Apocalipsis 9 - Biblia

¹ Jayawe ïru araɨwa umɨñee jemimbɨ wasu. Kua re pandepo ma umɨñee. Jare umɨñee yawe, aecha ɨwɨ pe pëti yasɨtata echa wae ara wi oakue. Jare uñemee chupe ɨwɨkua wasu juwa mbae wae illave.

² Jayawe jae uipea ɨwɨkua wasu. Jare uipea ma yawe, oë tatäti tata tuichaete wae wi tatäti oë wae rami. Jare warasɨ uyekuaa’ä tatäti ɨwɨkua wi oë wae jeko pewa. Jáeramo opa pɨ̈tumimbi.

³ Jare tatäti wi oë tuku reta ɨwɨ re, jare tuku reta opa umbapɨ ɨwɨ. Jare uñemee chupe reta mbaepuere oñopi waerä ɨwɨ pewa reta chumɨkaräpe ñanopi wae rami.

⁴ Jare Tumpa jei tuku reta pe awɨye urükumewa waerä opaete temitɨ jokɨ reta ɨwɨ pe oï wae jare ɨwɨra reta. Jaeño ipuere umbɨpere reta jokua mbaetɨ Tumpa imarka jesɨwa re onoi wae reta.

⁵ Jare mbaepuere uñemee chupe reta pandepo yasɨ pewa uiporaraka waerä ɨwɨ pewa reta pe. Jasɨeteta chupe reta, pëti chumɨkaräpe ñanopi wae rami. Erëi jokua tuku reta ipuere’ä upuruyuka.

⁶ Jare jokua ara reta rupi ɨwɨ pewa reta uipotata tëi umano täta uiporara ñonoï ramo. Erëi ndarau ipuere reta, echa’ä mano usɨrɨ ma chuwi wae echa uyenduta reta.

⁷ Jare jokua tuku reta uyekuaa kawayu uyeyapɨkatu uñeräro pewarä wae echa chewe. Jare iñäka re onoi corona oro pewa echa. Jare jowa uyekuaa kuimbae jowa echa.

⁸ Jare ía puku kuña ía echa. Jare jäi reta uyekuaa yawa jäi echa.

⁹ Jare ipɨtía re onoi yopiaka jiero pewa echa. Jare uwewe reta yawe, ipepo täta jɨapu. Uyendu chewe jetaete kawayu reta ñeräro pe karosa ndiwe yuraa ñonoï wae echa.

¹⁰ Jare tuku reta juwai chumɨkaräpe juwai echa. Jare juwai iyapɨ re ipöpia onoi wae echa. Jare joko pe onoi reta mbaepuere uiporaraka waerä ɨwɨ pewa reta pe pandepo yasɨ pewa.

¹¹ Jare jokua tuku reta imburuwicha wasu ko jae araɨwakue. Jae ime onoi mbaepuere opaete jokua ɨwɨkua wasu juwa mbae wae pe ñonoï wae reta re. Jare jae jee ko hebreo ñee pe Abadón. Jare griego ñee pe jae jee ko Apolión.

¹² Jokua ko jae tenondewaete mbaesusere wasu araɨwa umɨmbeu wae. Erëi mokui mbaesusere ye uyeyapota oï.

¹³ Jayawe ïru araɨwa umɨñee jemimbɨ wasu. Kua re owa ma umɨñee. Jare umɨñee yawe, ayandu ñee oë jokua mbaerenda oro pewa Tumpa jowai oï wae wi. Jokua mbaerenda onoi irundɨ jäti, jare jokua ñee uyendu jäti reta ipɨte wi.

¹⁴ Jare jokua ñee jei araɨwa jemimbɨ wasu umɨñee ramo wae pe kuärái: “Iyora jokua irundɨ araɨwakue reta uñeñapɨ̈ti ñonoï ɨ wasu Éufrates jembeɨ pe wae,” jei chupe.

¹⁵ Jayawe araɨwa oo oyora jokua irundɨ araɨwakue reta jae reta yuraa uyukaka waerä mbɨte seri ɨwɨ pewa reta. Kua araɨwakue reta, ɨma rupi Tumpa uyapɨkatu ma yepe oñono. Jare uäro yureko jokua año, jare jokua yasɨ, jare jokua ara, jare jokua ora etei.

¹⁶ Jae reta ñonoï oyokui waerä jetaete ye sɨndaro reta kawayu re opo wae. Jare ayandu mokui chiëto miyón ko jae reta.

¹⁷ Jare jokua kawayu reta jare opo jese wae reta uyekuaa chewe kuärái: Ime onoi ipɨtía re temimonde ñeräro pewa – jae ko jiero pewa pɨ̈tasɨ wae, jare jowɨasɨ wae, jare iyuasɨ wae. Jare kawayu reta iñäka yawapɨ̈ta tuicha wae iñäka echa. Jare iyuru wi oë tata jare tatäti jare azufre.

¹⁸ Jare tata jare tatäti jare azufre kawayu reta iyuru wi oë wae opa uyuka mbɨte seri ɨwɨ pewa reta.

¹⁹ Erëi jokuaño’ä uyapo reta. Jae nunga wi juwai mboi echa jare iyapɨ re oï mboi iñäka echa. Jare jokua pɨpe upurumbɨpere reta. Jukuärái jokua kawayu reta iyuru jare juwai ime onoi mbaepuere umbɨpere jare uyuka waerä ɨwɨ pewa reta.

²⁰ Jare jokua ɨwɨ pewa reta umano’ä jokua mbaesusere reta rupi wae uipota’ä etei ueya ipɨayemɨngeta mbaembae kachi uyapo wae rewa. Echa’ä jae reta jekuaeño uipota umbɨadora aña reta re jare tumparaanga reta re oro pewa, jare korepoti jiero pewa, jare jiero bronce pewa, jare ita pewa, jare ɨwɨra pewa wi. Jokua tumparaanga reta ipuere’ä etei umae jare uyandu jare uwata wi. Erëi jesewe ɨwɨ pewa reta umbɨadora jese reta.

²¹ Jae nunga wi jae reta ko upuruyuka wae reta, jare ipaye wae reta, jare iawasapota wae reta, jare imonda wae reta. Erëi uipota’ä etei ueya reta ipɨayemɨngeta jokua mbaembae rewa.