Apocalipsis 19 - Biblia

Ara pewa reta umbutuicha yandeYa jee

¹ Kua jaɨkue rupi ayandu ara pe ñee täta uyendu wae. Jetaete ye ye wae reta usapɨkai ñonoï jare jei ñonoï pëti ñee waeño kuärái: “YandeTumpa ko jae yandeRepɨ wae. Jare jae ime onoi opaete wae re mbaepuere. ¡Opaete wae tumbutuicha Tumpa jee jare tuipɨu chuwi!

² Echa’ä jae upurumbɨjeko jupi wae rupi, jare uiporaraka ɨwɨ pewa reta pe añetete wae rupi. Añawe jae uiporaraka ma jokua kuña jete re umɨngana wae jeräkuaete wae pe. Echa’ä jokua kuña opa urükumewa ɨwɨ pewa reta awasa uyapo wae rupi, jare upɨyere Tumpa pe uyeyokui wae reta juwɨ. Jáeramo Tumpa uyepɨ ma chupe reta jokua kuña pe.” Jukuärái jei reta.

³ Jare jei reta wi: “¡Opaete wae tumbutuicha Tumpa jee! Jokua tëta wasu Babilonia opa ma okai, jare jendakue wi upüata tatäti jaeño mái pewa.” Jukuärái jei reta usapɨkai rewe.

⁴ Jayawe jokua veinticuatro mburuwicha reta jare jokua irundɨ mbae tekowe onoi wae reta uñeñono ɨwɨ re Tumpa iwapɨa jowai jare jae jee umbutuicha reta. Jare jei reta: “¡Jukuärái tuiko! ¡Opaete wae tumbutuicha Tumpa jee!” jei reta.

⁵ Jare Tumpa iwapɨa wi oë pëti ñee jei kuärái: “Pembutuicha yandeTumpa jee opaete piyeyokui chupe wae reta jare chuwi pipɨu wae reta. Iparawete wae reta wiwe jare mburuwicha retawe, opaete pe reta pembutuicha yandeTumpa jee,” jei.

Owecha kuimbae taurusu wae umenda wae rewa

⁶ Jayawe ayandu ïru ñee. Jetaete ye ye uyemɨngeta ñonoï pëti wae echaño chewe. Täta uyendu ɨaparoa wasu jɨapu rami jare ara täta jɨapu rami. Jare ayandu jei reta: “¡Opaete wae tumbutuicha Tumpa jee! Echa’ä yandeYa Tumpa imbaepuerete ko, jare jae ko opaete wae imburuwicha wasurä jaeño mái pewa.

⁷ Yayerowia jare yambutuicha jae jee, echa’ä uwäe ma ara Owecha kuimbae taurusu wae umenda waerä. Jare jembirekorä wae uyeyapɨkatu kawi ma oï.

⁸ Jare uñemee ma chupe temimonde ikawi wae jare tïasɨ ikɨa mbae wae. Echa’ä jokua temimonde ikawi wae uyembɨjaanga oï Tumpa re wɨrowia wae reta mbaembae ikawi wae uyapo wae re,” jei.

⁹ Jare pëti araɨwa jei chewe: “Ikuatía kua ñee: ‘Owecha kuimbae taurusu wae umenda oï, jare uyapɨkatu ma tembiu ikawiete wae uyekou reta waerä jese. Uyekouete ñonoï Tumpa uparea chupe reta wae.’ Jukuärái ikuatía.” Jare jei wi chewe: “Kua ñee añetete ko. Tumpa iñee etei ko,” jei.

¹⁰ Jayawe che añeñono ɨwɨ re araɨwa jowai ambutuicha waerä tëi. Erëi jae jei chewe: “¡Awɨye iyapo!” jei. “Che ayeyokui Tumpa pe nde jare ndehermano reta rami. Kërái pe reta pemɨmbeu jupi Jesús rewa, jukuäraiño wi ko che,” jei. “Tumpa jeeño embutuicha. Echa’ä jae ko umee yandewe ñee Jesús rewa yamɨmbeu waerä,” jei araɨwa chewe.

