Éxodo 14 - Biblia

Israel iñemoñaa reta uasa Mar Pɨ̈ta jee wae mbɨte rupi

¹ Joko wi Tumpa jei Moisés pe kuärái:

² “Ere Israel iñemoñaa reta pe tuñatima ye too reta ɨwɨ Pi-hahirot jee wae kotɨ, tëta wasu raɨ Baal-zefón jee wae wi koiño oï. Jare tuasa reta tëta wasu raɨ Migdol jee wae. Jare ndei uwäe mbowe reta Mar Pɨ̈ta jembeɨ pe, joko pe tumbɨyemboɨ reta jëta wakapi pewa upɨta reta waerä.

³ Jukuärái mburuwicha wasu ɨwɨ Egipto pewa wɨrowiata tëi peropa peï wae jare opa pepäa peï mar jare ɨwɨtini wasu ipäu pe wae,” jei.

⁴ “Jare che amɨtäta yeta mburuwicha wasu ipɨa chuwi,” jei. “Jayawe jae peraɨkuemoñakata oï pepɨsɨka waerä tëi. Erëi che amɨamɨrita aï mburuwicha wasu jare opaete isɨndaro reta, jare jukuärái aikuaakata aï opaete ɨwɨ pewa reta pe chembaepuere. Taɨkue rupi opaete ɨwɨ Egipto pewa reta uikuaata che ko jae opaetei wae iYa,” jei Tumpa Moisés pe. Jayawe Israel iñemoñaa reta uyapo kërái Tumpa jei wae rupi.

Sɨndaro Egipto pewa reta uaɨkuemoña Israel iñemoñaa reta

⁵ Jokua rambuewe, ɨwɨ Egipto pe amokue wae umbeu imburuwicha wasu pe kërái Israel iñemoñaa reta opa ma oë yuraa ɨwɨ Egipto wi wae. Jayawe mburuwicha wasu jare imborɨa umbɨarakuaa wae reta uyembopochɨ ye Israel iñemoñaa reta kotɨ. Jayawe jei iyupe reta: “¿Mbae ra ko yayapo? ¿Marái ramo ñamaeño Israel iñemoñaa reta re oë yuraa waerä? ¡Echa’ä opa ma ñamɨkañɨ ñaï yandeyuwi yanepione reta!” jei iyupe reta.

⁶ Jayawe jawoi pewa mburuwicha wasu uyapɨkatuka ikarosa ñeräro pewa, jare isɨndaro reta ndiwe yuraa uaɨkuemoña uipɨsɨ waerä tëi Israel iñemoñaa reta.

⁷ Jare wɨraa jae ndiwe opaete ɨwɨ Egipto wi karosa ñeräro pewa, pëti pëti karosa isɨndaro ndiwe jare pëti sɨndaro itenondewa ndiwe. Jokua reta ipɨte wi yuraa owa chiëto karosa ñeräro pewa isɨndaro reta ndiwe. Jokua reta jeräkuaete opaete pe ñeräro pewái ko reta wae.

⁸ Israel iñemoñaa reta oë yuraa yureko reta ɨwɨ Egipto wi upurumɨamɨri pota wae rami. Jare Tumpa umɨtäta chuwi mburuwicha wasu ɨwɨ Egipto pewa ipɨa. Jáeramo mburuwicha wasu isɨndaro reta ndiwe uaɨkuemoña Israel iñemoñaa reta.

⁹ Mburuwicha wasu wɨraa jae ndiwe wi opaete isɨndaro opo kawayu re wae reta, jare opaete karosa ñeräro pewa reta isɨndaro reta wi. Jare opa yuraa uwäe reta mar jembeɨ pe koiño ɨwɨ Pi-hahirot jee wae, jare tëta wasu raɨ Baal-zefón jee wae jowai. Jare uecha reta Israel iñemoñaa reta joko pe ñonoï.

¹⁰ Jayawe Israel iñemoñaa reta uecha yawe yuweru ñonoï mburuwicha wasu jare jeta isɨndaro reta ndiwe ikotɨ, ukɨyete reta. Jare usapɨkai rewe uyerure reta Tumpa pe omborɨ reta waerä.

¹¹ Jare uñeengata reta Moisés pe jare jei reta chupe: “¿Maera pa orereru kua ɨwɨtini wasu pe opa numano waerä?” jei reta. “¿Aramoi ɨwɨ Egipto pe uata ra iko orewe ɨwɨ nuñeñotɨ waerä? ¿Maera pa orerenoe orereru ɨwɨ Egipto wi?” jei reta.

¹² “Ndei ore noë mbowe ɨwɨ Egipto wi ndoe tëi ndewe: ‘Emaeño oreré nduyeyokuiño waerä ɨwɨ Egipto pewa reta pe,’ ndoe ndewe. Añawe numanota noï kua ɨwɨtini wasu pe,” jei reta Moisés pe.

¹³ Jayawe Moisés jei chupe reta: “Awɨye pekɨye,” jei. “Piñemɨmɨräta. Peäro jare pechata peï Tumpa uyapota oï wae kua ara perepɨ waerä. Echa’ä opaete pea sɨndaro reta ɨwɨ Egipto pewa pecha peï añawe wae, ndarau etei ma pecha ye kuri.

¹⁴ Tumpa etei uñerärota pepepɨka pe; jáeramo pepɨakatuño,” jei Moisés chupe reta.

Israel iñemoñaa reta uasa mar mbɨte rupi ɨwɨ utini wae rupi

¹⁵ Jayawe Tumpa jei Moisés pe: “¿Maera pa ndeka chewe yemborɨ?” jei. “Ere Israel iñemoñaa reta pe jekuaeño too reta tenonde.

