Filipenses 1 - Biblia

Pablo wɨraaka saludo

¹ Pe yandeYa Jesucristo imaerä piko wae reta tëta wasu Filipos pe peï wae, jare petenondewa reta jare pemborɨa reta ndiwe, che ko jae Pablo aikuatía aï pewe kua tupapire hermano Timoteo ndiwe wae. Ore ko jae Jesucristo pe nduyeyokui wae reta.

² YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Pablo uyerure Tumpa pe Cristo re wɨrowia wae reta re

³ Che amee yasurupái Tumpa pe opa wese chemandúa yawe peré.

⁴ Jare opa wese ayerure yawe Tumpa pe peré, jekuaeño ayapo ayerowia rewe.

⁵ Echa’ä jeta ma pe reta chemborɨ chepuere waerä jekuaeño amɨmbeu ñee ikawi wae Cristo rewa. Jukuärái piyapo ma pembɨpɨ perowia Cristo re wiwe añawe rewa.

⁶ Pe reta jaeramo perowia Cristo re yawe, Tumpa umbɨpɨ uparawɨkɨ pepɨa pe umbɨambɨe waerä pereko, jukuärái piko waerä yandeYa Jesucristo rami. Jare che arowia katu aï Tumpa jekuaeño uyapota oï jokua mbarawɨkɨ ara yandeYa Jesucristo pewa ou rewa. Jokua ara ramo jae opata uyapo.

⁷ Che jupi ko ayemɨngeta waerä kuärái peré, echa’ä che puauete ramo. Jae nunga wi yayekou ñaï päwe rewe Tumpa ipɨakawi re. Echa’ä jae umaeño ma yanderé yaparawɨkɨ waerä pëti ramiño ñee ikawi wae uñemɨái waerä. Echa’ä che amɨmbeu aï ñee ikawi wae jare aikuaaka aï chupe reta kërái jokua ñee añetete wae ko. Jare pe reta chemborɨ peï chepuere waerä ayapo jukuärái. Jare jokuaño’ä ko. Jae nunga wi, yepe tëi che peresorɨru pe aï, erëitu pe reta jekuaeño chemborɨ peï.

⁸ Tumpa uikuaa kërái che aipota echa puecha ye, echa’ä che puauete kërái Jesucristo etei perau rami.

⁹ Jare che ayerure aï Tumpa pe peré pe reta jeiete piyerau päwe waerä arakuaa katu rewe.

¹⁰ Jukuärái ayerure aï peré pikuaa waerä piparawo ikawi waeño. Echa’ä jukuärái piyapo yawe, pikota jupi rupi jare peïta pereko mbae rewe ara yandeYa Cristo pewa ou rewa.

¹¹ Jare Jesucristo pemborɨta ime waerä penoi teko ikawi wae opaete wae uecha waerä. Jare jukuärái pereko pewa ïru wae reta uipɨuta Tumpa wi jare umbutuichata jae jee. Jukuärái ko ayerure aï Tumpa pe peré.

Ñee ikawi wae jekuaeño uñemɨái

¹² Jayawe hermano mii reta, aipota pikuaa waerä kuärái: Kua mbae uyeyapo chewe wae rupi ñee ikawi wae Cristo rewa jeiete uyemɨmbeu oo oï.

¹³ Echa’ä opaete mburuwicha wasu isɨndaro reta jare jeta ïru kua tëta wasu pewa reta añawe uikuaa che kua peresorɨru pe aï Cristo pe ayeyokui ramo.

¹⁴ Jare jokuaño’ä ko. Jae nunga wi che kua peresorɨru pe aï wae jeko pewa hermano reta opaete seri uñemɨatangätu ma yandeYa kotɨ. Jare jae reta jeiete umɨmbeu ñonoï Tumpa iñee ukɨye mbae rewe.

¹⁵ Añetete ko, amokue jae reta iñakatäa cheré jare jaeño umɨmbeu ñonoï Cristo rewa ime waerä onoi jeta jemimboe reta chewi. Erëi ïru wae reta umɨmbeu ñonoï Cristo rewa upurumbɨtawɨ mbae rewe.

¹⁶ Jae reta cherau jare uikuaa Tumpa cheñono ma kua pe aikuaaka waerä koropi kërái ñee ikawi wae Cristo rewa añetete ko.

