Éxodo 30 - Biblia

Moisés uyapokata ko pëti mbaerenda uapɨ jese waerä mbaembae utimbo kawi wae

¹ Tumpa jei wi Moisés pe: “Iyapoka wi pëti mbaerenda ɨwɨra acacia pewa peapɨ jese waerä mbaembae utimbo kawi wae chemaerä,” jei.

² “Ndiyapokata ko mbaerenda irundɨ itiäkua wae kuärái: cuarenta y cinco centímetro puku wae, jare cuarenta y cinco centímetro ipɨwasu wae, jare noventa centímetro ɨwate wae,” jei. “Mbaerenda irundɨ itiäkua reta iáramo tuiko wakaräti echa rami, jare tuyeyapo pëti wae wiño mbaerenda wi.

³ Iñowaka oro pɨpe mbaerenda, jare opaete iyɨke rupi, jare irundɨ itiäkua wakaräti echa rupi wi. Jukuärái ndiyapokata ko. Iyapoka wi oro pewa jembeɨrä ipöra wae,” jei Tumpa Moisés pe.

( Uikuaaka mbaerenda rewa, jare kërái umee reta waerä korepoti tupao pewarä.) Ɨ jɨru tuicha wae

¹⁷ Tumpa jei wi Moisés pe kuärái:

¹⁸ “Iyapoka pëti ɨ jɨru tuicha wae jiero bronce pewa, jare jɨru iwapɨkarä bronce pewa wi,” jei. “Iñonoka tupao joka pe, mbaerenda jare tupao ipäu pe. Emɨtɨnee ɨ pe jokua jɨru.

^19-21 Aarón jare taɨ reta uiporuta ko jokua ɨ uyepoe waerä jare ipɨ oyoe waerä ndei uike reta mbowe tupao japɨpe, jare ndei uapɨ reta mbowe mbaerenda re mbae uñemee chewe wae. Jukuärái ayukata’ä reta. Oyoeta ko reta ipo jare ipɨ opa wese rupi awɨye umano waerä. Aarón jare iñemoñaa reta imanduata ko kua jae aï wae re jaeño mái pewa.” Jukuärái jei Tumpa Moisés pe.