Gálatas 5 - Biblia

Jesucristo yandeyora ma

¹ YandeYa Cristo yandeyora ma añetete rewe. Jare jae uipota yande yapɨta waerä jekuaeño uyeyora wae reta rami. Jáeramo awɨye pemaeño piyé piko ye waerä Moisés arakae uikuatía wae rupi kía täta uyeyokui wae rami.

² Mase, jeta wae reta uyembɨcircuncidaka uyembujupika waerä tëi Tumpa kotɨ. Erëi che tae pewe, pe reta piyapo yawe jukuärái, jayawe Cristo uyapo wae usiriweta’ä etei ko pewe maeräwe.

³ Jare che tae ye pewe, pe reta piyembɨcircuncidaka yawe, jayawe imeta tëi ko piyapo wi opaetei ïru mbaembae Moisés uikuatía wae rupi.

⁴ Mbaetɨ ye mbae, echa’ä pipota yawe piyembujupika Moisés uikuatía wae piyapo wae rupi, jayawe piyembɨsɨrɨ ma ko Cristo wi jare piyerowa ma ko Tumpa ipɨakawi wi.

⁵ Erëi ore Espíritu Santo rupi nduiko wae reta, ore nduikuaa nduyemboɨta noï Tumpa jowai orereko mbae wae rami ndorowia ma Cristo re ramo. Jokua ko ore nuäro noï nduyerowia rewe.

⁶ Añetete ime yawe kía pëti ramiño oï Jesucristo re wae, mbae’ä ko uyembɨcircuncidaka ma wae. Jare mbae’ä ko wi uyembɨcircuncidaka mbae wae. Erëi mbae ikawi wae ko jae Cristo reño yarowia waerä jare yaechaka waerä yarowia ma ko jese wae yayerau päwe rewe rupi.

⁷ Pe reta tenonde yawe pewata kawi piko tëi Tumpa kotɨ. Erëi ¿kía reta pa yuweru pembopa añetete wae wi?

⁸ Jokua yuweru pembopa wae reta yuweru’ä ko Tumpa wi. Pe reta, Tumpa ko pereni ikotɨ.

⁹ Jáeramo piyandareko kawi piyé, echa’ä pikuaa ma ko kërái mbowɨño levadura umbɨayasɨ opaete mbɨyaperä uñemona oï wae. Jukuärái wi pëti yemboe ambɨe ye wae ipuere uñemɨái oo umbɨtawɨ waerä jeta wae reta.

¹⁰ Erëi che arowia katu aï peré piyemɨngeta waerä pepɨa pe kua mbaembae re che chepɨa pe ayemɨngeta wae rami. Echa’ä pe reta jare che pëti ramiño ko ñaï päwe yandeYa Cristo re. Añetete jokua kía nunga pembojopa ñonoï wae reta, Tumpa uiporarakata oï chupe reta.

¹¹ Hermano mii reta, amokue wae reta jei tëi ñonoï cheré: “Pablo oporomboe oï yande reta imeta ko yayembɨcircuncidaka Tumpa umae kawi waerä yanderé.” Jukuärái jei reta tëi. Erëi jukuärai’ä ko. Jukuärái che jae yawe, jayawe judío reta ndarau tëi uiporaraka ñonoï chewe. Añetete judío reta iarasɨ ko chekotɨ che aporomboe wae jeko pewa. Echa’ä che aporomboe jaeño Cristo imano kurusu re wae rupi ko yandepuere ñaï yandereko mbae wae rami Tumpa jowai – mbaetɨ ko yayembɨcircuncidaka wae rupi.

¹² ¡Aipota echa ko tëi jokua jei pewe piyembɨcircuncidaka waerä wae reta tuyeapiawoka opaetei kuri!

