Filipenses 3 - Biblia

Mbaetɨ etei ikawi yayeko waerä yandiyé

¹ Jayawe hermano mii reta, piyerowia yandeYa uyapo yandewe wae re. Kua añawe aikuatiata aï pewe wae, aikuatía ma pewe tenonde yawe. Erëi jekuaeño aipota aikuatía ye pewe. Mbaetɨ etei chekueri, echa’ä ikawi oï pewe.

² Piyandareko kawi piyé kuri, echa’ä ime amokue jeko kachi wae reta oporomboe ñonoï tëi kuärái: “Ime yawe kía Tumpa imaerä uipota iko wae, imeta ko uyembɨcircuncidaka,” jei ñonoï reta. Erëi awɨye piyapɨsaka jokua yɨmba echa wae reta re.

³ Echa’ä yande reta ko jae Tumpa imaerä añetete wae. Yande reta ko yambutuicha Tumpa jee Espíritu Santo rupi. Jare mbaetɨ yayeko ñaï yandiyé jare mbaembae yayapo wae re ñanoi waerä tekowe opa mbae wae. Jaeño yayeko ñaï mbaembae Jesucristo uyapo yandewe wae re, jare jokua re ko yayemɨngeta.

⁴ Erëi yandepuere yawe ñanoi tekowe opa mbae wae yande yae wae rupiño, jayawe che imeta tëi ko anoi ayeko waerä chiyé. Añetete ko, ime yawe kía wɨrowia ime onoi uyeko waerä iyé wae, che ime tëi jetaete anoi chuwi ayeko waerä chiyé.

⁵ Echa’ä che ayembɨcircuncidaka juri ara ma anoi yawe kërái Tumpa arakae jei judío reta pe wae rupi. Che ko jae Israel iñemoñaa pewa jare Abraham jumɨmino Benjamín iñemoñaa pewa. Che ko jae hebreo añetete wae, echa’ä pëti hebreo taɨ ko che. Jae nunga che aikose pëti fariseorä wi, jare jukuärái che aipotase tëi aiko jupi rupi kawi opaete Tumpa jei oreramɨkue reta pe wae rupi.

⁶ Añetete mbaetɨ kiawe ipuerese chembɨjeko mbae re, echa’ä chereko jekuaeño iko kërái Tumpa arakae jei chupe reta wae rupi. Jare jokuaño’ä ko. Jae nunga wi che cheratangätuete aikose tëi aiporaraka waerä Cristo re wɨrowia wae reta pe, jare jukuärái arowiase tëi ayeyokui kawi waerä Tumpa pe. Jukuärái ime arekose tëi jeta ayeko waerä chiyé.

⁷ Tenonde yawe che arowiase tëi opaete jokua mbaembae chembujupi iko Tumpa kotɨ. Erëi añawe aipotaete ambɨyerowia Cristo. Jare añawe aikuaa jokua mbaembae yepe jaeño chembɨawái iko.

⁸ Jare jukuärái wi ko opaete ïru mbaembae reta ayekose tëi jese wae. Añawe che aikuaa cheYa Jesucristo, jare che arowia jokua ikawiete ye oï ipotawe ïru mbaembae wi. Jáeramo che aeya ma opaete jokua mbaembae ayekose tëi jese wae. Jare aecha ma ɨtɨ rami jokua mbaembae reta chepuere waerä akuakuaa Cristo kotɨ.

⁹ Jare jukuärái yaweño aikota pëti ramiño Cristo re jare chereko mbae Tumpa jowai – mbaetɨ etei ko Moisés arakae uikuatía wae jupi ayapo wae rupi. Che arowia aï Cristo re, echa’ä jukuärái yaweño ko Tumpa umae yanderé yandereko mbae wae rami. Cristo re yarowia wae rupiño ko. Mbaetɨ etei ko Moisés arakae uikuatía wae jupi rupi yayapo wae re.

¹⁰ Che aipota aikuaa kawi Cristo. Jare jokua mbaepuere Tumpa uiporu umbɨjekowe ye waerä Cristo wae, jokua mbaepuere aipota uparawɨkɨ waerä che rupi wi. Jare yepe tëi aramoi aiporarata jare amanota Cristo rami, erëi aipota aiko wi Cristo rami.

¹¹ Jare aiporara yawe, jokua jaekawita oï chemaerä. Echa’ä amano yawe, aikuaa aï Tumpa chembɨjekowe yeta oï umanokue wae reta ipɨte wi.

¹² Kua ndeiño ko opa kawi aepitɨ, jare ndeiño ko jupi aï wi. Erëi jekuaeño cheratangätu aï jokua aepitɨ waerä. Echa’ä jokuaerä ko Jesucristo cheparawo.

¹³ Mase hermano mii reta, yepe tëi opa’ä aepitɨ jokua, erëi ime mbae ayapo wae. Che pëti ñeñokuiñokui pe aï rami. Jare che mbaetɨ ma ayemɨngeta chepɨa pe mbaembae tenonde yawe chembɨawaise wae rewa. Echa’ä aipota a tenonde Cristo kotɨ.

¹⁴ Jare jukuärái ayapota a aë rewa iyapɨ pe. Jayawe ramo Tumpa cherenita ara pe a aipɨsɨ waerä jokua mbae ikawi wae jae umɨñatimata oï chewe wae cheparawɨkɨ re. Jokuaerä ko Tumpa chapo pëti ramiño Cristo re.

¹⁵ Jukuäraita ko yayemɨngeta yandepɨa pe opaete yande yakuakuaa ma Tumpa kotɨ wae reta. Erëi amokue wae pe reta mbaetɨ yawe pepɨayemɨngeta che rami kua mbaembae re, Tumpa uikuaakata pewe kërái ikawi ko piyemɨngeta waerä pepɨa pe.

¹⁶ Erëitu añawe rupi jekuaeño yaiko kërái Tumpa uikuaaka ma yandewe wae rupi.

¹⁷ Jayawe hermano mii reta, pe reta pikuaa kawi ko chereko. Jáeramo pe reta pereko tuiko chereko rami. Jae nunga wi pemae jokua omomoe ñonoï chereko wae reta re.

¹⁸ Echa’ä jeta wae reta uipota’ä etei kiawe umɨmbeu waerä ñee Cristo umano kurusu re yanderé wae. Jae reta towaicho ko. Kua jeta wese ma che jae pewe, jare añawe che jae ye aï pewe kua cheresaɨ rewe.

¹⁹ Jae reta yureko jaeño mbaembae jete uipota uyapo wae reño. Jare yepe tëi jae reta jeko kachi wae ko jare imeta tëi imara jokua re, erëi jekuaeño uyemɨngeta reta uyembutuicha rewe mbaembae kachi uyapo wae re. Jare jekuaeño uyemɨngeta ñonoï ipɨa pe mbaembae kua ɨwɨ pewa reño. Chupe reta Tumpa uiporarakata oï jaeño mái pewa.

²⁰ Erëi yande reta ñaï'ä ko jae reta rami. Ñanerëta añetete wae ara pe ko oï. Jare ñaäro ñaï wi yandeRepɨ wae joko wi ou ye waerä – jae ko yandeYa Jesucristo.

²¹ Jae umbɨambɨeta oï yanderete kua ɨwɨ pewa ikawiete ye oï waerä jae jete imbaepuerete wae ara pewa rami. Jukuärái yandeYa uyapota oï jae imbaepuere tuichaete wae rupi. Kua ko jae mbaepuere jae ime onoi opaete mbaembae re wae.