YandeYa opa umɨamɨri opaete jowaicho reta

^11-13 Jayawe che aecha ara uyepea oï. Jare aecha pëti kawayu tïi wae. Jare opo jese wae ko jee Tumpa Iñee. Jesa uyekuaa kërái tata jendɨ wae rami, jare iñäka re onoi jeta corona mburuwicha wasu pewa reta. Jare jae jemimonde tuwɨ yepái. Jae ko jekuaeño jupi uyapo wae jare añetete wae umɨmbeu wae. Jae jupi rupi upurumbɨjeko, jare uñeräro jowaicho reta ndiwe. Jare uyekuatía oï jese pëti tee kiawe uikuaa’ä wae. Jaeño uikuaa wae.

¹⁴ Jare jae jaɨkue rupi yuweru ara wi jetaete wae sɨndaro reta rami. Jae reta jemimonde ikawi jare tïasɨ ikɨa mbae wae. Jare pëti pëti jae reta opo ñonoï kawayu tïi wae re.

¹⁵ Kua Tumpa Iñee jee wae, iyuru wi oë pëti kɨsepuku jaimbe wae. Jokua pɨpe opata umɨamɨri ɨwɨ pewa reta. Jare jae onoita jese reta tuicha mbaepuere. Upɨ̈rota jese reta kërái uva iya uitami yawe upɨ̈ro jese wae rami. Jare jukuärái jae rupi Tumpa opaete mbaepuere onoi wae uitɨta oï iarasɨ wasu jowaicho reta re.

¹⁶ Jare jae jemimonde re jare iu re uyekuatía oï kua tee: MBURUWICHA WASU RETA ITENONDEWAETE WAE JARE OPAETE WAE IYA TENONDEWAETE WAE

¹⁷ Jare che aecha pëti araɨwa uyemboɨ oï warasɨ jembipe pe. Jare jae usapɨkai rewe jei opaete wɨra reta uwewe ñonoï wae pe: “Tumpa uparea oï pewe pekaru kawi waerä. Jáeramo peyu piyembatɨ

¹⁸ peu waerä Tumpa jowaicho reta jetekue – jae ko mburuwicha wasu reta jetekue, jare sɨndaro itenondewa reta jetekue, jare kuimbae ipɨräta wae reta jetekue, jare kawayu reta jetekue, jare opo jese wae reta jetekue. Jae ko opaete Tumpa jowaicho uyeyokui wae reta jare uyeyokui mbae wae reta, jare iparawete wae reta jare mburuwicha reta jetekue,” jei.

¹⁹ Jayawe aecha jokua bestia, jare ɨwɨ pewa mburuwicha wasu reta jare opaete isɨndaro reta ndiwe. Jae reta uyembatɨ ma ñonoï uñeräro waerä jokua kawayu tïi wae re opo wae ndiwe jare isɨndaro reta ndiwe.

²⁰ Jare joko pe oï wi jokua bestia taɨkue rupi uyekuaa wae – jae ko jokua Tumpa iñee umɨmbeuraanga wae. Jare jae ko tenonde yawe tenondewa bestia jee re uyapo mbaembae kuimbae retaño ipuere’ä uyapo wae. Jukuärái jae umbɨtawɨ jokua bestia imarka onoi wae reta jare jaanga re umbɨadora wae reta. Erëi Tumpa uipɨsɨka jokua bestia jare Tumpa iñee umɨmbeuraanga wae. Jare jae reta mokui rewe Tumpa omomboka Tatawasurenda pe. Jokua tata wasu jendɨ oï azufre ndiwe.

²¹ Jare opaete bestia isɨndaro reta jare sɨndaro imburuwicha reta opa umano. Echa’ä jokua kawayu re opo wae opa uyuka reta ikɨsepuku iyuru wi oë wae pɨpe. Jare opaete wɨra reta opa ipunga jae reta jetekue re.