Éxodo 1 - Biblia

Mburuwicha wasu ɨwɨ Egipto pewa umɨmbarawɨkɨka täta Jacob iñemoñaa reta

¹ Kuärái ko Jacob taɨ reta jae ndiwe yuraa uwäe ɨwɨ Egipto pe wae reta, pëti pëti wae jëtara reta ndiwe.

² Jae reta jee Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad jare Aser jee wae reta.

⁵ Jayawe setenta ko jae opa rewe Jacob iñemoñaa reta yuraa ɨwɨ Egipto pe wae. Jare José joko pe ma iko.

⁶ Joko wi José, jare tɨwɨ, jare tɨkeɨ reta, jare opaete iyaweiwa reta wi indechi jare opa umano reta.

⁷ Erëitu Jacob iñemoñaa reta jeta uñemoña. Jayawe ɨmambae uyembɨjeta reta, jare opa tɨnee reta ɨwɨ Egipto pe. Jukuärái jae reta imbaepuerete uyeyapo reta.

⁸ Jeta año ma uasa yawe, ɨwɨ Egipto pe uyeyapo ambɨe mburuwicha wasurä uikuaa’ä etei José rewa wae.

⁹ Pëti ara jokua mburuwicha wasu jei imborɨa umbɨarakuaa wae reta pe kuärái: “Mase, Israel iñemoñaa reta jetaete ma ko jare imbaepuerete ma ko yandewi,” jei.

¹⁰ “Jáeramo ikawi ko yambɨawái reta waerä awɨye waerä jekuaeño jeta uñemoña reta. Echa’ä ñamaeño jese reta yawe, jare ime ñeräro yawe, jae reta uñemɨïruta yanderowaicho reta ndiwe ñanemɨamɨri waerä. Jare joko wi opata yuraa reta kuri yandeɨwɨ wi.” Jukuärái jei mburuwicha wasu chupe reta.

¹¹ Jáeramo jae reta uyapo Israel iñemoñaa reta ipione retarä täta uyeyokui chupe waerä. Oñono reta wi upurumɨmbarawɨkɨ wae reta umɨmbarawɨkɨ täta waerä Israel iñemoñaa reta umbɨawái reta waerä tëi. Jukuärái Israel iñemoñaa reta uparawɨkɨ täta rupi uyapo mburuwicha wasu pewarä mokui tëta wasu, Pitón jare Ramesés jee wae reta. Jokua tëta wasu reta pe mburuwicha wasu upika tembiurä jare ïru mbaembae reta wi.

¹² Erëi yepe tëi Egipto pewa reta uiporaraka Israel iñemoñaa reta pe, jesewe jeieteño uñemoña reta. Jáeramo Egipto pewa reta umbɨpɨ ukɨye chuwi reta tuicha rupi, echa’ä jetaete ye reta ramo.

^13-14 Jáeramo Egipto pewa reta urukuasɨete jare jeiete umɨmbarawɨkɨ täta rupi Israel iñemoñaa reta. Uyapoka chupe reta adobe jare tuñuu, jare opaete mbarawɨkɨ koo rupiwa wi. Opaete mbarawɨkɨ täta wae Egipto pewa reta uyapoka chupe reta tätaete rupi.

¹⁵ Jaɨkue rupi mburuwicha wasu ueruruka mokui kuña upurumbɨyekuaku wae reta, Sifra jare Fúa jee wae reta. Jae reta omborɨ kuña hebrea reta imembɨ oa yawe.

¹⁶ Jare mburuwicha wasu oyokui reta: “Pemborɨ yawe kuña Israel iñemoñaa reta imembɨ oa oï yawe, pemae jese. Kuimbae yawe, piyuka. Jare kuña yawe, pemaeño tuiko.” Jukuärái oyokui mburuwicha wasu jokua mokui kuña reta.

¹⁷ Erëi jokua mokui kuña upurumbɨyekuaku wae reta uipɨuete Tumpa wi. Jáeramo uyapo’ä reta mburuwicha wasu jei chupe wae. Umaeño iko waerä sambiaɨ kuimbae reta re.

¹⁸ Jayawe mburuwicha wasu ueruruka ye jokua mokui kuña upurumbɨyekuaku wae reta jare upɨrandu chupe reta: “¿Maera pa piyapo jukuärái? ¿Maera pa piyuka’ä jokua sambiaɨ kuimbae hebreo reta che poyokui rami?” jei chupe reta.

¹⁹ Jayawe kuña reta jei mburuwicha wasu pe: “Ore nduyuka’ä reta, echa’ä jokua kuña reta kuña Egipto pewa echa’ä ko. Hebrea reta oa imembɨ yawái mbae rewe jare ɨmambae pewa. Jáeramo ndei ndoo nuwäe mbowe imembɨ oa ma,” jei reta chupe.

^20-21 Jare jokua mokui upurumbɨyekuaku wae reta uipɨu Tumpa wi jeko pewa, Tumpa uyerowia umae jese reta jare umee pëti pëti wae pe jetärarä. Jare Israel iñemoñaa reta jekuaeño uyembɨjetaete jare imbaepuerete reta.

²² Jáeramo mburuwicha wasu oyokui opaete ɨwɨ Egipto pewa reta jare jei chupe reta: “Pemombo kuri ɨ wasu Nilo pe opaete sambiaɨ kuimbae hebreo jaeramo oa wae reta. Erëi oa yawe sambiaɨ kuña, pemaeño tuiko,” jei mburuwicha wasu chupe reta.