Gálatas 6 - Biblia

Kua ko jae jaeño ma Pablo umbɨarakuaa reta

¹ Jayawe hermano mii reta, ime ye mbaembae re pumbɨarakuaa ye waerä. Ime yawe kía pepɨte pe oï wae uyerowa uyapo waerä mbae kachi wae, jayawe pe Espíritu Santo rupi pewata kawi peï wae reta imeta ko pemborɨ mii peau rewe jae uyeapɨkatu ye waerä Tumpa ndiwe. Erëi piyandareko kawi piyé awɨye waerä jokua jae uyapo wae uyawɨka pewe wi Tumpa kotɨ.

² Jayawe piyemborɨ katu yembɨawái reta rupi, piyemborɨ katu tewɨta poɨ wae pewoɨ wae rami. Jare jukuärái piyapo kawita peï kuri Cristo jei yandewe yayapo waerä wae.

³ Erëi ime yawe kía uyererowia katu jokua teko kachi pe oa wae wi, jae uyembɨtawɨ ko oï. Echa’ä jae mbae’ä ko.

⁴ Jáeramo awɨyeta ko yamboyowake mbae yayapo wae ïru wae reta mbae uyapo wae ndiwe awɨye waerä yayembutuicha. Erëi pëti pëti ñamae kawi yandiyé kërái mbaembae yayapo wae re. Jare jokua mbaembae ikawi oï yawe, yandepɨa toï jenda pe.

⁵ Echa’ä Tumpa umee yandewe pëti pëti pe mbarawɨkɨ yayapo waerä. Jare pëti pëti wae yanderé oï yayapo waerä yandeparawɨkɨi.

⁶ Tumpa iñee re uyemboe oï wae tumee mbaembae ime onoi wae wi imboea pe.

⁷ Awɨye piyembɨtawɨ. Echa’ä Tumpa umɨñatimata oï yandewe pëti pëti pe mbae yayapo wae rupi, jare jokua rewa yande yandepuereta’ä yambɨtawɨ Tumpa. Yande yaikuaa kawi ñaï jokua ñañotɨ wae, jokua etei ko yawɨye yawe, yaupi yeta ñaï kuri.

⁸ Jae ramiño wi kía iko yawe jae jei wae rupiño, jokua mbaembae jae uyapo wae rupi ikumewata oï kuri jekowe. Jare jukuärái wi kía iko yawe Espíritu Santo jei wae rupi, jokua mbaembae jae uyapo wae rupi tuicha rupi uyekouta oï kuri tekowe opa mbae wae re.

⁹ Jayawe awɨye yandekueri ikawi wae yayapo wae wi. Echa’ä uwäe yawe ara Tumpa jei wae, yayekouta ñaï kuri ikawi wae yayapo wae rupi yandekueri’ä yawe.

¹⁰ Jáeramo yayapo mii ikawi wae opaete wae pe yandepuere wae rupi. Erëi tenonde Cristo re wɨrowia wae reta rani ko yamborɨta.

¹¹ Mase, che etei aikuatía aï pewe kua kuatía tuicha wae.

¹² Jokua imeta ko piyembɨcircuncidaka jei pewe reta wae jaeño uyembɨpɨa’ä ñonoï mbaembae uyekuaa wae reño. Añetete, jae reta jaeño uipota’ä ïru judío reta uiporaraka waerä chupe reta. Echa’ä jukuärái uyeyapota oï chupe reta jae reta jei yawe: “Cristo umano kurusu re wae rupiño ko yandepuere ñanoi tekowe opa mbae wae.”

¹³ Jayawe jae reta jei pewe piyembɨcircuncidaka waerä Moisés arakae uikuatía wae rupi. Erëi añetete jae retawe uyapo’ä jupi rupi opaetei Moisés uikuatía wae. Erëi jae reta uipota piyembɨcircuncidaka waerä ipuere waerä jei uyembutuicha rewe ïru judío reta pe: “Mase kërái ore nduyapo ma judío mbae wae reta uyembɨcircuncidaka waerä,” jei reta waerä.

Pablo jaeño umbutuicha yandeYa Cristo jee

¹⁴ Erëi che ndarau etei ayembutuicha mbae re awe. Jaeño ambutuichata yandeYa Jesucristo jee jae kurusu re uyapo yandewe wae re. Echa’ä jokua jae uyapo chemaerä jeko pewa, opaete mbaembae kachi wae Cristo re wɨrowia mbae wae reta ueka wae mbae’ä ma ko chewe. Añetete che amano rami ma ko chuwi. Jare jae reta imaerä mbae’ä ma ko che.

¹⁵ Añetete, yande pëti ramiño ñaï Jesucristo re ramo, mbae’ä ko yayembɨcircuncidaka ma wae. Jare mbae’ä ko wi yayembɨcircuncidaka mbae wae. Erëi mbae ikawi wae ko jae tekowe ipɨau wae ñanoi wae.

¹⁶ Jare Tumpa tumbɨpɨakatu jare tuiparareko opaete kua tekowe ipɨau wae rupi yureko wae reta – jae reta ko Tumpa pewa añetete wae reta.

¹⁷ Mase, cherete re ime uyekuaa oï chembɨpere wae reta jendakue. Jokua uikuaaka oï kërái che tuicha aiporara ayeyokui kawi waerä yandeYa Cristo pe. Erëi jukuärai’ä ko jokua oporomboe kachi wae reta. Jáeramo añawe wiwe awɨye ma jae reta chembɨawái toï kuri.

¹⁸ Jayawe hermano mii reta, yandeYa Jesucristo jekuaeño tipɨakawi pewe. Jukuärái tuiko.