Efesios 4 - Biblia

Yande ñaï pëti ramiño Espíritu Santo rupi

¹ Che aï peresorɨru pe ayeyokui yandeYa Jesucristo pe jeko pewa ramo. Mase, yayeyokui Tumpa pe yawe, ipuere ou yandewe jeta yembɨawái reta. Erëi jesewe che aipota pumɨkɨrëɨ mii. Añawe yaikuaa ñaï pëti ramiño ñaï Cristo re ramo, Tumpa uyapo ma jeta mbaembae ikawiete wae yanemaerä. Jáeramo jekuaeño pechaka mii teko kawi, echa’ä jokuaerä ko Tumpa yandeparawo. Piko teko kawi rupi ïru wae reta jowai jae reta ipuere uikuaa waerä pe reta ko jae Tumpa taɨ reta.

² Jayawe pe reta pikota ko kuärái: Piñemɨmichi peyuwi jare pepɨakawi peyupe. Awɨye piñeengata peyupe. Pepɨawasu peyupe jare perupɨa mii peyupe piyerau päwe rewe.

³ Espíritu Santo yandapo ma pëti ramiño yaiko waerä. Jáeramo piyandareko kawi piyé pepɨakatu rewe jukuärái piko waerä.

⁴ Añetete yande ñaï pëti ramiño, echa’ä Cristo jete rami ko ñaï. Jae nunga wi Espíritu Santo yandepɨa pe oï wae pëtiño ko. Jae ramiño wi pëti ramiño yande ñaäro ñaï yarowia katu rewe jokua ara ñanoi waerä opaete mbaembae ikawiete wae Tumpa umeeta oï yandewe wae.

⁵ Ime ñanoi wi pëtiño yandeYa, jare jae iñee re yarowia ñaï pëti ramiño. Jare wi opaete yande yayembɨsakambuka ma ɨ pe yaechaka waerä ïru wae reta pe kërái ñaï ma pëti ramiño Cristo re wae.

⁶ Jare opaete yande ñanoi wi pëtiño yandeRu Tumpa. Jae ko opaete mbaembae iYa. Jae oï yandepɨa pe, jare yande rupi uyapo oï iparawɨkɨ kua ɨwɨ pe. Jukuärái yandepuere yaikuaa kawi pëti ramiño ko ñaï wae.

Cristo uiparawo amokue wae reta uyeyokui waerä jese wɨrowia wae reta pe

⁷ Erëi yepe tëi yande ñaï pëti ramiño, jesewe Cristo ipɨakawi rupi umee yandewe pëti pëti wae pe yaikatu yayapo waerä ambɨe ye ye mbarawɨkɨ yayeyokui chupe waerä.

⁸ Jukuärái ko arakae wiwe Tumpa jei iñeerɨru pe, echa’ä uyekuatía oï Cristo rewa kuärái: “Jae uyeupi oo ye ɨwate kotɨ yawe, oo upurumɨamɨri wae wɨraa oï ipereso reta wae rami. Jare umee mbaembae ikawi wae kuimbae jare kuña reta pe.” Jukuärái uyekuatía oï.

⁹ Jokua uyekuatía oï wae jei yawe, “Jae uyeupi oo ye ɨwate kotɨ yawe,” ¿mbae pa uipota uikuaaka yandewe? Uikuaaka yandewe jae tenonde ou ara wi ɨwɨ pe.

¹⁰ Jare jokua ou wae ko jae Cristo. Joko wi uyeupi oo ye ɨwatete ye ara pe oï waerä opaete kerupi rupi.

¹¹ Jare jae etei uiparawo amokue wae reta uyeyokui waerä jese wɨrowia wae reta pe. Amokue jae reta Cristo omondo jae jee re umɨmbeu waerä jesewa opaete kerupi. Jare wi amokue jae reta jae uiparawo umɨmbeu waerä ñee Tumpa wi etei ou wae. Jare wi amokue jae reta jae uiparawo umɨmbeu waerä ñee ikawi wae Cristo rewa ndei uikuaa wae reta pe. Jare wi amokue jae reta jae uiparawo uyandareko kawi waerä Cristo re wɨrowia wae reta re jare omboe kawi reta waerä Tumpa iñee re.

¹² Kua reta Cristo uiparawo yanemboe waerä kërái yayeyokui kawi waerä Tumpa pe, opaete yande Cristo jete pewa rami ñaï wae reta, jare jukuärái ñanemɨmɨräta waerä Tumpa kotɨ.

¹³ Jare jukuärái opaete yande ñaïta pëti ramiño mbaembae jupiete yarowia wae re jare mbaembae yaikuaa Tumpa Taɨ rewa wae re. Jare jukuärái yakuakuaata ya yandereko oï rewa Cristo jeko rami.

Cristo uipota ñanepɨräta kawi waerä Tumpa kotɨ

¹⁴ Jukuärái ñanepɨräta kawi yawe Tumpa kotɨ, yaikota’ä ma sambiaɨ reta rami. Echa’ä sambiaɨ reta uikuaa’ä mbae re wɨrowia waerä. Pëti ara ipuere wɨrowia pëti mbae re, jare ïru ara ipuere wɨrowia ambɨe re. Erëi ñanepɨräta kawi Tumpa kotɨ yawe, ipuereta’ä kiawe yanembɨtawɨ. Echa’ä ime jeta wae reta ikatu upurumbɨtawɨ waerä kachi oporomboe wae rupi.

