Efesios 2 - Biblia

Tumpa yanderepɨ teko ñanoi ikotɨ wae wi ipɨakawi ramo

¹ Erëi ndei Jesucristo re perowia mbowe, pemano wae echa piko mbɨrɨ tekowe iYa wi, pereko kachi rupi jare piyawɨ Tumpa kotɨ jeko pewa.

² Jukuärái pe reta pikose, echa’ä jekuaeño pemomoe piko kua ɨwɨ pewa reta jeko kachi wae re. Piyeyokuise piko Añawasu pe. Jae ko opaete aña reta imburuwicha, jare yandepuere’ä yaecha wae. Jae ko espíritu ikawi mbae wae jare uparawɨkɨ oï imbaepuere rewe opaete Cristo re wɨrowia mbae wae reta ipɨa pe.

³ Jare pe judío mbae piko wae retaño’ä ko jukuärái pikose, echa’ä ore judiorä nduiko wae jukuärái wi nduikose. Añetete opaetei yande jukuärái yaikose ndei yarowia Jesucristo re mbowe. Yande yaikose yae wae rupiño, jare jekuaeño yayapo mbaembae kachi wae yandepɨayemɨngeta jei wae rupiño. Jáeramo kua yandereko indechikue jeko pewa, jupi ko Tumpa uiporaraka yandewe waerä tëi opaete ïru wae reta pe uiporarakata oï wae rami.

⁴ Erëi Tumpa ipɨakawiete jare yanderauete.

⁵ Jáeramo yepe tëi ñamano wae echa yaiko Tumpa wi yayawɨ ikotɨ jeko pewa, jesewe Tumpa umee yandewe tekowe ipɨau wae. ¿Kërái ra ko jokua? Yaikuaa ñaï yandeRu Tumpa umbɨjekowe ye Cristo ueru umanokue wae reta ipɨte wi. Jukuärái rami Tumpa yanembɨjekowe ye ma jae yandapo pëti ramiño Cristo re yawe. Jayawe Tumpa ipɨakawi tuicha ramo, yanderepɨ ma teko ikotɨ ñanoi wae wi.

⁶ Jare jokuaño’ä ko. Jae nunga wi yandeRu Tumpa wɨraa Cristo ara pe, jare jae uwapɨ oï Tumpa iyɨke pe iyakata kotɨ jare onoi mbaepuere opaete wae re. Jukuärái rami wi Tumpa umae yanderé yawapɨ ñaï Cristo ndiwe ara pe ñanoi waerä mbaepuere jae ndiwe. Jukuärái ko, echa’ä yande ñaï pëti ramiño Cristo re ramo.

⁷ Jukuärái Tumpa uyapo yandewe uikuaaka kawi waerä opaete wae pe taɨkue rupi kërái tuichaete ko Tumpa ipɨakawi yanemaerä Jesucristo rupi.

⁸ Echa’ä Cristo re yarowia wae rupi Tumpa yanderepɨ mbaembae yayawɨ ikotɨ wae wi. Jare jukuärái uyapo yandewe yambɨepɨ mbae rewe ipɨakawi ramo. Yande yamɨngana wae rupi’ä ko Tumpa yanderepɨ.

⁹ Mbaetɨ kía mbaembae ikawi wae uyapo wae rupi ipuere jaei uyerepɨ. Jáeramo mbaetɨ kiawe ipuere jei uyembutuicha rewe: “Jupi ayapo wae rupi ko ayerepɨ ma.”

¹⁰ ¿Maera ra yayapo jayawe mbaembae ikawi wae? Mase, Tumpa umbɨpɨau ma yanderekowe jae yandapo pëti ramiño Cristo re yawe. Jare añawe yanderekowe uyembɨpɨau ma ramo, Tumpa uipota yayapo waerä mbaembae ikawi wae tenonde wiwe jae uipota yayapo waerä wae. Echa’ä jokuaerä ko Tumpa yandapo.

Cristo yanembɨpɨakatu judío reta jare judío mbae wae reta ndiwe, jare Tumpa ndiwe wi

¹¹ Añawe che aipota jae pewe, pe judío mbae piko wae, kuärái: Pemandúa kërái pikose mbɨrɨ Tumpa wi, echa’ä pesɨ wi pea judío mbae wae reta ramo. Jáeramo judío reta jei pekotɨ: “Jokua ko jae uyembɨcircuncidaka mbae wae reta, jare mbɨrɨ Tumpa wi yureko wae reta,” jei reta pekotɨ. Jukuärái jokua judío reta uyererowia katu uyembɨcircuncidaka ramo. Jae reta wɨrowia tëi jokua uyembɨcircuncidaka wae rupi iko ma Tumpa pewarä. Erëi jokua yembɨcircuncida oï jete ipire reño, jare umbɨambɨe’ä oï ipɨa chuwi.

