Éxodo 15 - Biblia

Moisés ikäta

¹ Jayawe Moisés jare Israel iñemoñaa reta ikäta rupi umbutuicha Tumpa ikoño mái wae jee kuärái: “Takäta Tumpa pe, echa’ä jae opa upurumɨamɨri wae ko. Jae opa uyatɨka ɨ pɨpe mar íɨwɨ pe opaete kawayu jare opo jese wae reta wi.

² Tumpa jae chemɨmɨräta wae ko; jáeramo che akätata chupe. Jae ko cheTumpa cherepɨ wae. Jae jeeño tambutuicha. Jae ko cherukue iTumpa wi. Tambutuicha jae jee.

³ Tumpa ko jae ñeräro pe upurumɨamɨri wae. JAE KO JAE – jukuärái ko Tumpa jee.

⁴ Tumpa opa uyatɨka ɨ pɨpe mar íɨwɨ pe opaete mburuwicha wasu ikarosa reta jare isɨndaro reta ɨwɨ Egipto pewa. Tumpa opa umbuputupa wi mburuwicha wasu isɨndaro itenondewa ikawiete wae reta Mar Pɨ̈ta jee wae pe.

⁵ Ita rami jae reta opa usakambu, jare mar tɨpɨete wae opa umbɨyasoi reta.

⁶ Nembaepuere tuichaete, oreTumpa, jare nembaepuere rupi opa nembái towaicho reta.

⁷ Nembaepuere rupi opa nemɨamɨri jare nembái opaete oyowaicho ndekotɨ wae reta. Jare tata opa uapɨ kapii utini wae rami, ndearasɨ jasɨete wae opa uapɨ towaicho reta.

⁸ Ɨwɨtu nembou nepütúe pe ndipeyu wae rami, jare mar uñemɨtäta jare uyemboɨ ɨwambɨ ɨwate wae rami.

⁹ Towaicho reta jei tëi iyupe: ‘Yaɨkuemoña reta yaepitɨ rewa. Jare yaekita yandekɨsepuku, jare opata ñapɨ̈ro chuwi reta imbaembae. Jukuärái yayepɨta jese reta,’ jei reta tëi iyupe.

¹⁰ Erëi nembou ye ndeɨwɨtu täta wae yawe, mar opa umbɨyasoi reta. Jare jae reta opa usakambu mar íɨwɨ pe jiero poɨete wae rami.

¹¹ OreTumpa, ¡mbaetɨ pëti awe nde rami! ¡Mbaetɨ kiawe jupiete jare imbaepuerete nde rami! ¡Opaete wae tumbutuicha nderee, echa’ä jaeño nde ndepuere ndiyapo mbaembae kɨye pewa ipuere mbaei kía uyapo wae!

¹² Nembaepuere tuichaete wae rupi mar uyepea jare opa umbɨyasoi orerowaicho reta.

¹³ Nde jekuaeño orerau ramo, orerepɨ orerowaicho reta wi. Nembaepuere rupi orereraata nde neï wae pe.

¹⁴ Ïru ɨwɨ pewa reta uikuaa yawe ndiyapo wae rewa, opata urɨrɨ reta tuicha ukɨye ramo. Jare filisteo reta tuicha ipɨatɨtɨta oï reta.

¹⁵ Uikuaa reta yawe nde ndiyapo wae rewa, ɨwɨ Edom pewa itenondewa reta ipɨakɨyeta reta. Jare ɨwɨ Moab pewa mburuwicha reta opata urɨrɨ reta tuicha ukɨye ramo. Opaete cananeo reta uipotata osi ukɨye ramo.

¹⁶ Kɨye opata uyapɨraa reta. Nembaepuere rupi tupɨta reta kïi ngatu ita rami ore opa nduasa rewa. Jukuärái tuyeyapo, oreTumpa, echa’ä ore ko jae nde ndiparawo wae reta.

¹⁷ Nde, oreTumpa, orereraata nduiko waerä jokua ɨwɨ ikawiete nemeeta orewe wae pe. Jare nde ndiyapokata nerëtarä joko pe.

¹⁸ OreTumpa, ¡nde nenoita mbaepuere opaete mbaembae re jaeño mái pewa!”

¹⁹ Jukuärái Israel iñemoñaa reta uyerowia ukäta, echa’ä uasa reta mar mbɨte rupi ɨwɨ utini rupi ramo. Jokua sɨndaro Egipto pewa reta ikawayu jare karosa ñeräro pewa rewe uaɨkuemoña reta tëi mar mbɨte rupi. Erëi Tumpa opa umbɨyasoi reta ɨ pe mar íɨwɨ pe.

María ikäta

²⁰ Jaɨkue rupi Aarón jindɨ María jee wae – pëti Tumpa iñee umɨmbeu wae ko – ombopu pëti angúa raɨ. Jare opaete kuña reta yuraa María jaɨkue jare opa rewe ombopu angúa raɨ jare upɨrae reta.

²¹ Jayawe María umɨkätaka kuña reta kuärái: Ñakäta Tumpa ikoño mái wae pe, echa’ä jae upurumɨamɨri wae ko. Jae opa umbɨyasoi ɨ pɨpe mar íɨwɨ pe opaete kawayu jare sɨndaro opo jese wae reta wi,” jei ukäta reta.

Ɨ iro wae ɨwɨ Mara jee wae pe

²² Jaɨkue rupi Moisés uruwata Israel iñemoñaa reta Mar Pɨ̈ta jee wae wi, jare yuraa reta ɨwɨtini wasu Shur jee wae kotɨ. Jokoropi mbapɨ ara rupi uwata reta, erëi uwäe’ä chupe reta ɨ jou waerä.

²³ Jare yuraa uwäe reta yawe ɨwɨ Mara jee wae pe, uwäe tëi reta ɨ joko pe. Erëi ipuere’ä jou reta, echa’ä jokua ɨ iroete ramo. Jáeramo yepe jokua ɨwɨ jee Mara.

²⁴ Jayawe Israel iñemoñaa reta umbɨpɨ iyengeta Moisés pe jare jei reta chupe: “¿Kiape pa nuwäeta ɨ ndou waerä añawe?” jei reta Moisés pe.

²⁵ Jáeramo Moisés uyerure Tumpa pe omborɨ waerä. Jayawe Tumpa uechaka chupe pëti ɨwɨra jäka. Jare Moisés omombo yawe jokua ɨwɨra jäka ɨ pe, jokua ɨ iroete wae uyeyapo ɨ ikawi wae jou reta waerä. Jaɨkue rupi Tumpa uikuaaka chupe reta amokue mbaembae uyapota ko reta wae jare mbaembae awɨyeta ko uyapo reta wae. Echa’ä uipota uyekuaa waerä añetete ra jae reta uyapota yureko jae jei wae rupi.

²⁶ Tumpa umee chupe reta jokua iñee jei rewe: “Piyapɨsaka kawi yawe che, peTumpa aikoño mái wae, jae aï pewe wae re jare piyapo yawe opaete che jae aï pewe wae rupi, jayawe ambouta’ä pewe jokua mbaesusere reta ambou ɨwɨ Egipto pe wae. Echa’ä che ko jae peTumpa pumɨnguera wae,” jei chupe reta.

²⁷ Jaɨkue rupi yuraa uwäe reta ɨwɨ Elim jee wae pe. Joko pe ime iko doce ɨkua reta jare setenta karandaɨ reta. Joko pe umbɨyemboɨ reta jëta wakapi pewa koiño ɨkua wi.