Apocalipsis 5 - Biblia

Tupapire jare Owecha kuimbae taurusu wae

¹ Jare che aecha wi jokua wapɨa pe uwapɨ oï wae ime onoi pëti tupapire uyembapúa oï wae ipo iyakata kotɨ. Jokua tupapire uyekuatía oï japɨpe rupi jare ikupe rupi, jare chiu wese ye uyemboya oï imboyaka pe.

² Jare aecha pëti araɨwa ipɨräta wae täta uyemɨngeta rewe jei: “¿Kía pa jupi uipea waerä tupapire jare chiu imboyaka?” jei.

³ Jare mbaetɨ ko ara pe, jare ɨwɨ pe, jare ɨwɨwɨ pe awe kía ipuere uipea jokua tupapire wae. Jare mbaetɨ wi kía ipuere umae kërái uyekuatía oï wae re.

⁴ Jayawe che ambɨpɨ ayao täta rupi. Echa’ä mbaetɨ kiawe jupi ipuere uipea waerä jokua tupapire jare umɨngeta waerä.

⁵ Jayawe jokua mburuwicha reta wi pëti wae jei chewe: “Awɨye iyao. Mase, Judá iñemoñaa pewa reta ipɨte wi, Yawapɨ̈ta Wasu jei chupe reta wae, upurumɨamɨri wae ko. Jáeramo jae ipuere uipea jokua tupapire jare chiu imboyaka. Jae ko David iñemoñaa pewa mburuwicha wasurä ikota wae,” jei.

⁶ Jayawe aecha pëti Owecha kuimbae taurusu wae. Jare jete re uyekuaa ipere jendakue. Chemaerä jae chawaa jokua uyuka reta wae. Jae uyemboɨ oï jokua mburuwicha iwapɨa jare jokua irundɨ mbae tekowe onoi wae reta ipäu pe, jokua mburuwicha reta ipɨte pe. Jae onoi chiu jäti jare chiu jesa. Jare jokua chiu jesa uyembɨjaanga oï Tumpa iEspíritu chiu wese ye jupi wae Tumpa omondo opaete ɨwɨ rupi wae.

⁷ Jayawe Owecha kuimbae taurusu wae oo uipɨsɨ tupapire jokua wapɨa pe uwapɨ oï wae iyakata kotɨ uipɨsɨ oï wae.

⁸ Jare tupapire onoi ma ipo pe yawe, jokua irundɨ mbae tekowe onoi wae reta jare jokua veinticuatro mburuwicha reta opa uñeñono ɨwɨ re Owecha kuimbae taurusu wae jowai uñemɨmichi rewe. Pëti pëti onoi reta arpa jare copa oro pewa, jare tɨnee onoi reta pɨpe mbae utimbo kawi wae. Jokua mbae utimbo kawi wae uyembɨjaanga oï Tumpa re wɨrowia wae reta uyerure chupe wae re.

⁹ Jare jae reta ukäta Owecha kuimbae taurusu wae jowai pëti käta ipɨau wae kuärái: “Ndeñoete ko jupi nenoi waerä jokua tupapire jare ndipea waerä imboyaka reta. Echa’ä ndeyuka reta, jare nderuwɨ uyepɨyere wae rupi ndewa pɨau ye ma jeta wae reta Tumpa pewarä. Jae reta ko jae opaete ambɨembɨe ɨwɨ pewa reta kiape kiape ñonoï wae rupi jare opa kërái rái ñee pe uyemɨngeta wae reta.

¹⁰ Jare jae reta ndiyapo mburuwicha wasu retarä jare sacerdote retarä ipuere reta waerä uyeyokui yandeTumpa pe. Jare jae reta onoita mbaepuere ɨwɨ pe.” Jukuärái ukäta reta.

¹¹ Jayawe amae ye, jare ayandu jeta araɨwa reta iñee. Jare aecha jetaete ye ye araɨwa reta ñonoï. Jae reta ñonoï jokua mburuwicha iwapɨa jare irundɨ tekowe onoi wae reta jare mburuwicha reta iyɨke rupi.

¹² Jare araɨwa reta täta uyemɨngeta rewe jei: “Jupi ko Owecha kuimbae taurusu wae uyuka reta wae onoi waerä mbaepuere, arakuaa, mɨräta jare opaete mbaembae ikawi wae. Jupi ko yaipɨu waerä chuwi, jare yambutuicha waerä jae jee, jare ñamee chupe waerä yasurupái,” jei reta.

¹³ Joko wi che ayandu opaete Tumpa jembiapo reta ara pe ñonoï wae, ɨwɨ pe ñonoï wae, ɨwɨwɨ pe ñonoï wae, jare mar rupi ñonoï wae reta jei: “Tuyembutuichaka jaeño mái pewa jokua wapɨa pe uwapɨ oï wae jare Owecha kuimbae taurusu wae. Opaete wae tumbutuicha jae jee jare tuipɨu reta chuwi. Jae tonoi mbaepuere opaete wae re jaeño mái pewa,” jei reta.

¹⁴ Joko wi jokua irundɨ mbae tekowe onoi wae reta jei: “¡Jukuärái tuiko!” Jare jokua veinticuatro mburuwicha reta uñeñono ye ɨwɨ re uñemɨmichi rewe jare umbutuicha reta ikoño mái wae jee.