Apocalipsis 12 - Biblia

Kuña jare teyu wasu pɨ̈ta wae

¹ Jare ime mbae uyekuaa ara re chepɨakañɨete jese wae. Jae ko pëti kuña warasɨ pe uyemonde rami. Jare kuña ipɨ íɨwɨ pe oï yasɨ. Jare doce yasɨtata reta onoi iñäka re icoronarä.

² Jare jokua kuña ipurúa, jare jäse imembɨrasɨ ramo. Echa’ä imembɨ oata ma oï.

³ Jare uyekuaa ïru mbae ara re chepɨakañɨete jese wae. Jae ko pëti teyu wasu pɨ̈ta wae dragón jei chupe wae. Jae onoi chiu iñäka jare payandepo jäti reta. Jare pëti pëti iñäka re onoi corona.

⁴ Jare juwai pe uipɨsɨ mbɨte seri yasɨtata reta omombo ɨwɨ kotɨ. Jare jae uyemboɨ kuña imembɨ oata wae jowai opa waerä tëi jou chuwi imembɨ oa yawe.

⁵ Jare kuña imembɨ oa kuimbae. Jare jokua oa wae onoita tuicha mbaepuere opaete ɨwɨ pewa reta re. Erëi dragón ipuere’ä jou, echa’ä jokua kuña imembɨ uyereraa kiape Tumpa uwapɨ oï wae iwapɨa pe.

⁶ Jare jokua kuña osi oo ɨwɨtini wasu kotɨ. Echa’ä joko pe Tumpa uyapɨkatu chupe uñepɨ̈ro waerä. Jare joko pe Tumpa uyandarekoka jese 1.260 ara.

Tumpa omombo Añawasu ara wi

⁷ Jayawe uyeyapo pëti ñeräro ara pe. Pëti araɨwa tenondewa Miguel jee wae jare iaraɨwa reta uñeräro jokua dragón ndiwe. Jare dragón jare jokua araɨwa reta uyemboya jese wae uñeräro wi jae reta ndiwe.

⁸ Erëi dragón jare iaraɨwa reta opa jamɨri, jare mbaetɨ ye ma jendarä ara pe.

⁹ Jayawe Miguel jare iaraɨwa reta omombo jokua dragón ara wi ɨwɨ pe opaete araɨwa jese uyemboya wae reta ndiwe. Jokua dragón ko jae mboi arakaete Eva umɨngeta wae. Jae ko Satanás, Añawasu yande yae chupe wae. Jae ko umbɨtawɨ opaete ɨwɨ pewa reta wae.

¹⁰ Jayawe ara pe ayandu ñee usapɨkai rewe jei: “Añawe uwäe ma ara yandeTumpa opa uepɨ waerä jese wɨrowia wae reta, jare uyekuaa waerä imbaepuere tuicha wae. Echa’ä añawe jae uyeyapo ma opaete wae imburuwicha wasurä jaeño mái pewa. Añawe wiwe Cristo onoita opaete mbaepuere. Echa’ä Tumpa omomboka ma Añawasu ara wi. Jare Añawasu ndarau ye ma uyemboɨ Tumpa jowai umbɨjeko waerä yandehermano reta. Echa’ä jukuärái jae uyapose opa ara rupi jare opa pɨ̈tu rupi, erëi añawe ndarau ye ma uyapo chupe reta jukuärái.

¹¹ Echa’ä jae reta opa ma umɨamɨri Añawasu Owecha kuimbae taurusu wae juwɨ rupi jare Tumpa iñee umɨmbeu reta wae rupi. Jare mbaetɨ etei urukɨye reta jekowe umano waerä.

¹² ¡Jáeramo ara pe ma ñonoï wae reta tuyerowia! Erëi, pe reta ɨwɨ pe peï wae jare mar rupi peï wae, ¡kërái etei ndipo piporara paraweteta! Echa’ä Añawasu uweyɨ ma ara wi uyembowaicho waerä pekotɨ täta iarasɨ rewe. Echa’ä jae uikuaa michiño ma ara onoi wae.” Jukuärái jei jokua ñee ayandu wae.

¹³ Jayawe jokua dragón uikuaa yawe Tumpa omomboka ma ko ɨwɨ pe wae, jae umbɨpɨ omoña jokua sambiaɨ kuimbae oa wae ichɨ.

¹⁴ Jayawe uñemee kuña pe pëti wɨrakee wasu ipepo reta. Jokua pɨpe jae uwewe oo dragón wi mbɨrɨ ɨwɨtini wasu kotɨ kiape uñepɨ̈ro pɨpe wae pe. Jare joko pe Tumpa uyandarekoka jese mbapɨ año mbɨte rupi.

¹⁵ Jayawe jokua dragón iyuru wi omondo jeta ɨ kuña jaɨkue wɨraa uyuka waerä tëi.

¹⁶ Erëi ɨwɨ etei omborɨ kuña, echa’ä ɨwɨ uyepea kërái yandeyuru yaipea rami. Jare jokua dragón iyuru wi ɨ wasu rami omondo wae opa ukañɨ ɨwɨ uyepea wae pe.

¹⁷ Jayawe dragón pochɨete upɨta kuña pe, jare oo uñeräro waerä kuña iñemoñaa reta ndiwe – jae reta ko Tumpa jei wae rupi yureko wae reta jare Jesús rewa jupi umɨmbeu wae reta.