Colosenses 2 - Biblia

¹ Jare che aipota pe reta pikuaa waerä kërái täta aparawɨkɨ aï ikawi waerä pewe. Jare pereño’ä ko chepɨa’ä aï. Echa’ä ime Cristo re wɨrowia wae reta tëta wasu Laodicea pe wi. Jare jese reta wi che chepɨa’ä aï. Añetete che aparawɨkɨ aï ikawi waerä opaete Cristo re wɨrowia wae reta pe – jae ko chekuaa wae reta jare ndeiño chekuaa wae reta wi.

² Echa’ä aipotaete pe reta pekɨrëɨ waerä jare piko waerä pëti ramiño piyerau päwe rewe. Jare aipota wi pe reta pikuaa kawi waerä jokua ñee Tumpa tenonde yawe uikuaaka’ä Cristo rewa wae, jare jukuärái pepɨakatu waerä añetete pewa.

³ Pipota yawe pearakuaa, jayawe Cristo re uñewäe arakuaa. Jare pipota yawe pikuaa mbae rewa, Cristo uikuaa opaetei mbaembae. Jokua arakuaa ko jae mbae ikawiete ye wae yanemaerä.

⁴ Kua mbaembae che jae pewe awɨye waerä kía pembɨtawɨ yemboe jupi echa wae rupi.

⁵ Echa’ä yepe tëi che etei aï'ä pe reta ndiwe, erëi chepɨa oï pe reta ndiwe. Jare che tuicha rupi ayerowia aï. Echa’ä jeräkua ma chewe pe reta peï pëti ramiño päwe rewe jare jekuaeño perowia kawi peï Cristo re.

Cristo ikawiete ko arakuaa ɨwɨ pewa wi

⁶ Jayawe pe reta perowia ma Jesucristo re peYarä iko ramo, jayawe jekuaeño piko Jesucristo uipota wae rupi. Echa’ä pe reta pëti ramiño ko peï jese.

⁷ Piñemɨmɨräta Cristo re piko waerä pëti temitɨ kɨpe japo oï wae rami jare pëti tëta ikawi iwapɨka wae rami. Jare piñemɨatangätu perowia kawi waerä mbaembae añetete wae re, echa’ä jukuärái piyemboe ma piyapo waerä. Jare jekuaeñota ko pemee yasurupái Tumpa pe.

⁸ Jare piyandareko kawi piyé awɨye waerä kía pembɨtawɨ jae iyarakuaa rupiño. Jokua arakuaa jupi wae echa ko, erëi ou’ä ko Cristo wi. Ou kuimbae reta wiño, jare jae ko arakuaa kua ɨwɨ pewaño.

⁹ Cristo ko jae ikawiete wae opaete jokua nunga arakuaa wi, echa’ä Cristo ko jae Tumpa etei uyeyapo kuimbaerä wae.

¹⁰ Jare jae ko opaete mburuwicha reta ara pewa jare ɨwɨ pewa iYa. Jare pe reta pëti ramiño peï Cristo re ramo, uata’ä etei pewe mbae awe penoi waerä tekowe opa mbae wae.

¹¹ Jare pe reta pëti ramiño peï Cristo re ramo, piyembɨcircuncidaka rami ma ko peï. Erëi mbaetɨ ko kërái kuimbae reta uyapo rami. Jae reta kía umbɨcircuncida yawe, ueki chuwi ipire raɨ mii. Erëi jokua uyeyapo pewe wae ikawiete ko. Echa’ä Cristo etei umbɨsɨrɨ ma pewi pereko indechikue imbaepuere iko peré wae. Añawe wiwe mbaetɨ ma onoi peré mbaepuere jokua kɨrëɨ mbae kachi piyapo waerä wae.

^12-13 Ani yandepuere yae kuärái: Ndei Cristo re perowia mbowe, pe reta pikose pere wae rupiño. Jáeramo jekuaeño piyawɨse Tumpa kotɨ, jare jokua jeko pewa pemano wae echa piko Tumpa wi. Erëi pëti ara pe reta piyandu kërái Tumpa imbaepuere tuichaete wae. Jare piyandu wi kërái jae umbɨjekowe ye ueru Cristo umanokue wae reta ipɨte wi wae. Jare perowia yawe jae imbaepuere perepɨ waerä wae re, jayawe Tumpa peapo pëti ramiño Cristo re etei. Kua uipota jei Cristo umano yawe, jare teöwerenda pe oñono reta yawe, pe reta wi pemano rami jae ndiwe. Jare Cristo ikowe ye yawe, pe reta wi Tumpa pembɨjekowe pɨau ye rami ko Cristo ndiwe. Yande ñanoi tekowe ipɨau wae, echa’ä Tumpa opa ma umbái yandewi mbaembae yayawɨ ikotɨ wae.

