Éxodo 12 - Biblia

Tumpa umbɨasa wɨraeño iarasɨ chuwi reta wae rewa

¹ Israel iñemoñaa reta ɨwɨ Egipto pe yureko rambuewe, Tumpa jei Moisés jare Aarón pe kuärái:

² “Añawe wiwe kua yasɨ toï yasɨ tenondewarä jare año uyembɨpɨ wae pemaerä,” jei chupe reta.

³ “Pemɨmbeu opaete Israel iñemoñaa reta pe kuärái: ‘Kua yasɨ payandepo ara pe pëti pëti jëtara tu tuiparawo tueru jëtara pewarä pëti mbaemɨmba kuimbae taurusu wae.

⁴ Erëi ime ñëtara mbowɨño wae jare ipuere’ä opa jou yawe jokua mbaemɨmba soo jokua pɨ̈tu woi, jayawe tumee wi jëta ïru uata oï chupe wae pe. Tuepitɨ mbaemɨmba soo pëti pëti wae pewarä.’ Jukuärái pemɨmbeu chupe reta,” jei Tumpa chupe reta.

⁵ “Pemɨmbeu wi chupe reta kuärái: ‘Kua mbaemɨmba imeta ko owecha ani kapura kuimbae ikawi wae pëti año onoi wae, jare imbaerasɨ mbae wae, jare ipere mbaei wae.

⁶ Pëti pëti ñëtara Israel iñemoñaa pewa tuyandareko kawi jɨmba uiparawo wae re kua yasɨ ara catorce rewa. Jare jokua ara uwäe yawe, tuyuka reta kuri pɨ̈tuɨpɨ yawe.

⁷ Joko wi pëti pëti jëtara tu toñono jɨmba juwɨkue jëta jöke iáramo jare iyɨkeyɨke rupi. Jukuärái tuyapo reta pëti pëti tëta kiape mbaemɨmba soo jou ñonoï wae pe,’ pere chupe reta,” jei.

⁸ “Pemɨmbeu wi chupe reta kuärái: ‘Jokua pɨ̈tu tuyapo tou reta asao ñanarokɨ iro wae ndiwe, jare tumɨtɨ̈ra reta mbɨyape levadura mbae wae ndiwe.

⁹ Awɨye tou reta oyɨ mbae wae ani ɨ pe oyɨ wae. Tuyapo reta asao tatäpɨ iáramo jesewe etei – iñäka, jare ipɨta, jare ichuri wi.

¹⁰ Jare opa tou reta jokua pɨ̈tu woi. Ime yawe jembɨrekue, opa tuapɨ reta tata pe ndei köe mbowe.

¹¹ Tuyemonde kawi tukaru reta aramoi pewa yuraa reta waerä. Jare turaa wi ipopoka reta. Tukaru reta ɨmambae,’ pemɨmbeu chupe reta,” jei. “Pemɨmbeu wi chupe reta kuärái: ‘Jokua tembiu ikota piyemɨmandúa waerä chearasɨ ambɨasa ma pewi wae.

¹² Echa’ä jokua pɨ̈tu che asata a aï opaete ɨwɨ Egipto rupi. Jare ayukata aï opaete wae taɨrɨpɨ jare opaete mbaemɨmba reta imembɨrɨpɨ kuimbae wi. Jukuärái ayapota opaete ɨwɨ Egipto pewa reta pe aikuaaka waerä chupe reta itumparaanga reta jae’ä ko Tumpa wae. Echa’ä jaeño ko che Tumpa añetete wae.’ Jukuärái pemɨmbeu chupe reta,” jei Tumpa Moisés jare Aarón pe.

¹³ Jare jei wi chupe reta: “Pemɨmbeu wi chupe reta kuärái: ‘Jokua tuwɨ piñono öke iáramo jare iyɨkeyɨke pe wae uikuaakata piyapo ma che jae pewe wae. Jayawe che aecha jokua tuwɨ yawe, asa wɨraeñota pewi, jare ayapota’ä mbaesusere pewe ɨwɨ Egipto pewa reta pe aiporaraka aï yawe,’ pere chupe reta,” jei.

