Génesis 13 - Biblia

Abram jare Lot usɨrɨ iyuwi

¹ Jayawe Abram jare jembireko jare opaete imbaembae rewe yuweru ye ɨwɨ Egipto wi ɨwɨ Neguev kotɨ. Jare Lot ou wi jae reta ndiwe.

² Abram uyeyapo ma kuimbae ikokatuete wae. Ime wɨreko jeta mbaemɨmba reta, jeta korepoti tïi wae, jare jeta oro.

³ Joko wi jae reta yuraa ndewe ndewe rupi uwäe reta rewa tenonde ikose wae pe, tëta wasu raɨ Betel jee wae jare tëta wasu raɨ Hai jee wae ipäu pe.

⁴ Jare jokua mbaerenda Abram uyapo tenonde wae, joko pe Abram umbutuicha ye Tumpa jee.

⁵ Abram jiɨ Lot ime wɨreko wi jeta owecha reta jare waka reta, jare jëtara reta jare chupe uyeyokui wae reta.

⁶ Erëi uepitɨ'ä kapii jokua ɨwɨ pe Abram jare Lot jɨmba reta jou waerä, echa’ä jeta ko jɨmba reta ramo. Jayawe ipuere’ä ma yureko päwe.

⁷ Jare wi jokua año reta rupi kuimbae cananeo reta jare kuimbae ferezeo reta yurekose jokua ɨwɨ pe. Jáeramo uata Abram jare Lot imbaemɨmba reta pewarä kapii. Jayawe Abram jɨmba iyandarekoa reta umbɨpɨ uñeräro Lot jɨmba iyandarekoa reta ndiwe.

⁸ Jayawe Abram jei Lot pe: “Ñëtara ko yande. Jáeramo ikawi’ä ko ñañeräro waerä yande yepái jare uñeräro waerä cherɨmba iyandarekoa reta jare nderɨmba iyandarekoa reta ndiwe,” jei.

⁹ “Mase, emae. Ime oï tuichaete ɨwɨ. Iparawo jayawe ndeyupe kiape ndiko waerä. Nde ndeo yawe cheaso kotɨ, jayawe che ata cheakata kotɨ. Erëi nde ndeo yawe cheakata kotɨ, jayawe che ata cheaso kotɨ,” jei Abram jiɨ pe.

¹⁰ Jare Lot umae jare uecha ɨwɨ ipe tuicha wae ɨ wasu Jordán jee wae kotɨ tëta wasu raɨ Zoar jee wae pe rewa. Ikawiete ko jokua ɨwɨ, jare iñäkɨ ngatu ɨwɨ Egipto pe ɨ wasu jembeɨ rupi ɨwɨ oï wae rami. Jae uecha jokua mbaewɨyerenda Edén pe wae rami. Jukuärái iko ndei Tumpa opa umbái mbowe tëta wasu reta Sodoma jare Gomorra jee wae.

¹¹ Jáeramo Lot uiparawo iyupe jokua ɨwɨ ipe tuicha wae Jordán jee wae, jare oë oo warasɨ oë wae kotɨ jokua ɨwɨ pe. Jukuärái Abram jare Lot usɨrɨ iyuwi reta.

¹² Jayawe Abram upɨta ɨwɨ Canaán pe. Erëi Lot jare jëtara reta yuraa yureko waerä koiño tëta wasu ɨwɨ ipe tuicha wae rupiwa reta wi. Jare umbɨyemboɨ jëta wakapi pewa reta koiño tëta wasu Sodoma jee wae wi.

¹³ Jokua tëta wasu Sodoma pewa reta jeko kachiete jare jekuaeño uyawɨ reta tuicha rupi Tumpa kotɨ mbaembae kachi wae rupi.

¹⁴ Joko wi, Lot oo ma yawe Abram wi, Tumpa umɨngeta Abram jare jei chupe: “Emae kua wi opaetei ndeyɨpɨ rupi.

¹⁵ Opaete kua ɨwɨ ndecha wae ameeta ndewe jare niñemoñaa reta pe, jare jaeño mái pewa ikota pemaerä.

¹⁶ Tambɨjetaete niñemoñaa reta ɨwɨkuïti ɨwɨ pewa jeta ye ye wae rami. Mbaetɨta kía ipuere uipapa reta, echa’ä jetaeteta ko ramo.

¹⁷ Ekua, ewata opaete jokoropi ndikuaa waerä opaete ɨwɨ ameeta ndewe wae,” jei Tumpa Abram pe.

¹⁸ Jayawe Abram jare jëtara reta ndiwe yuraa jare wɨraa jëta wakapi pewa reta koiño tëta wasu raɨ Hebrón jee wae wi. Jare yureko ɨwɨrayapetururenda pe. Pëti kuimbae Mamre jee wae, jae ko jokua ɨwɨrarenda iya. Jare joko pe Abram uyapo ambɨe mbaerenda ita pewa Tumpa jee umbutuicha waerä.