Apocalipsis 8 - Biblia

Owecha kuimbae taurusu wae uipea tupapire imboyaka taɨkuewa wae

¹ Jayawe Owecha kuimbae taurusu wae uipea ye tupapire imboyaka. Kua re uipea ma chiu imboyaka. Jare uipea ma yawe, upɨta kïi ngatu ara pe mbɨte ora rupi.

² Joko wi aecha chiu araɨwa reta uyemboɨ ñonoï Tumpa jowai. Jare pëti pëti pe uñemee chupe reta temimbɨ wasu.

^3-4 Jare ou ïru araɨwa uyemboɨ Tumpa iwapɨa jowai, mbaerenda mbae utimbo kawi wae uyeapɨ jese wae iyɨpɨ pe. Jokua mbaerenda oro pewa ko. Jare araɨwa onoi ipo pe pëti jɨru oro pewa mbae utimbo kawi wae uapɨ pɨpe wae. Jare uñemee chupe jeta mbae utimbo kawi wae uapɨ waerä mbaerenda re Tumpa jowai. Jare jae uapɨ yawe, jatäti uyeupi päwe Cristo re wɨrowia wae reta iyerure ndiwe Tumpa jowai.

⁵ Joko wi araɨwa ueki tatäpɨ mbaerenda wi umɨtɨnee waerä pɨpe mbae utimbo kawi wae uapɨ pɨpe wae. Jare omombo ara wi ɨwɨ kotɨ. Jare jukuärái uyapo yawe, uyekuaa uwera wae jare uyendu jɨapu täta wae amaterere rami. Jare uyendu wi ara jɨapu wae, jare ɨwɨ ukäta.

Chiu araɨwa reta umɨñee jemimbɨ wasu

⁶ Jayawe jokua chiu araɨwa reta chiu temimbɨ wasu onoi wae uyeyapɨkatu umɨñee waerä temimbɨ wasu reta.

⁷ Jayawe pëti araɨwa umɨñee jemimbɨ wasu. Jare umɨñee yawe, aramoiño oa ɨwɨ re amandau jare tata tuwɨ rewe. Jare mbɨte seri ɨwɨra reta ɨwɨ pe oï wae okai, jare opaete kapii opa okai.

⁸ Joko wi ïru araɨwa umɨñee jemimbɨ wasu. Kua re mokui ma umɨñee. Jare umɨñee yawe, pëti ɨwɨtu wasu echa wae jendɨ rewe oa oo mar pe. Jare mar mbɨte seri opa uyeyapo tuwɨrä.

⁹ Jare mbɨte seri jewae mar rupiwa reta opa umano. Jare jae nunga wi mbɨte seri chalana wasu reta opa ikumewa.

¹⁰ Jayawe ïru araɨwa umɨñee jemimbɨ wasu. Kua re mbapɨ ma umɨñee. Jare umɨñee yawe, pëti yasɨtata tuicha wae oa ara wi jendɨ rewe pëti mechero tuicha wae jendɨ rami. Jare oa mbɨte seri ɨ wasu reta re jare ɨwororo reta re.

¹¹ Jare jokua mbɨte seri ɨ wasu reta opa iro uyeyapo. Jare jetaete wae umano jokua ɨ iro wae jou ramo. Jáeramo jokua yasɨtata ko jee Ajenjo.

¹² Jayawe ïru araɨwa umɨñee jemimbɨ wasu. Kua re irundɨ ma umɨñee. Jare umɨñee yawe, mbae uyeyapo warasɨ pe awɨye waerä jembipe irundɨ ora opa ara rupi. Jae nunga wi mbae uyeyapo yasɨ jare yasɨtata reta pe awɨye waerä jembipe irundɨ ora opa pɨ̈tu rupi.

¹³ Jayawe aecha pëti araɨwa uwewe oï ɨwate rupi, jare jae mbapɨ wese usapɨkai rewe jei: “¡Kërái etei ndipo uiporaraeteta ɨwɨ pewa reta! ¡Echa’ä imeño mbapɨ araɨwa reta jae ma ñonoï umɨñee waerä jemimbɨ wasu!” jei.