¹⁴ “Pemɨmbeu wi chupe reta kuärái: ‘Añawe wiwe kua ara re pemanduata ko. Opaete año rupi pe reta jare piñemoñaa reta wi piñemɨmanduata ko kua ara uñeñono tee oï chemaerä wae re.’ Jukuärái pemɨmbeu chupe reta,” jei Tumpa Moisés jare Aarón pe.

Yemɨmandúa mbɨyape levadura mbae pewa

¹⁵ Tumpa jei wi Moisés jare Aarón pe: “Pemɨmbeu wi opaete Israel iñemoñaa reta pe kuärái: ‘Chiu ara rupi peuta mbɨyape levadura mbae wae. Jukuärái wi ara tenondewa pe opa peki opaete levadura perëta pe oï wae. Jare jokua chiu ara reta rupi, ime kía jou yawe mbɨyape levadura rewe wae, jayawe joko wiwe awɨye piñemɨïru jae ndiwe.

¹⁶ Piyembatɨ mokui wese jokua chiu ara reta rupi, tenonde ara pe jare chiu ara pe wi, pembutuicha waerä cheree. Jare jokua chiu ara reta rupi awɨye peparawɨkɨ. Jaeño pepuere piyapo peyupe tembiu.’ Jukuärái pere chupe reta,” jei.

¹⁷ “Pemɨmbeu wi chupe reta kuärái: ‘Añawe wiwe imeta ko piyapo kua yemɨmandúa mbɨyape levadura mbae pewa, echa’ä kua ara etei che ponoe aï ɨwɨ Egipto wi opaete pe reta. Jayawe pe reta jare piñemoñaa reta wi opa año rupi piyemɨmanduata ko kua chiu ara reta re, echa’ä jukuärái che jae piyapo waerä jaeño mái pewa.’ Jukuärái pere chupe reta,” jei.

¹⁸ “Pemɨmbeu wi chupe reta kuärái: ‘Jayawe jokua yasɨ tenondewa jare catorce ara kaaru wiwe veintiún ara kaaru rewa, awɨyeta ko peu mbɨyape levadura rewe wae,’ pere chupe reta.

¹⁹ ‘Jokua chiu ara reta rupi awɨye etei toï levadura perëta japɨpe rupi. Jare ime kía pe reta pepɨte pe oï wae, perëtáɨwa ani ambɨe ɨwɨ pewa, jare jae jou yawe mbɨyape levadura rewe wae, jayawe joko wiwe awɨye piñemɨïru jae ndiwe.

²⁰ Jayawe pemandúa kawi kuri, awɨye etei peu mbae awe uyeyapo levadura ndiwe wae jokua chiu ara reta rupi.’ Jukuärái pemɨmbeu chupe reta,” jei Tumpa Moisés jare Aarón pe.

²¹ Jayawe Moisés umbatɨka opaete Israel iñemoñaa itenondewa reta, jare jei chupe reta kuärái: “Pekua woi pembeu pëti pëti perëtáɨwa reta pe uyuka reta waerä owecha taurusu uiparawo wae uyemɨmandúa reta waerä Tumpa iarasɨ umbɨasa wɨraeño chuwi reta wae,” jei.

²² “Toyokua iyupe reta kapii hisopo, jare jokua pɨpe tuipichɨ reta pëti pëti wae jëta jöke iáramo jare iyɨkeyɨke pe jɨmba uiparawokue juwɨ pe. Jare awɨye kiawe toë oka pe köe rewa,” jei.

²³ “Echa’ä Tumpa outa uasa oo oï opaete ɨwɨ Egipto rupi pëti araɨwa ndiwe. Jokua araɨwa pe Tumpa umee mbaepuere uyuka waerä opaete wae reta taɨrɨpɨ. Erëi Tumpa uecha yawe tuwɨ perëta jöke iáramo jare iyɨkeyɨke pe oï wae, umaeñota’ä araɨwa upuruyuka wae re uike waerä perëta japɨpe,” jei chupe reta.

²⁴ “Kua chiñee tuiko piyapo waerä jaeño mái pewa,” jei.

