Efesios 1 - Biblia

Pablo wɨraaka saludo

¹ Cherɨkeɨ reta, cherɨwɨ reta, jare cherindɨ reta tëta wasu Éfeso pe piko wae, che araaka aï pewe saludo yandeYa Jesucristo jee re. Che ko jae Pablo. YandeYa Jesucristo chemondo jae jee re amɨmbeu waerä jesewa, echa’ä jukuärái Tumpa uipota ramo. Jare aikuatía aï kua tupapire pewe Cristo re perowia wae reta pe. Pe reta ko jae Tumpa peñono tee jae imaerä.

² YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Pablo uikuaaka yandewe kërái Tumpa uyapo mbaembae ikawiete wae yanemaerä, echa’ä pëti ramiño ñaï ramo Cristo re

³ ¡Yambutuicha yandeRu Tumpa jee! Jae ko yandeYa Jesucristo Tu. Yambutuicha jae jee, echa’ä jae yandapo pëti ramiño Cristo re. Jare pëti ramiño ñaï Cristo re ramo, jae ombou yandewe ara wi opaete mbaembae ikawiete wae ñanemɨmɨräta waerä Tumpa re.

⁴ Jukuärái Tumpa uipota uyapo yandewe opaete yande pëti ramiño ñaï Cristo re wae. Echa’ä iyɨpɨ wiwe jae yanderau ndei ɨwɨ uyapo mbowe, jare yandeparawo ñaï waerä jae imaeräño jare yandereko mbae wae rami.

^5-7 Jare wi iyɨpɨ wiwe Tumpa yandeparawo yaiko waerä taɨ jare tayɨ retarä yanderauete ramo. Jokua ko jae Tumpa ipɨayemɨngeta uyerowia rewe uyapota iko wae, echa’ä jukuärái jae uipota ramo. Jáeramo ipɨakawi ramo, ombou Cristo kua ɨwɨ pe. Jare Cristo upɨyere juwɨ opa umbái waerä yandewi mbaembae yayawɨ Tumpa kotɨ wae. Jukuärái jae yanderepɨ ma jokua teko yareko wae wi. Jayawe Tumpa yandapo ñaï waerä pëti ramiño Taɨ uauete wae re. Jáeramo uyerowia umae yanderé. Jukuärái Tumpa uyapo yandewe yambutuicha waerä Tumpa jee ipɨakawi tuichaete yandewe ramo.

⁸ ¡Tuichaete ko Tumpa ipɨakawi yandewe wae! Echa’ä jae umee yandewe arakuaa. Jáeramo yandepuere yaikuaa añetete wae Tumpa rewa.

⁹ Jukuärái Tumpa uikuaaka yandewe ipɨayemɨngeta ikawiete wae. Jokua ko jae mbaembae uyapota oï Cristo rupi wae. Jare jokua ipɨayemɨngeta tenonde yawe jae uikuaaka’ä kía pe awe. Erëi añawe uyerowia rewe Tumpa jokua uikuaaka ma yandewe.

¹⁰ Jare Tumpa ipɨayemɨngeta ko kuärái: Jokua ara jae jei wae uwäe yawe, umbatɨta opaetei ara pe ñonoï wae reta jare ɨwɨ pe ñonoï wae reta wi, jare oñonota Cristo iko waerä jae reta imburuwicha wasurä jaeño mái pewa.

¹¹ Jare yande ñaï pëti ramiño Cristo re ramo, Tumpa umee yandewe yandepuere yayekou waerä opaete mbaembae Tumpa onoi Cristo pewarä wae re. Jukuärái ko tenonde wiwe Tumpa ipɨayemɨngeta. Jare jokua jae uipota uyapo wae, jae jekuaeño uyapo.

¹² Jare jae ipɨayemɨngeta wi ko ore judiorä nduiko wae rani ndorowia waerä Cristo re, jare jukuärái rupi jae jee uyembutuichaka waerä.