¹⁷ Erëi jukuärai’ä etei ko jokua ïru wae reta. Jae reta umɨmbeu ñonoï Cristo rewa upurumbɨtawɨ rewe. Jaeño uipota uyembutuicha reta, jare wɨrowia reta tëi che jeiete aiporara waerä jasɨ katu rupi kua peresorɨru pe.

¹⁸ Erëitu mbae’ä chewe mbae jeko pewa ra umɨmbeu ñonoï reta Cristo rewa – jae ko upurumbɨtawɨ rewe ra ani upurumbɨtawɨ mbae rewe ra. Che jaeño ayerowiaete aï ñee Cristo rewa uyemɨmbeu oï ramo. Jare jekuaeño jeiete ayerowiata.

¹⁹ Echa’ä che aikuaa opaete kua mbaembae uyeyapo oï chewe wae ikawita oï chewe, echa’ä pe reta piyerure peï Tumpa pe cheré ramo, jare Espíritu Santo Jesucristo ombou wae chemborɨ oï ramo.

²⁰ Jare che arowia katu aï Tumpa re jae chemɨmɨräta waerä awɨye waerä chemara Cristo wi, jare jekuaeño ambutuicha waerä Cristo jee akɨye mbae rewe. Aipotaete Cristo jee uyembutuichaka waerä opaete mbae ayapo wae rupi kua cherekowe pe aï rambuewe. Jare chemano rupi aipota Cristo jee uyembutuichaka waerä wi.

²¹ Añetete che jekuaeño aiko rambuewe tekowe pe, aikota Cristo pewarä. Jare amano yawe, ikawieteta chewe, echa’ä aïta Cristo ndiwe ramo.

^22-23 Erëi chepuere yawe, ¿mbae nunga ra aiparawota tëi cheyupe? Aikuaa’ä. Aipota tëi mokui rewe parawete. Echa’ä che jekuaeño aiko yawe, chepuere jekuaeño ayeyokui Tumpa pe. Erëi jae nunga wi aipota amano, Cristo ndiwe aï waerä. Kua ikawieteta ko chewe.

²⁴ Erëitu ikawiete yepe jekuaeño aiko waerä añawe rupi ikawi waerä pewe.

²⁵ Kua aikuaa kawi. Jáeramo aikuaa wi che apɨtata aï kua ɨwɨ pe pe reta ndiwe jeiete pepɨräta waerä Tumpa kotɨ, jare jukuärái piyerowia waerä.

²⁶ Chekɨrëɨete pe reta ndiwe aï ye waerä, jare jukuärái pe reta tuichaete ye piyerowia waerä yandeYa Jesucristo rupi chereko pewa.

Pablo umɨñera jae reta uechaka waerä teko kawi reta

²⁷ Erëi ipotawe mbae uasa chewe wae rupi, che pumɨñera pechaka waerä teko kawi opaete wae jowake, jae reta umae kawi waerä ñee ikawi Cristo rewa wae re. Echa’ä jukuärái piyapo yawe, aikuaata pe reta piñemɨmɨräta peï pëti ramiño, jare pëti ramiño piñemɨatangätu peï ñee ikawi wae pemɨmbeu waerä. Jukuärái aipota pereräkua kawi waerä chewe chepuere’ä añatima ye pekotɨ yawe.

²⁸ Jare awɨye pekɨye jokua oyowaicho oï pe ndiwe wae reta wi. Echa’ä pekɨye’ä chuwi reta yawe, pikuaakata chupe reta Tumpa umeeta oï pewe tekowe opa mbae wae, erëi chupe reta Tumpa uiporarakata oï jaeño mái pewa. Añetete Tumpa ko uparawɨkɨ oï kua mbaembae rupi.

²⁹ Echa’ä Tumpa mbaetɨ ko umee pewe Cristo re perowia waeräño. Umee ko pewe wi piporara waerä jae imaerä.

³⁰ Jáeramo jokua jeko pewa ko Cristo re wɨrowia mbae wae reta uiporaraka ñonoï pewe. Jukuärái pe reta pecha uyeyapo chewe aiko yawe pe reta ndiwe. Jare añawe pikuaa imeño jukuärái uyeyapo oï chewe.