¹⁶ Jare nde, eupi ndepopoka mar iáramo. Jukuärái ndiyapo yawe, che aipeata ɨ mbɨte rupi. Jare jukuärái Israel iñemoñaa reta uasata mar mbɨte rupi ɨwɨ utini wae rupi,” jei chupe.

^17-18 “Mase, che amɨtätata sɨndaro reta ɨwɨ Egipto pewa ipɨa chuwi reta peraɨkuemoña reta waerä mar mbɨte rupi. Joko pe aechakata aï chembaepuere opaete ɨwɨ pewa reta pe perowaicho reta amɨamɨri wae rupi. Jae reta ko mburuwicha wasu, opaete isɨndaro reta, opaete ikarosa ñeräro pewa reta, jare opaete isɨndaro opo kawayu re wae reta wi. Amɨamɨri reta yawe, opaete ɨwɨ Egipto pewa reta uikuaata che ko jae opaete wae iYa,” jei Tumpa Moisés pe.

¹⁹ Tumpa ombou ma pëti araɨwa, jare jae oo iko Israel iñemoñaa reta jenonde. Jare añawe jae oo uyemboɨ jae reta jaɨkue kotɨ. Jukuärái wi jokua amapɨ̈tu tuicha uyemboɨ wae oo uyekuaa jae reta jaɨkue kotɨ wi.

²⁰ Jare amapɨ̈tu oo upɨta sɨndaro ɨwɨ Egipto pewa reta jare Israel iñemoñaa reta ipäu pe. Jayawe pɨ̈tuɨpɨ yawe, amapɨ̈tu uyeyapo tatarä jendɨ wae jare umbɨembipe kawi Israel iñemoñaa reta pe. Erëi umɨpɨ̈tumimbiete sɨndaro ɨwɨ Egipto pewa reta pe. Jáeramo opaete pɨ̈tu rupi ɨwɨ Egipto pewa reta oya’ä Israel iñemoñaa reta re.

²¹ Jare Moisés upi ipopoka yawe mar iáramo, Tumpa ombou pëti ɨwɨtu täta rupi warasɨ oë wae kotɨ wi. Jukuärái uipea tape echa rami mar mbɨte rupi. Jokua ɨwɨtu uyepeyu opaete pɨ̈tu rupi, jare opa umɨtini tape echa rami mar mbɨte rupi.

²² Jayawe opaete Israel iñemoñaa reta uasa mar mbɨte rupi jokua ɨwɨ utini rupi, echa’ä ɨ uyeyapo ɨwambɨ echa chupe reta iyakata kotɨ jare iyaso kotɨ.

²³ Jaɨkue rupi opaete mburuwicha wasu isɨndaro opo kawayu re wae reta jare ikarosa ñeräro pewa reta isɨndaro reta wi umbɨpɨ uaɨkuemoña Israel iñemoñaa reta mar mbɨte rupi.

²⁴ Erëi Tumpa oï Israel iñemoñaa reta ndiwe jokua amapɨ̈tu tuicha uyemboɨ wae jare tata jendɨ oï wae re. Jare ndei köe mbowe Tumpa umae jokua sɨndaro ɨwɨ Egipto pewa reta mar mbɨte rupi ñonoï wae reta re. Jare Tumpa tuicha rupi uyamondo sɨndaro reta. Jáeramo sɨndaro reta uipota tëi osi.

²⁵ Erëi Tumpa umɨpäaka ikarosa reta chuwi; jáeramo yawaiete uruwata reta waerä. Jayawe sɨndaro reta ukɨye rewe jei reta: “¡Israel iñemoñaa reta iTumpa ko aipo uñeräro oï yandekotɨ jae reta ipepɨka pe! ¡Yasi chuwi!” jei reta.

²⁶ Jokua rambuewe, Israel iñemoñaa reta opa oë yuraa mar jowaicho kotɨ. Jayawe Tumpa jei Moisés pe: “Eupi ye ndepopoka mar iáramo. Jukuärái amɨñatima yeta ɨ jenda pe. Jukuärái ɨ opata umbɨyasoi opaete sɨndaro reta, jare ikarosa ñeräro pewa reta, jare sɨndaro opo kawayu re wae reta wi,” jei chupe.

²⁷ Jayawe Moisés upi ipopoka mar iáramo yawe, aramoiño ɨ uñatima ye jenda pe jare opa uyukenda ye jokua ɨwɨ utini iko wae. Jayawe sɨndaro reta uipota tëi osi reta chuwi, erëi Tumpa opa uyatɨka reta mar japɨpe.

²⁸ Jare ɨ uñatima ye yawe jenda pe, opa umbɨyasoi opaete karosa ñeräro pewa reta isɨndaro reta ndiwe, jare opaete sɨndaro opo kawayu re wae reta, jare opaetei sɨndaro ɨwɨ Egipto pewa reta uaɨkuemoña tëi Israel iñemoñaa reta yureko wae. Pëti awe mburuwicha wasu isɨndaro reta oyepe’ä ɨ wi.

²⁹ Erëi Israel iñemoñaa reta opa uasa mar mbɨte rupi ɨwɨ utini wae rupi ɨ uyeyapo ma yawe ɨwambɨ echa chupe reta iyakata kotɨ jare iyaso kotɨ.

³⁰ Jukuärái jokua ara etei Tumpa uepɨ Israel iñemoñaa reta sɨndaro ɨwɨ Egipto pewa reta wi. Jare Israel iñemoñaa reta uecha sɨndaro reta jetekue mar jembeɨ rupi.

³¹ Uecha reta wi kërái Tumpa imbaepuerete rupi opa umɨamɨri ɨwɨ Egipto pewa reta. Jáeramo uipɨuete reta Tumpa wi. Jare wɨrowia katu reta jese jare Moisés re wi, jae uyeyokui kawi Tumpa pe ramo.