¹² Pemandúa jokua ara reta rupi pe judío mbae piko wae pikose mbɨrɨ Cristo wi. Jare opaete mbaembae ikawiete wae Tumpa jei umeeta iko Israel iñemoñaa reta pe wae pemaerä'ä ko, echa’ä Israel iñemoñaa reta’ä ko pe reta ramo. Jare jokua yemɨngeta Tumpa arakae uyapo Israel iñemoñaa reta ndiwe wae pemaerä'ä ko. Jáeramo pikoiñose kua ɨwɨ pe mbɨrɨete Tumpa wi.

¹³ Erëi añawe Tumpa pemokoiño ma iyé Jesucristo rupi, echa’ä Cristo upɨyere juwɨ kurusu re umbái waerä teko penoi Tumpa kotɨ wae. Jare Cristo re perowia ramo, Tumpa peapo ma pëti ramiño jese.

^14-15 Pe reta pikuaa peï tenonde yawe ore judiorä nduiko wae numae kawi’ä peré. Echa’ä pe reta pikuaa’ä jare piyapo’ä Moisés arakae uikuatía wae. Jare oremaerä jokua ko jae orereko iyɨpɨ. Jáeramo ore nduyembɨsɨrɨse pewi jare nduyembowaichose pe reta ndiwe. Erëi añawe Cristo kurusu re umano wae rupi opa ma umbái jokua ñamɨtäa imese wae. Echa’ä añawe wiwe kiawe oyata’ä Tumpa re Moisés uikuatía wae rupi. Jáeramo mbaetɨ ye ma mbae re yayembowaicho waerä yande yepái. Cristo ipɨayemɨngeta ko jae yandapo waerä pëti ramiño iyé, judío jare judío mbae wae reta, jare jukuärái yanembɨpɨakatu waerä yande yepái.

¹⁶ Jare jukuärái jae uyapo ma imano kurusu re wae rupi. Añetete Cristo imano rupi yanembɨpɨakatu ma yande yepái jare jae nunga wi yanembɨpɨakatu ma Tumpa ndiwe. Jáeramo mbaetɨ ye ma yayembowaicho ñaï yande yepái.

¹⁷ Jayawe Cristo ou umɨmbeu waerä yandewe ñee ikawi wae kërái yayeapɨkatu waerä Tumpa ndiwe. Jokua ñee ko oremaerä, ore koiño nduiko Tumpa wi wae. Jare pemaerä wi ko, pe reta tenonde pikose mbɨrɨ Tumpa wi wae.

¹⁸ Jukuärái Cristo uyapo yandewe ramo, päwe rewe yandepuere yaya yandeRu Tumpa re Espíritu Santo rupi.

Opaete yande Cristo re yarowia wae reta ñaï Tumpa jëta rami

¹⁹ Jáeramo pe reta judío mbae piko wae ambɨe’ä ma ko Tumpa pewarä, jare piyembɨyao tee’ä ma ko Tumpa imaerä iko wae reta wi. Añawe pe reta wi ko Tumpa jëtararä peï waerä ara pe opaete ïru uñeñono tee Tumpa pewarä wae reta ndiwe.

²⁰ Yandepuere yambɨjaanga pëti tëta re: Opaete yande Cristo re yarowia wae reta ko jae Tumpa jëta rami. Pëti tëta ikawi oï waerä, imeta ko ikawi oï iwapɨka. Tumpa jëta iwapɨka ko jae Jesús jemimboe tenondewaete reta jare Cristo rewa tenondete umɨmbeu wae reta. Jare Jesucristo etei ko jae tëta iwapɨka ita tenondewaete uñeñono wae rami.

²¹ Jare yaikuaa ñaï ime yawe kía tëta uyapo wae, jae oñono opaete ladrillo uyepɨndekua rewe jenda jenda pe kawi jëtarä uyapo kawi waerä. Jukuärái wi yande reta pëti ramiño ñaï Cristo re ramo, Tumpa ñaneñono kawi pëti pëti wae yanderenda rupi. Jukuärái Tumpa yandapo oï itupaorä jupi wae rami.

²² Jare pe reta judío mbae piko wae peï pëti ramiño ore ndiwe. Jukuärái opaete rewe yande reta ko jae Tumpa jëta rami jare oï pɨpe Espíritu Santo.