Génesis 1 - Biblia

¹ Iyɨpɨ wiwe Tumpa uyapo ara jare ɨwɨ.

² Jare ɨwɨ mbaetɨ jenda jenda pe kawi iko jare ipo mbae iko. Ɨ opa oñowa ɨwɨ jare opaete pɨ̈tumimbiete. Jare Tumpa iEspíritu omɨ jokua ɨ iáramo rupi.

³ Jayawe Tumpa jei: “¡Tuiko tembipe!” jei. Jare iko tembipe.

⁴ Jare Tumpa uecha tembipe ikawiete ko. Jare umbɨsɨrɨ tembipe pɨ̈tumimbi wi.

⁵ Jare Tumpa umbɨjee jokua tembipe, “ara,” jare pɨ̈tumimbi, “pɨ̈tu.” Jare uasa yawe pɨ̈tu jare ara, pëti ara ma.

⁶ Joko wi Tumpa jei: “Tuiko pëti ipo mbae wae ɨ ipäu rupi umbɨsɨrɨ waerä ɨ,” jei.

⁷ Jare Tumpa uyapo jokua ipo mbae wae jare umbɨsɨrɨ ɨ mbɨte ɨwate kotɨ jare mbɨte ɨwɨ kotɨ. Jare ɨ ipäu rupi upɨta ipo mbae.

⁸ Jare Tumpa umbɨjee jokua ipo mbae “ara” – jae ko jokua ara ɨwate pewa. Jare uasa yawe pɨ̈tu jare ara, mokui ara ma.

⁹ Joko wi Tumpa jei: “Tuyembatɨ ɨ ara íɨwɨ rupi oï wae pëti wae peño, jare tuyekuaa ɨwɨ utini wae,” jei. Jayawe jukuärái iko.

¹⁰ Jare Tumpa umbɨjee jokua utini wae, “ɨwɨ,” jare ɨ yatɨ wae, “mar reta.” Jare Tumpa uecha jokua reta ikawiete ko.

¹¹ Jare Tumpa jei: “Ɨwɨ wi tijeñɨ kapii, jare ñana jowɨ umee ía wae, jare ɨwɨra reta umee ía wae,” jei. “Jare opaete pëti pëti tuñemoña reta ambɨe ye ye temitɨ rupii,” jei. Jayawe jukuärái iko.

¹² Jare ɨwɨ wi jeñɨ kapii jare ñana jowɨ wae, opaete uñemoña reta ambɨe ye ye temitɨ rupii. Jare jeñɨ wi ɨwɨra reta umee ía jäɨ rewe wae, ambɨe ye ye temitɨ rupii. Jare Tumpa uecha jokua reta ikawiete ko.

¹³ Jare uasa yawe pɨ̈tu jare ara, mbapɨ ara ma.

¹⁴ Joko wi Tumpa jei: “Tuiko tembipe reta ara re umbɨsɨrɨ waerä ara pɨ̈tu wi, jare umɨanga jare uyepapa waerä ara reta, yasɨ reta, jare año reta wi.

¹⁵ Jokua tembipe reta tumbɨembipe ara ɨwate wi ɨwɨ kotɨ,” jei. Jayawe jukuärái iko.

¹⁶ Tumpa uyapo mokui tembipe tuicha wae – pëti tuichaete wae umbɨembipe waerä opa ara rupi, jare pëti michi nunga wae umbɨembipe waerä pɨ̈tu rupi. Jae uyapo wi yasɨtata reta.

^17-18 Tumpa oñono opaete kua jembiapo reta ara re umbɨembipe waerä ɨwɨ re, jare pëti umbɨembipe waerä ara rupi jare ïru wae umbɨembipe waerä pɨ̈tu rupi, jare umbɨsɨrɨ waerä pɨ̈tumimbi tembipe wi. Jare Tumpa uecha jokua reta ikawiete ko.

¹⁹ Jare uasa yawe pɨ̈tu jare ara, irundɨ ara ma.

²⁰ Joko wi Tumpa jei: “Tuñemoña jeta mbaembae jekowe wae ɨ reta rupi, jare tuiko wɨra reta uwewe ɨwate rupi wae,” jei.

²¹ Jare Tumpa uyapo opaete tekowe onoi wae reta ɨ rupiwa – tuicha wae reta jare michi wae reta wi. Uyapo wi opa yea wɨra reta. Jare uyapo uñemoña reta waerä jae jee rupii. Jare Tumpa uecha ikawiete ko.

²² Jare Tumpa uyapo ikawi wae chupe reta iñee rupi jei rewe kuärái: “Piñemoña jare pemɨtɨnee mar reta, ɨpa reta, jare ɨ wasu reta rupi. Jare wɨra reta piñemoña jeta ɨwɨ iáramo rupi.” Jukuärái jei.

²³ Jare uasa yawe pɨ̈tu jare ara, pandepo ara ma.

²⁴ Joko wi Tumpa jei: “Tuñemoña ɨwɨ pe mbaemɨmba reta pëti pëti jae jee rupii – jae ko mbaemɨmba reta tëta rupiwa, jare ñana rupiwa, jare opaete ɨwɨ rupi uyewichɨ wae reta,” jei. Jayawe jukuärái iko.

²⁵ Tumpa uyapo opaete mbaemɨmba reta – jae ko ñana rupiwa reta, jare tëta rupiwa reta, jare ɨwɨ rupi uyewichɨ wae reta – pëti pëti ambɨe ye ye uñemoña jae jee rupii. Jare Tumpa uecha jokua reta ikawiete ko.

²⁶ Joko wi Tumpa jei: “Yayapo kuimbae yande echa rami. Jae tonoi mbaepuere pira reta re, jare wɨra reta re, jare opaete mbaemɨmba reta re, jare opaete ɨwɨ rupi uyewichɨ wae reta re,” jei.

²⁷ Jayawe Tumpa uyapo kuimbae jae echa rami. Kuimbae jare kuña wi uyapo.

²⁸ Jare Tumpa uyapo ikawi wae chupe reta iñee rupi jei rewe: “Piñemoña jeta jare pemɨtɨnee ɨwɨ, jare piporu opaete ɨwɨ. Jare penoi mbaepuere pira reta re, jare wɨra reta re, jare opaete mbaemɨmba reta re,” jei.

²⁹ Jare Tumpa jei wi chupe reta: “Mase, opaete temitɨ reta ime jäɨ wae jare opaete ɨwɨra reta umee ía jäɨ wae amee pewe perembiurä.

³⁰ Jare opaete mbaemɨmba reta jare wɨra reta jare opaete ɨwɨ rupi uyewichɨ wae reta pe, amee chupe reta ñanarokɨ jembiurä,” jei Tumpa chupe reta.

³¹ Jare Tumpa uecha opaete jembiapo reta ikawiete ko. Jare uasa yawe pɨ̈tu jare ara, owa ara ma.