Éxodo 27 - Biblia

Mbaerenda jiero bronce pewa

¹ Tumpa jei wi Moisés pe: “Iyapoka mbaerendarä irundɨ itiäkua wae ɨwɨra acacia pewa,” jei. “Ndiyapokata ko mbaerenda kuärái: mokui metro veinticinco centímetro puku wae, jare mokui metro veinticinco centímetro ipɨwasu wae, jare pëti metro veinticinco centímetro ɨwate wae. Jukuärái ndiyapokata.

² Iyapoka mbaerenda irundɨ itiäkua reta iáramo wakaräti echa rami, erëi tuyeyapo pëti wae wiño. Jare iñowaka opaete mbaerenda jiero bronce pɨpe,” jei Tumpa Moisés pe.

( Kërái uyapo reta waerä mbaerenda jare jembiporu reta rewa.) Tupao joka rewa

⁹ Tumpa jei wi Moisés pe: “Ikëseka tupao joka,” jei. “Iyapoka kesemba itarapo lino ikawi wae pewa. Kesemba itarapo sur kotɨwa tuiko cuarenta y cinco metro puku wae.

¹⁰ Tarapo reta tusawawa toï veinte poste jiero bronce pewa re. Pëti pëti poste uwapɨta ko iwapɨka bronce pewa re. Jare iyapoka wi ngächu reta jare pepoäkarewa echa reta korepoti tïi wae pewa uñeñonoka waerä poste reta re,” jei.

¹¹ “Jae ramiño wi kesemba itarapo norte kotɨwa tuiko cuarenta y cinco metro puku wae, veinte iposte uwapɨ ñonoï veinte poste iwapɨka jiero bronce pewa re. Jare ngächu reta jare pepoäkarewa echa reta poste reta re ñonoï wae toï korepoti tïi wae pewa,” jei.

¹² “Kesemba itarapo warasɨ oë wae kotɨwa tuiko veintidós metro mbɨte puku wae, jare payandepo iposte uwapɨ ñonoï payandepo poste iwapɨka re,” jei.

¹³ “Jae ramiño wi kesemba itarapo warasɨ uike wae kotɨwa tuiko veintidós metro mbɨte puku wae,” jei Tumpa Moisés pe.