¹⁴ Añetete jokua mbaembae yayawɨ wae uyekuatía iko tupapire re rami opaete yanembɨjekose iko jese wae ndiwe. Jare jokua ko Tumpa opa ma uikutu kurusu re rami Cristo uyekutuka iko yawe. Jáeramo yande mbaetɨ ma teko pe ñaï Tumpa jowai yayawɨ wae re.

¹⁵ Jare jokuaño’ä ko. Cristo umano kurusu re yawe, jae opa umɨamɨri opaete aña reta jare upɨ̈ro chuwi reta imbaepuere jae reta ime wɨreko yanderé wae. Jare joko wi jae umɨmichika reta opaete wae jowake. Jare jukuärái Cristo uechaka opaete wae pe jae ko upurumɨamɨri wae.

¹⁶ Jáeramo opaete kua mbaembae rupi che jae aï pewe kuärái: Awɨye piyembɨpɨa’ä kía pembɨjeko yawe ipotawe mbaembae peu wae re, jare ipotawe ara yemɨmandúa Tumpa pewa jare yasɨpɨau pewa piyapo’ä wae re, jare ara mbutuu piyapo’ä jae reta rami wae re.

¹⁷ Añetete ko Tumpa jei arakae judío reta pe jokua mbaembae uyapo reta waerä. Erëi jokua mbaembae jaeño uyembɨjaanga iko kía outa iko wae re. Erëi añawe ou ma ko. Jae ko Cristo etei.

¹⁸ Jáeramo ime yawe kía uipota pembɨjeko pe reta pembutuicha’ä Tumpa jee kërái jae uyapo rami wae re, awɨye piyapɨsaka jese. Jokua nunga reta uipota uñemɨmichiraanga opaete wae jowake. Jare umbutuicha reta araɨwa reta, jare jekuaeño jei reta uyembɨkate rewe, “Tumpa uikuaaka chewe,” jei reta tëi. Iyupe reta jae retái ipɨayemɨngeta ikawi oï tëi, jare uyembɨkate reta jokua re.

¹⁹ Erëitu jae reta uyembɨsɨrɨ ñonoï yandeYa Cristo wi, yepe tëi jae ko ñanäka rami jare yande reta ko jae jete rami. Añetete Cristo yandapo pëti ramiño kërái ñanekäwe reta iyuapɨyuapɨ wae jare yanderayɨ reta uyapo pëti ramiño yanderete rami. Jare jukuärái jekuaeño yakuakuaa ñaï Tumpa kotɨ kërái Tumpa uipota rami.

²⁰ Pe reta pikuaa peï kërái ko kua ɨwɨ jeko wae. Jare pe reta pëti ramiño peï Cristo re ramo, pemano rami ma ko Cristo ndiwe kua ɨwɨ jeko wi. Jáeramo jokua teko reta ndarau ye ma ime onoi mbaepuere peré. Jayawe, ¿maera pa jekuaeño pipota piñemee ye piko waerä kua ɨwɨ jeko rupi?

²¹ Kua ɨwɨ jeko yanemboe tëi kuärái: “Yande yaipota yayembujupi yawe Tumpa kotɨ, ime mbaembae yandepuereta’ä yaipɨsɨ wae. Jare ime mbaembae yandepuereta’ä yau wae. Jare ime ïru mbaembae re yandepuereta’ä yaya wae.” Jukuärái yanemboe tëi reta.

²² Erëi opaete kua mbaembae ndarau iko ɨma, jare opata ɨmambae yande yaiporu ma yawe. ¿Këraita pa jayawe ipuere yanemborɨ yayembujupi waerä Tumpa kotɨ? Kuimbae retaño ko yanemboe tëi jukuärái.

²³ Añetete jokua mbaembae jei reta yandewe yayapo waerä wae arakuaa katu wae echa ko. Echa’ä kía jukuärái iko wae jatangätu wae echa umbutuicha waerä Tumpa jee, jare uñemɨmichi oï wae echa. Jare jae nunga wi täta uiporaraka jete pe umbɨyerowia waerä tëi Tumpa. Erëitu kua nunga teko reta ndarau etei yanemborɨ awɨye waerä yaiko yanderete uipota uyapo wae rupiño.