Éxodo 13 - Biblia

Oñono teeta ko Tumpa pewarä opaete Israel iñemoñaa reta taɨrɨpɨ

^1-2 Tumpa jei Moisés pe: “Iñono tee chemaerä opaete Israel iñemoñaa reta taɨrɨpɨ. Echa’ä opaete jae reta chembae ko. Jare opaete Israel iñemoñaa reta imbaemɨmba reta imembɨrɨpɨ kuimbae wi chembae ko,” jei chupe.

Yemɨmandúa mbɨyape levadura mbae pewa

³ Jayawe Moisés jei opaete Israel iñemoñaa reta pe: “Jekuaeño pemandúa kawi kua ara re,” jei. “Echa’ä kua ara Tumpa perenoe jae imbaepuerete rupi ɨwɨ Egipto wi. Joko pe täta piyeyokuise ɨwɨ Egipto pewa reta pe. Kua ara awɨye peu mbɨyape levadura rewe wae.

⁴ Pe reta peë peï kua ara jare kua yasɨ Abib jee wae pe,” jei chupe reta.

⁵ “Tumpa jei peramɨkue reta pe umeeta iko pewe cananeo reta, heteo reta, amorreo reta, heveo reta, jare jebuseo reta iɨwɨ pemaerä. Jayawe Tumpa peruwäe ma yawe jokua ɨwɨ ikawiete wae pe, piyapota ko kua yemɨmandúa mbɨyape levadura mbae pewa. Jukuäraita ko piyapo kua tenondewa yasɨ pe etei añawe wiwe opa año rupi.

⁶ Chiu ara rupi peuta ko mbɨyape levadura mbae wae. Jare chiu ara uwäe ma yawe, pëti yemɨmandúa tembiu pewa rupi pembutuichata ko Tumpa jee.

⁷ Erëi jokua chiu ara rupi awɨye peu mbɨyape levadura rewe wae. Awɨye penoi levadura ani mbɨyape levadura rewe wae opaete peɨwɨ rupi,” jei Moisés chupe reta.

⁸ “Opa año rupi yemɨmandúa piyapo rambuewe, pereta ko pesambiaɨ reta pe kuärái: ‘Kua yayapo ñaï wae, jae ko pëti yemɨmandúa mbaembae ikawiete Tumpa uyapo orewe wae re jae orerenoe yawe ɨwɨ Egipto wi.

⁹ Kua semana oïta pemaerä pëti mbae yemɨmanduaka pewa peresɨwa re jare pepapɨ re oï wae rami. Pemɨmanduata oï mbaembae Tumpa yanemboe wae re pikuaa kawi peyupe waerä jare pere waerä wi. Echa’ä jae ko peTumpa perepɨ ɨwɨ Egipto pewa reta wi wae imbaepuere tuichaete wae rupi.

¹⁰ Jáeramo opa año rupi jokua ara uwäe yawe, piyapota ko kua yemɨmandúa yerowia pewa,” jei.

¹¹ “Jayawe pemanduata ko opaete kua mbaembae reta re Tumpa peruwäe ma yawe cananeo reta iɨwɨ pe. Jokua ɨwɨ arakae Tumpa jei umeeta iko peramɨkue reta pe wae,” jei Moisés chupe reta.

¹² “Joko pe piñono teeta ko Tumpa pewarä opaete peraɨrɨpɨ. Jae ramiño wi opaete perɨmba reta imembɨrɨpɨ kuimbae ikota Tumpa pewarä.

¹³ Erëi pepuere pemee Tumpa pe owecha taurusu wae pëti mburika imembɨrɨpɨ kuimbae ipepɨka pe. Erëi pipota’ä pewa ye yawe Tumpa wi jokua mburika, jayawe peakɨota ko iyayu chuwi piyuka waerä mburika. Erëi pewa yeta ko Tumpa wi opaete peraɨrɨpɨ,” jei Moisés Israel iñemoñaa reta pe.

