Éxodo 17 - Biblia

Ɨ oë itape wi

¹ Opaete Israel iñemoñaa reta oë yuraa ɨwɨtini wasu Sin jee wae wi. Joko wi yuraa jare upɨta reta kiape Tumpa jei chupe reta wae rupi. Jayawe yuraa uwäe reta ɨwɨ Refidim jee wae pe. Erëi joko pe mbaetɨ ɨ chupe reta.

² Jáeramo iyengeta reta Moisés pe jare jei reta chupe: “¡Emee orewe ɨ ndou waerä!” jei reta chupe. Jayawe Moisés jei chupe reta: “¿Maera pa piyengeta peï chewe? ¿Maera pa pemboporowa peï Tumpa ipɨawasu?” jei chupe reta.

³ Erëi jae reta opaete ma iɨwete ñonoï reta. Jáeramo jeiete iyengeta reta Moisés pe jare jei reta chupe: “¿Maera pa orerenoe orereru ɨwɨ Egipto wi numano waerä kua pe ɨwe pe oresambiaɨ reta jare orerɨmba reta ndiwe?” jei reta Moisés pe.

⁴ Jayawe Moisés uyerure Tumpa pe jare upɨrandu chupe: “¿Mbae pa ayapota kua reta ndiwe? ¡Cheapi pota echa ma reta ita pe cheyuka waerä!” jei Tumpa pe.

⁵ Jayawe Tumpa jei Moisés pe: “Eraa amokue Israel iñemoñaa itenondewa reta nde ndiwe jare ekua Israel iñemoñaa reta jenonde,” jei. “Eraa wi ndepopoka jokua ɨ wasu re ndekua pɨpe wae,” jei.

⁶ “Jare ndeo newäe yawe ɨwɨtu wasu Horeb jee wae itape oï wae pe, che nuärota aï itape iáramo,” jei. “Joko pe ekua itape re ndepopoka pɨpe, jare joko wi oëta ɨ tuicha Israel iñemoñaa reta jou waerä,” jei Tumpa Moisés pe. Jayawe jokua Israel itenondewa reta umae ñonoï rambuewe, Moisés jukuärái uyapo. Jare jupiwoiño tuicha ɨ oë jokua itape wi.

⁷ Jayawe Moisés umbɨjee jokua ɨwɨ itape wi ɨ oë wae Meriba, echa’ä joko pe Israel iñemoñaa reta iyengeta chupe ramo. Umbɨjee wi Masah, echa’ä joko pe omboporowa reta Tumpa ipɨawasu jei reta iyupe yawe: “¿Ime ra oï Tumpa yande ndiwe, ani mbaetɨ ra?” jei reta.