²⁵ “Jare pe reta peï ma yawe jokua ɨwɨ Tumpa jei umeeta oï pewe wae pe, pe reta jare piñemoñaa reta wi opa año rupi piyemɨmanduata ko kua mbaembae reta re,” jei.

²⁶ “Aramoi rupi pesambiaɨ reta upɨranduta pewe, “¿Marái ramo pa yayapo ñaï kua mbaembae reta?’

²⁷ Jayawe pere chupe reta: ‘Yayuka ñamee ñaï mbaemɨmba Tumpa pewarä yayemɨmandúa waerä Tumpa iarasɨ umbɨasa yandewi wae re. Echa’ä ɨwɨ Egipto pe Tumpa umbɨasa wɨraeño yanderamɨkue reta wi mano. Jare yepe tëi uyuka opaete ɨwɨ Egipto pewa reta taɨrɨpɨ, jesewe uyapo’ä yandewe mbaesusere.’ Jukuäraita pere chupe reta,” jei Moisés chupe reta. Jare uyandu reta yawe jokua ñee reta, Israel iñemoñaa itenondewa reta uñeñono ɨwɨ re jare umbutuicha reta Tumpa jee.

²⁸ Jayawe Israel iñemoñaa reta uyapo opaete Tumpa jei Moisés jare Aarón rupi wae.

Membɨrɨpɨ kuimbae reta umano wae rewa

²⁹ Joko wi pɨare mbɨte rupi, Tumpa ombou uyukaka waerä opaete ɨwɨ Egipto tëta tëta rupi taɨrɨpɨ. Mburuwicha wasu imbaepuere wae taɨrɨpɨ wiwe jare ikuasɨete peresorɨru pe oï wae taɨrɨpɨ retawe opa umano. Umano opaete ɨwɨ Egipto pewa imbaemɨmba reta imembɨrɨpɨ kuimbae wi.

³⁰ Jare jokua pɨare usareko mburuwicha wasu, jare imborɨa umbɨarakuaa wae reta, jare opaete ɨwɨ Egipto pewa reta. Jare opaete wae umbɨpɨ uyao jasɨ katu rewe, echa’ä mbaetɨ pëti awe tëta rupi umano mbae taɨrɨpɨ wae.

³¹ Jokua pɨare woi mburuwicha wasu uenika Moisés jare Aarón, jare jei chupe reta: “¡Pekua woi, pe jare perëtáɨwa reta ndiwe! ¡Peë wɨrae kua oreɨwɨ wi! Pekua pembutuicha peTumpa jee kërái piyerure chewe rami.

³² Opa peraa wi perɨmba reta kërái piyerure chewe rami, jare peë wɨrae pekua. Jare piyerure mii peTumpa pe cheré ipɨakatu waerä chewe,” jei mburuwicha wasu Moisés jare Aarón pe.

³³ Jae ramiño wi opaete ɨwɨ Egipto pewa reta uipɨu rewe umɨaniete woi Israel iñemoñaa reta oë yuraa waerä ɨwɨ Egipto wi. Echa’ä ɨwɨ Egipto pewa reta jei iyupe reta: “Israel iñemoñaa reta oë'ä yuraa yawe yandeɨwɨ wi, opata ñamano,” jei iyupe reta.

³⁴ Jayawe Israel iñemoñaa reta oñono imbatea pe imbɨyaperä levadura mbae uyapo reta wae. Joko wi oñowañowa reta tarapo tuicha wae pɨpe imbatea, jare oñono wɨraa reta iyatiɨ re.

³⁵ Jare ueka reta wi jëta iyɨpɨ rupiwa Egipto pewa reta pe imbaembae jepɨete wae oro pewa jare korepoti tïi wae pewa, jare temimonde wi. Jukuärái uyapo Israel iñemoñaa reta Moisés jei chupe reta wae rupi.

³⁶ Tumpa uyapo ɨwɨ Egipto pewa reta uipɨu waerä Israel iñemoñaa reta wi. Jayawe ɨwɨ Egipto pewa reta umee wɨrae chupe reta opaete mbaembae ueka chupe wae rupi. Jukuärái Israel iñemoñaa reta wɨraa iyupe ɨwɨ Egipto pewa reta wi jeta imbaembae jepɨ wae.

