Éxodo 20 - Biblia

Payandepo mbaembae Israel iñemoñaa reta uyapota ko wae jare uyapota’ä wae rewa

¹ Joko wi Tumpa jei Israel iñemoñaa reta pe kuärái:

² “Che ko jae peTumpa aikoño mái wae ponoe ɨwɨ Egipto wi wae. Joko pe täta piyeyokuise Egipto pewa reta pe,” jei.

³ “Awɨye penoi ambɨe petumparä chewi,” jei.

⁴ “Awɨye piyapo peyupe mbae petumparaangarä – mbaembae ara pe ñonoï wae jaanga, jare mbaembae ɨwɨ pe ñonoï wae jaanga, jare mbaembae ɨ pe ñonoï wae jaanga awɨye piyapo peyupe.

⁵ Awɨye awe piñeñono ɨwɨ re pipɨu rewe pembɨadora waerä tumparaanga reta re. Echa’ä cheeño ko jae peTumpa aikoño mái wae, jare che ko pumbɨete aï wae. Jare aiporarakata aï opaete chererɨ̈ro wae reta pe, isambiaɨ reta pe, jumɨmino reta pe, jare jumɨmino yuapɨ ye reta pe wi,” jei.

⁶ “Erëi opaete cherau jare uyapo kawi che jae wae rupi wae reta, jeta ye ye iñemoñaa reta wi aueteta,” jei.

⁷ “Awɨye cheree peniraangaiño pipɨu mbae rewe. Che, peTumpa aikoño mái wae, aiporarakata aï ipotawe kía pe cheree ueniraangaiño yawe,” jei.

⁸ “Pemanduata ko opa semana rupi ara mbutuu re jare jokua ara piñono teeta ko chemaerä.

⁹ Opa semana rupi, owa ara ime peparawɨkɨ waerä opaete pipota piyapo wae.

¹⁰ Erëi chiu ara ko jae ara mbutuu uñeñono tee chemaerä wae. Jáeramo awɨye peparawɨkɨ jokua ara pe. Jare awɨye tuparawɨkɨ wi pesambiaɨ reta, jare pewe uyeyokui wae reta, jare perɨmba reta. Jare ambɨe ɨwɨ pewa iko pe ndiwe wae retawe awɨye tuparawɨkɨ jokua ara pe.

¹¹ Echa’ä owa ara pe che, peTumpa, opa ayapo ara, jare ɨwɨ, jare mar reta, jare opaete mbaembae oï pɨpe wae. Jare ara chiu pe aparawɨkɨ'ä ma. Jáeramo che, peTumpa, ayemɨngeta kawi chiu ara rewa jare añono tee jokua ara chemaerä,” jei.

¹² “Pipɨu peru jare pesɨ wi, perekowe puku waerä ɨwɨ che, peTumpa, ameeta aï pewe wae pe,” jei.

¹³ “Awɨye pepuruyuka,” jei.

¹⁴ “Awɨye piyapo awasa,” jei.

¹⁵ “Awɨye pemonda,” jei.

¹⁶ “Awɨye papu pembɨjeko waerä perapicha,” jei.

¹⁷ “Jare awɨye pepɨa pe pipotaete rewe pemae mbaembae perapicha jëta pe onoi wae re. Awɨye pemae pipotaete rewe perapicha jembireko re, jare perapicha pe uyeyokui wae reta re, jare iweye reta re, jare imburika reta re, jare ïru imbaembae reta re.” Jukuärái jei Tumpa Israel iñemoñaa reta pe.

Israel iñemoñaa reta ukɨyete Tumpa wi

¹⁸ Jayawe Israel iñemoñaa reta uyandu yawe ara jɨapu jare temimbɨ wasu täta uyendu wae, jare uecha reta yawe uwera pɨi oï jare ɨwɨtu wasu tɨnee oï tatäti pe, ukɨye pɨpei urɨrɨ reta. Jare usɨrɨ reta mbɨrɨ joko wi.

¹⁹ Jare jei reta Moisés pe: “Ore nduyapɨsakata nderé nde oremɨngeta yawe,” jei. “Erëi ndukɨyete noï numanota ko Tumpa oremɨngeta yawe,” jei reta Moisés pe.