Apocalipsis 13 - Biblia

Bestia mar wi oë wae

¹ Che ayemboɨ aiko mar jembeɨ pe. Jayawe aecha oë mar wi pëti mbaemɨmba echa – jae ko pëti bestia jei chupe reta wae. Jare jokua bestia ime wɨreko chiu iñäka jare payandepo jäti reta. Jare pëti pëti jäti re onoi corona mburuwicha wasu pewa. Jare pëti pëti iñäka re onoi tee jokua pɨpe jeika tëi iyupe jae ko Tumpa wae.

² Jokua bestia yawa echa chewe. Jare ipɨ oso ipɨ echa chewe. Jare iyuru yawapɨ̈ta tuicha wae iyuru echa chewe. Jare jokua dragón umee imbaepuere kua bestia pe jare omondo jae jee re.

³ Jare aecha jokua bestia mar wi oë wae pëti iñäka ipere oï. Umano rape tëi, erëi ukuera. Jare ɨwɨ pewa reta opaete seri ipɨakañɨ umae jese.

⁴ Jare umbutuicha reta jokua dragón jee, echa’ä bestia ou dragón jee re ramo. Jare umbutuicha reta wi jokua bestia jee. Jare jei reta: “Mbaetɨ etei kía kua nunga bestia rami. Ndarau kía ipuere uñeräro jae ndiwe jare umɨamɨri,” jei reta.

⁵ Jare uñemee jokua bestia pe mbaepuere ɨwɨ pewa reta re cuarenta y dos yasɨ rupi. Jare uñemee wi chupe uyemɨngeta waerä uyembutuicha rewe jare jei tëi iyupe jae ko Tumpa wae.

⁶ Jae jekuaeño jei jeta mbae ikawi mbae wae Tumpa kotɨ. Jare uyemɨngeta kachi Tumpa jee kotɨ, jare Tumpa jëta kotɨ, jare ara pe yureko wae reta kotɨ.

⁷ Jare uñemee wi bestia pe uñeräro waerä Tumpa re wɨrowia wae reta ndiwe jare umɨamɨri reta waerä. Jare uñemee chupe mbaepuere opaete ambɨembɨe ɨwɨ pewa reta re kerupi rupi ñonoï wae rupi jare opa kërái rái ñee pe uyemɨngeta wae reta rupi.

⁸ Jare opaete seri ɨwɨ pewa reta umbutuicha bestia jee. Jaeño jokua Owecha kuimbae taurusu wae uyeyukaka wae itupapire pe jee uyekuatía oï wae reta umbutuicha’ä jae jee. Jokua tupapire ko jae opaete tekowe opa mbae wae onoi wae reta jee uyekuatía oï pɨpe wae. Jare jae reta jee uyekuatiaño mái iko ɨwɨ uyembɨpɨ wiwe.

⁹ Ipotawe kía uipota uikuaa kawi wae, tuyapɨsaka kua ñee re:

¹⁰ Tumpa uipota yawe ipotawe kía uyepɨsɨka waerä jowaicho reta pe, jukuärái ñotái oï. Jare Tumpa uipota yawe ipotawe kía uyeyukaka waerä kɨsepuku pe, jukuärái ñotái oï wi. Kua nunga mbaembae uyeyapo ñotái oï. Jáeramo Tumpa re wɨrowia wae reta tumɨawäta ipɨawasu rewe jare jekuaeño wɨrowia kawi jese rewe.

Bestia ɨwɨwɨ wi oë wae

¹¹ Jayawe aecha ambɨe bestia oë ɨwɨwɨ wi. Jare jokua bestia onoi mokui jäti owecha jäti rami. Erëi iñee ambɨe ye, echa’ä jae uyemɨngeta pëti dragón uyemɨngeta rami.

¹² Jare jokua tenondewa bestia mar wi oë wae ombou kua bestia ɨwɨ wi oë wae jae jee re. Jare jae iparawɨkɨ ko jae umbutuichaka waerä opaete ɨwɨ pewa reta pe jokua tenondewa bestia jee – jae ko jokua ipere umano rape iko tëi wae, jare ukuera ye wae.

¹³ Jare jokua bestia taɨkue aecha wae uyapo opa kërái rái mbaembae kuimbae retaño ipuere’ä uyapo wae. Jare tata awe ombou ara wi ɨwɨ pewa reta jowake.

¹⁴ Kua mbaembae reta ipuere uyapo, echa’ä jokua ïru bestia umee chupe mbaepuere jae jee re uyapo waerä ramo. Jare jukuärái rupi jae umbɨtawɨ ɨwɨ pewa reta. Echa’ä jae jei ɨwɨ pewa reta pe uyapo reta waerä jokua ïru bestia jaanga – jae ko jokua ipere iko kɨsepuku pe wae jare ikowe ye wae jaanga.

¹⁵ Jare uñemee jokua bestia taɨkue aecha wae pe onoi waerä mbaepuere umbɨyemɨngetaka waerä jokua tenondewa bestia jaanga. Jare joko wi uyukaka opaete uipota’ä umbɨadora jese wae reta.

¹⁶ Jare bestia taɨkue aecha wae jei opaete wae onoi waerä pëti marka ipo iyakata kotɨ ani jesɨwa re. Jayawe ikuasɨ wae reta jare mburuwicha reta, jare ikokatu wae reta jare iparawete wae reta, jare täta rupi uyeyokui wae reta jare uyeyokui mbae wae retawe imeta ko onoi reta jokua marka.

¹⁷ Jare ime yawe kía nunga mbaetɨ onoi jokua marka wae, ndarau ipuere owa mbae awe jare ndarau ipuere mbae owaka wi. Jokua marka ko jae jokua bestia jee, ani yandepuere yae chupe jae ko número umbɨjaanga bestia jee re wae.

¹⁸ Kua pe ikawi ko yande ñanoi waerä arakuaa. Uikuaa kawi wae tuipapa bestia inúmero. Jae ko kuimbae inúmero. Jare jokua número ko jae 666.