Israel iñemoñaa reta oë yuraa ɨwɨ Egipto wi

³⁷ Jayawe Israel iñemoñaa reta oë yuraa tëta wasu Ramesés jee wae wi tëta wasu raɨ Sucot jee wae kotɨ. Yuraa 600.000 kuimbae reta, jare uyepapa’ä kuña reta jare sambiaɨ reta wi.

³⁸ Wɨraa reta wi jɨmba reta – jae ko owecha, kapura, jare iwaka reta wi. Yuraa wi jae reta ndiwe jeta Israel iñemoñaa mbae wae reta.

³⁹ Jayawe yuraa uwäe reta kiape uputuuta ñonoï wae pe. Joko pe omboyɨ reta mbɨyape levadura mbae ueru reta ɨwɨ Egipto wi wae. Uyapo reta levadura mbae, echa’ä ɨwɨ Egipto pewa reta umɨaniete reta oë yuraa waerä. Jáeramo uepitɨ'ä ara chupe reta omboyɨ reta waerä.

⁴⁰ Israel iñemoñaa reta yureko ma 430 año ɨwɨ Egipto pe.

⁴¹ Jare 430 año ara uwäe yawe, jokua ara etei oë yuraa reta ɨwɨ Egipto wi.

⁴² Jokua pɨ̈tu Tumpa uyandareko jese reta jare onoe reta ɨwɨ Egipto wi. Jáeramo joko wiwe opaete año rupi Israel iñemoñaa reta imanduata ko jokua pɨ̈tu re jare oñono teeta ko reta Tumpa pewarä.

Yemɨmandúa Tumpa umbɨasa wɨraeño chuwi wae rewa

⁴³ Tumpa jei Moisés jare Aarón pe: “Pe reta piyemɨmandúa yawe kërái che asa wɨraeño pewi wae, kua ko jae piyapota wae tembiu yemɨmandúa pewa,” jei. “Ipotawe kía ambɨe ɨwɨ pewa awɨye tou tembiu yemɨmandúa pewa.

⁴⁴ Erëi ipotawe uyeyokui pewe korepoti pe pewa wae ipuere jou jokua tembiu. Erëi kuimbae reta imeta ko uyembɨcircuncidaka jou reta waerä,” jei.

⁴⁵ “Uparawɨkɨ pewe wae reta jare mboupa reta ambɨe ɨwɨ pewa awɨye tou tembiu yemɨmandúa pewa,” jei.

⁴⁶ “Pe reta peu yawe tembiu yemɨmandúa pewa, pëti pëti wae tou jëta japɨpe. Awɨye tonoe jokua soo michi raɨ mii awe oka pe. Jare awɨye tuakɨo wi jokua mbaemɨmba uiparawo wae ikäwekue.

⁴⁷ Opaete Israel iñemoñaa reta tuyemɨmandúa kua mbaembae reta re,” jei Tumpa Moisés jare Aarón pe.

⁴⁸ Jare jei wi chupe reta: “Ime yawe kuimbae ambɨe ɨwɨ pewa iko pe reta ndiwe wae, jare jae uipota uyapo yawe yemɨmandúa pe reta ndiwe wae, tuyembɨcircuncidaka rani, jare jayawe ramo ipuereta ukaru pe reta ndiwe. Joko wiwe pemae jese perëtáɨwa rami. Erëi awɨye etei tou kuimbae uyembɨcircuncidaka mbae wae jokua tembiu yemɨmandúa pewa.

⁴⁹ Kua che jae wae toï pe Israel iñemoñaa reta pewarä jare ambɨe ɨwɨ pewa yureko pe ndiwe wae pewarä wi.” Jukuärái jei Tumpa Moisés jare Aarón pe.

⁵⁰ Jayawe opaete Tumpa jei Moisés jare Aarón pe wae, jukuärái Israel iñemoñaa reta uyapo.

⁵¹ Jare jokua ara etei Tumpa onoe reta ɨwɨ Egipto wi Jacob doce taɨ tee tee iñemoñaa reta rupi.