pe: “Agar, Sarai pe ndiyeyokui wae, ¿kiawi pa ndeyu neï, jare ketɨ pa ndeo neï?” jei chupe. Jare Agar jei chupe: “Asi aï cheya Sarai wi,” jei.

⁹ Jayawe araɨwa Tumpa etei wae jei chupe: “Iñatima yewɨ ndeya Sarai kotɨ jare iyapo jae jei ndewe wae rupi,” jei.

¹⁰ “Ameeta ndewe jetaete niñemoñaa retarä. Ndarau ndepuere opa ndipapa opaete, echa’ä jetaete yeta ko ramo,” jei.

¹¹ “Añawe ndepurúa neï jare oata nemembɨ kuimbae. Nembɨjeeta Ismael, echa’ä Tumpa uyandu ma tuicha ndepɨatɨtɨ rewe ndiyao wae,” jei.

¹² “Ismael ikota kuimbae ñana rupiwa echa. Mbaetɨta kiawe onoi mbaepuere jese wae. Jae pochɨ raita jare jowaichopotata opaete wae ndiwe. Jae jëtara reta ndiwe wi oyowaichota,” jei chupe.

¹³ Jare Tumpa opa uyemɨngeta Agar ndiwe yawe, Agar uyemɨngeta ipɨa pe: “Yepe tëi aecha ma Tumpa cherecha wae, jesewe imeño aiko tekowe pe,” jei. Jáeramo Agar umbɨjee jae ndiwe uyemɨngeta wae: “Nde ko jae Tumpa cherecha wae.”

¹⁴ Jáeramo joko wiwe jokua ɨkua jee ko: “Tekowe onoi wae jare cherecha wae iɨkua.” Jokua ɨkua oï tëta wasu Cades jee wae jare ɨwɨ Bered jee wae ipäu pe.

¹⁵ Jayawe Agar uñatima ye iya Sarai kotɨ. Joko wi oa Agar imembɨ kuimbae, jare tu Abram umbɨjee Ismael.

¹⁶ Abram ime wɨreko ochenta y seis año yawe, oa taɨ Ismael.