¹⁴ Jare jei wi chupe reta: “Aramoi rupi pesambiaɨ reta upɨranduta pewe, “¿Marái ramo pa yayapo ñaï kua?’ Jayawe pere chupe reta: ‘Kua yayapo ñaï wae umbɨjaanga oï Tumpa ñanerenoe ɨwɨ Egipto wi wae re imbaepuere tuichaete wae rupi. Echa’ä ɨwɨ Egipto pe yaikuasɨete yaiko.

¹⁵ Mburuwicha wasu ɨwɨ Egipto pewa jekuaeño uyembɨpɨatäta jare umaeño’ä yanderé ñaë waerä jae iɨwɨ wi. Jayawe Tumpa uyukaka opaete ɨwɨ Egipto pewa reta taɨrɨpɨ jare jɨmba reta imembɨrɨpɨ kuimbae wi. Jáeramo ko yayuka ñamee ñaï opaete yanderɨmba reta imembɨrɨpɨ kuimbae Tumpa pe. Erëi opaete pëti pëti wae yande reta yawa ye ñaï yanderaɨrɨpɨ Tumpa wi.’ Jukuäraita pere chupe reta kuri,” jei Moisés Israel iñemoñaa reta pe.

¹⁶ Jare jei wi chupe reta: “Che jae ye aï pewe, kua yemɨmandúa piyapota wae ikota pëti mbae yemɨmanduaka pewa peresɨwa re jare pepapɨ re oï wae rami. Echa’ä pemɨmanduata kërái Tumpa perenoe ɨwɨ Egipto wi imbaepuere tuichaete wae rupi,” jei Moisés chupe reta.

Tumpa uyekuaa chupe reta amapɨ̈tu jare tata echa rami

¹⁷ Jayawe mburuwicha wasu ɨwɨ Egipto pewa umaeño Israel iñemoñaa reta re oë yuraa reta waerä yawe, Tumpa wɨraa’ä reta jokua tape filisteo reta iɨwɨ kotɨ oo wae rupi. Yepe tëi jokoropi mbɨrɨ'ä iko tëi ɨwɨ Canaán chuwi reta, erëi Tumpa uikuaa iko jae reta uipotata’ä uñeräro iko filisteo reta ndiwe. Echa’ä uipotata uñatima reta yewɨ ɨwɨ Egipto pe.

¹⁸ Jáeramo Tumpa wɨraa reta ɨwɨtini wasu rupi Mar Pɨ̈ta jee wae kotɨ, jare mbɨrɨete rupi uyere yuraa reta. Israel iñemoñaa reta oë yuraa ɨwɨ Egipto wi sɨndaro reta yuraa uñeräro ñonoï wae echa rami.

¹⁹ Moisés wɨraaka José ikäwekue jae reta ndiwe, echa’ä jekowe iko rambuewe, José jeika ïru Israel iñemoñaa reta pe Tumpa jowake kuärái: “Pëti ara Tumpa uipararekota oï ñaniñemoñaa reta. Jare jae uepɨ reta yawe kua ɨwɨ Egipto wi, turaa reta wi chekäwekue,” jeika chupe reta.

²⁰ Jayawe Israel iñemoñaa reta oë yuraa tëta wasu raɨ Sucot jee wae wi, jare yuraa uwäe reta ɨwɨ Etam jee wae pe. Ɨwɨ Etam wi umbɨpɨ ɨwɨtini wasu. Joko pe umbɨyemboɨ reta jëta wakapi pewa.

²¹ Jare ara rupi Tumpa oo jae reta jenonde amapɨ̈tu tuicha uyemboɨ wae echa uruwata reta waerä. Jare pɨ̈tu rupi uyekuaa chupe reta tata echa rami umbɨembipe waerä chupe reta. Jukuärái Israel iñemoñaa reta ipuere waerä uwata ara rupi jare pɨ̈tu rupi wi.

²² Tumpa usɨrɨ'ä chuwi reta. Jekuaeño oo jae reta jenonde rupi opa ara rupi jokua amapɨ̈tu tuicha uyemboɨ wae echa, jare pɨ̈tu rupi uyekuaa chupe reta tata echa wae rami.