¹³ Erëi oremaeräño’ä ko kua mbae ikawi wae. Echa’ä añawe pemaerä wi ko, pe judío mbae piko wae reta. Echa’ä pe reta piyandu yawe ñee añetete wae Cristo rewa jare perowia jese yawe, Tumpa peapo jae imaerä. Jare umee wi pewe Espíritu Santo kërái jae jei arakae wiwe umeeta iko jese wɨrowia wae reta pe wae. Jukuärái Tumpa umee yandewe Espíritu Santo uikuaaka waerä yandewe Tumpa pewa ma ko yande wae jaeño mái pewa.

¹⁴ Jare jokuaño’ä ko. Jae nunga wi Espíritu Santo ñanoi ramo, uikuaaka yandewe pëti ara imeta ñanoi opaete mbaembae Tumpa jei umeeta yandewe wae. Jokua ara ramo opaete yarowia jese wae reta Tumpa yanderepɨta oï opaete mbae ikawi mbae wae wi. Jayawe, ¡yambutuicha Tumpa jee jae imbaepuere tuichaete ramo!

Pablo uyerureñoi Tumpa pe arakuaa umee waerä chupe reta

¹⁵ Jayawe hermano reta, jeräkua chewe perowia Jesucristo re wae jare kërái piyerau wae.

¹⁶ Jare jokua ayandu wiwe jekuaeño amee aï yasurupái Tumpa pe jae uyapo pewe wae re. Jare ayerureñoi aï Tumpa pe peré.

¹⁷ Aeka aï chupe umee pewe waerä arakuaa Espíritu Santo rupi, jukuärái pikuaa kawi waerä Tumpa, yandeYa Jesucristo Tu jupiete ye wae.

¹⁸ Aeka aï chupe wi pembɨpɨarakuaa katu waerä, jukuärái pikuaa kawi waerä kërái ikawiete ye ko opaete mbaembae Tumpa ime onoi pemaerä wae. Jare jokua ko peäro peï perowia katu rewe, echa’ä jukuärái Tumpa umeeta oï opaete kía jae imaerä wae pe. Añetete ikawiete ye ko.

¹⁹ Jare aeka aï chupe wi pikuaa kawi waerä tuichaete ye ko Tumpa imbaepuere yanemborɨ waerä opaete yande Cristo re yarowia wae reta. Jukuärái ayerureñoi aï Tumpa pe peré. Jayawe che aipota pikuaa kawi waerä Tumpa imbaepuere rewa. Tumpa uikuaaka ma opaete wae pe tuichaete ye ko imbaepuere.

Tumpa umee Cristo pe mbaepuere opaete wae re

²⁰ Echa’ä jokua imbaepuere rupi Tumpa umbɨjekowe ye Cristo ueru umanokue wae reta ipɨte wi. Jare jokua imbaepuere rupi Tumpa wɨraa Cristo ara pe jare umee chupe uwapɨ waerä iyɨke pe iyakata kotɨ.

²¹ Joko pe Tumpa ndiwe Cristo ime onoi mbaepuere tuichaete wae opaete mburuwicha reta ara jare ɨwɨ pe ñonoï wae reta re. Jukuärái Cristo Tu ndiwe imbaepuere tuichaete ko opaete wae reta mbaepuere ime onoi wae wi añawe wiwe jare jaeño mái pewa.

^22-23 Jayawe Tumpa umee Cristo pe mbaepuere opaete mbaembae re. Jare umee wi chupe iko waerä opaete jese wɨrowia wae reta iYarä. Kua yandepuere yambɨjaanga yanderete re. Echa’ä ñanäka ime onoi mbaepuere yanderete re. Jukuärái wi Cristo ko ñanäka rami jare ime onoi mbaepuere yanderé. Jare opaete yande Cristo re yarowia wae reta ñaï ma ko jae jete rami. Jae imbaepuere tuichaete ye ko jare opa tɨnee ara jare ɨwɨ. Jare jokua imbaepuere uparawɨkɨ oï yande rupi uyeyapo waerä jae jei wae.