¹³ Jukuärái che jae, echa’ä pe chehermano mii reta, Tumpa mbaetɨ etei ko pereni pe reta piko waerä Moisés arakae uikuatía wae rupi täta uyeyokui wae reta rami. Tumpa pereni ko piko waerä pepɨawiwe rewe. Erëi awɨye pere peyupe: “Tumpa uyapo yandepɨawiwe yaiko waerä. Jáeramo yandepuere yaiko yande yae wae rupiño.” Awɨye jokua. Piyeyokuita ko peyupe piyerau päwe rewe.

¹⁴ Echa’ä opaete mbaembae Tumpa arakae jei Moisés rupi wae, jae ko pëti waeño. Jae ko kua: “Peau perapicha kërái pe reta etei piyerau wae rami.”

¹⁵ Erëi piyandareko kawi piyé, echa’ä pe reta jekuaeño piyeapicha yawe jare piyeaka peï yawe pe yepái, jayawe opata piyererukachi peï.

Yaikota ko Espíritu Santo jei wae rupi

¹⁶ Jayawe che tae pewe kuärái: Piko Espíritu Santo jei wae rupi. Jare jukuärái piyapo yawe, ndarau ma ko piko pe reta pere wae rupiño.

¹⁷ Echa’ä yande yaiko yawe yande yae wae rupiño, jokua jae’ä ko Espíritu Santo uipota wae. Jae ramiño wi Espíritu Santo uipota wae, jae’ä ko yaipota wae yaiko yawe yande yae wae rupiño. Erëi mokui rewe yaipota tëi yayapo. Jáeramo ime pëti ñeräro yandepɨa pe, jare jekuaeño yanembɨawái oï awɨye waerä yayapo yandepɨawiwe rewe mbae yaipota tëi yayapo wae.

¹⁸ Erëi kua ñeräro pe Moisés arakae uikuatía wae ndarau etei yanemborɨ. Añetete ñañemee yawe Espíritu Santo pe yaiko waerä jae jei wae rupi, jayawe Moisés arakae uikuatía wae mbaetɨ onoi mbaepuere yanderé.

¹⁹ Yande reta yaikuaa kawi kërái ko kía iko yawe jae jei wae rupiño. Echa’ä uyapo awasa, jare uyapo mbaembae kachi wae, jare imbɨkere.

²⁰ Jae nunga wi umbɨadora tumparaanga reta re, jare ipaye. Uñamɨtäa japicha reta jare jowaichopota. Jawɨ̈ropota. Pochɨ wɨrae mbae re. Uyembutuicha. Iyeakase jare uyapo uyembɨyao tee tee reta waerä.

²¹ Iñemɨrose. Upuruyuka. Usawɨpo. Jare uyapo arete wi. Jare jeta ïru kua nunga mbaembae ikawi mbae wae uyapo kía iko yawe jae jei wae rupiño. Che tamɨmbeu ye pewe kua nunga mbaembae ikawi mbae wae rupi yureko wae reta ndarau etei ñonoï Tumpa ndiwe, jae oï ma yawe opaete wae imburuwicha wasurä jaeño mái pewa.

²² Erëi kía iko yawe Espíritu Santo jei wae rupi, upuruauta, uyerowiata, ipɨakatuta, ipɨawasuta, ipɨakawita, jeko kawita, wɨrowia kawita Tumpa re,

²³ ikoita, jare ikota’ä jete uipota wae rupi. Añetete, yaiko yawe Espíritu Santo rupi, ndarau yayawɨ Tumpa jei wae.

²⁴ Tenonde yawe yande reta yaipotase yaiko yande yae wae rupiño. Erëi añawe opaete yande Jesucristo pewa ma yaiko wae reta yaeya ma ko yande yae wae rupiño yaiko wae jare jokua kɨrëɨ mbaembae kachi wae ndiwe. Yaikutu ma kurusu re yaeya wae rami ko.

²⁵ Jare Espíritu Santo umee ma yandewe tekowe ipɨau wae. Jáeramo yaiko mii Espíritu Santo jei wae rupi.

²⁶ Awɨye mii yayembɨkate, jare awɨye ïru wae reta ndiwe yapurumbɨarasɨiño. Jare awɨye ñañemɨro yandeyupe.