¹⁵ Yayemboe kawi yawe, yaikuaata ñaï añetete wae, jare yayerau päwe rewe yamboe yuapɨ yeta ïru wae reta. Jukuärái yaikota Cristo jeko jupi wae rami. Jare jukuärái ko Cristo uipota yaiko waerä, echa’ä jae ko ñanäka rami jare yande ñaï ma ko jae jete rami.

¹⁶ Kua yandepuere yambɨjaanga yanderete re. Echa’ä yanderete pe oï wae ambɨe ye ye ko, jare pëti pëti jokua reta ime onoi iparawɨkɨi. Erëi opaete jokua reta pëtiño ko. Jukuärái wi ko yande Cristo re yarowia wae reta. Cristo ko jae ñanäka rami, jare yande ñaï ma ko jae jete rami. Pëti pëti yande ime ñanoi yandeparawɨkɨi Tumpa uipota yayapo waerä wae. Jare jukuärái yayapo yawe yayerau rewe, jare yayemborɨ päwe rewe yawe, jayawe ñañemɨmɨrätata ñaï Tumpa re.

Këraita ra ikawi yaiko waerä yanderekowe ipɨau wae rupi

¹⁷ Añawe che tae pewe yandeYa Jesús jee re piyandareko kawi piyé. Awɨye ma piko Cristo re wɨrowia mbae wae reta yureko wae rami, echa’ä jae reta ipɨayemɨngeta reta usiriwe’ä ko maeräwe.

¹⁸ Jae reta uyembɨpɨatäta Tumpa wi, jare uipota’ä uyapɨsaka reta ñee ikawi wae Tumpa rewa. Jáeramo ñonoï reta pɨ̈tumimbi pe wae echa jare mbɨrɨ Tumpa tekowe ipɨau wae umee wae wi.

¹⁹ Imara’ä ma reta. Jáeramo opa imbɨkere reta jare uyapo reta opaete mbaembae kachi waeño.

²⁰ Erëi jokua jae’ä ko pe reta piyemboe wae piyemboe yawe Cristo rewa. Echa’ä piyemboe ma ko awɨye waerä piko jukuärái.

²¹ Añawe piyemboe ma Cristo re ramo, pikuaa peï añetete wae Cristo rupi ou wae.

²² Jare piyemboe ma kërái imeta ko opa peya peyuwi pereko indechikue awɨye piko waerä kërái tenonde pikose wae rami. Echa’ä tenonde pikose pere wae rupiño, jare piyembɨtawɨ piko perete uipota wae rupiño. Erëi jokua mbaembae ko pererukachita.

²³ Jare pe reta piyemboe ma wi pemaeño waerä Espíritu Santo re umbɨpɨau waerä pepɨa Tumpa kotɨ,

²⁴ jare kërái imeta ko piko pereko ipɨau wae rupi. Jukuärái piyapota ikawi waeño jare jupi waeño. Jukuärái ko Tumpa jeko jare jukuäraita ko pereko wi.

²⁵ Jáeramo awɨyeta ma ko papu peyupe. Pereñoi añetete wae perapicha pe. Echa’ä yande Cristo re yarowia wae reta pëti ramiño ko ñaï jete rami.

²⁶ Aramoi kía ndiwe pepochɨ yawe, piyandareko kawi piyé awɨye waerä piyawɨ Tumpa kotɨ. Jayawe piyeapɨkatu jawoi pewa ndei ara uasa mbowe.

²⁷ Echa’ä yayeapɨkatu’ä yawe jupiwoi, ñamaeño ñaï Añawasu re uyuwanga katu yanderé waerä.

²⁸ Imondase wae awɨye ye ma timonda. Añawe Cristo re wɨrowia wae ko; jayawe jukuärái tuiko. Añawe wiwe tuyapo iyupe mbarawɨkɨ ikawi wae ime onoi waerä imbaembaerä jare ipuere wi omborɨ waerä iparawete wae.

²⁹ Jare piyandareko kawi piyé mbae pere wae rupi. Awɨye ñee ikawi mbae wae pemoë. Pemoë ñee ikawi waeño pemɨkɨrëɨ waerä ïru wae reta. Jare jukuärái ipotawe kía piñee re uyapɨsaka wae uñemɨmɨrätata Tumpa re.

³⁰ Awɨye pembɨpɨatɨtɨ Espíritu Santo Tumpa umee pewe wae. Echa’ä Tumpa umee yandewe Espíritu Santo uikuaaka waerä yandewe jae umbɨepɨ ma ko yande yaiko waerä jae imaerä jaeño mái pewa. Jare Espíritu Santo ñanoi ramo, uikuaaka wi yandewe kërái ara taɨkuewa pe Tumpa opata yanderepɨ oï opaete mbae ikawi mbae wae wi.

³¹ Jare awɨye ma pembasɨ piko peyupe. Peya opaete mbochɨ jare arasɨ reta. Awɨye ma piñeengata peyupe. Awɨye ma piyemɨngeta kachi piyé. Jare awɨye ma piyapo ikawi mbae wae peyupe.

³² Pikota ko kuärái: Pikota ko piyerau päwe rewe jare pepɨakawita ko peyupe. Kërái Cristo rupi Tumpa imandua’ä ma yandewe ikawi mbae yayapo wae re, jukuärái wi pe reta awɨye pemandúa peyupe ikawi mbae piyapo wae re. Jukuäraita ko piko.