2 Timoteo 3 - Biblia

Ara taɨkuewa rupi jeta wae reta jeko kachita

¹ Añawe che aipota aikuaaka ndewe mbaembae uyeyapota oï ara taɨkuewa rupi. Ikuaa kawi kua: Jokua ara reta rupi imeta oï jeta yembɨawái reta.

² Echa’ä jeta wae reta uyandarekota oï iyeeño. Jokua nunga reta jekuaeño uipotata korepoti jae reta imaeräño. Uyembutuichata reta japicha kotɨ. Jare uyembɨkateta reta. Jare jekuaeño uyemɨngetata reta japicha kotɨ ikawi mbae wae. Jare ndarau uyapo reta tu jare ichɨ jei wae rupi. Jare ndarau umee yasurupái kía pe awe. Jare mbaembae Tumpa rewa mbaeta’ä chupe reta.

³ Upuruauta’ä ma reta. Iyepɨseta uyeyapo reta. Indayepotata reta. Jare jekuaeño uyapota reta jete uipota wae. Jowaichopotata reta. Mbae ikawi wae uñamɨtäata reta.

⁴ Jokua ara reta rupi jeta wae reta wi umbɨtawɨta japicha reta. Jare uyapoñoita reta mbaembae ipɨa pe uyemɨngeta mbae rewe. Uyererowia katuta reta iyé. Uipotata’ä reta Tumpa, erëi uipotata jae retái uyembɨyerowia.

⁵ Jae reta uipɨuraangaño Tumpa wi, erëi onoita’ä reta Tumpa imbaepuere. Jayawe awɨye iñemɨïru jokua nunga reta ndiwe.

⁶ Jokua nunga kuimbae reta ipɨte pe oï oporomboeraanga wae reta. Jae reta upurumbɨtawɨ rewe uike tëta reta rupi. Echa’ä uipota uyererowia katuka kuña reta yawái mbae uyembɨtawɨka wae pe jokua tëta pewa. Jokua nunga kuña reta ipɨa umbɨjeko tëi oï mbaembae kachi uyapo wae re. Erëi umaeño iyé reta uyereruwataka waerä mbae kachi wae rupi.

⁷ Jae reta jekuaeño uipota uyandu yemboe ipɨau wae ipotawe kía wi ou wae, erëi ipuere’ä uepitɨ reta añetete wae.

⁸ Jokua kuimbae oporomboeraanga wae reta ipɨayemɨngeta mbaetɨ ko jupi, jare jokua wɨrowia reta tëi wae re añetete’ä ko. Jae reta oyowaicho yemboe añetete wae kotɨ, kërái arakae ɨwɨ Egipto pe kuimbae ichoropa wae reta Janes jare Jambres jee wae reta oyowaicho Moisés kotɨ wae rami.

⁹ Erëi jokua nunga reta ndarau ipuere jekuaeño upurumbɨtawɨ. Echa’ä uyekuaa ñotái ko jae reta iyarakuaa mbae wae kërái arakae uyeyapo Janes jare Jambres pe rami.

Pablo umɨkɨrëɨ Timoteo jekuaeño wɨrowia waerä Tumpa iñee re

¹⁰ Erëi nde, Timoteo, ambɨe ye ko jae reta wi. Echa’ä nde nemomoe kawi neï chereko. Nde ndikuaa neï kërái ko che aporomboe wae, jare kërái chereko jare chepɨayemɨngeta wae. Jare nde ndikuaa neï wi kërái ko arowia Tumpa re wae, jare kërái apuruau chepɨawasu rewe, jare kërái amɨawäta aï aiporara wae.

¹¹ Nde ndikuaa neï wi kërái che jeta aiporara tëta wasu Antioquía pe jare Iconio pe jare Listra pe yandeYa Jesucristo rewa amɨmbeu ramo. Erëi yepe tëi jeta aiporara parawete, jesewe amɨawäta opaete, jare yandeYa cherepɨ opaete aiporara wae wi.

¹² Añetete kía uipota iko jupi rupi pëti ramiño Jesucristo re wae, uiporara ñotái ko Tumpa jowaicho reta ipo pe.

¹³ Erëi jeko pochɨ wae reta jare upurumbɨtawɨ wae reta jeieteta uyapo reta mbaembae ikawi mbae wae. Jae reta jekuaeño umbɨtawɨta ïru wae reta, jare jae reta uyembɨtawɨkata wi.

¹⁴ Erëi nde, jekuaeño erowia yemboe añetete wae ndiyemboe ma jese wae re. Nde ndikuaa neï jokua yemboe añetete wae ko, echa’ä ndikuaa kawi neï nde nemboea reta jae ko nderowia katu jese wae reta.

¹⁵ Nemandúa neï kërái nemichi wiwe ndikuaa Tumpa iñeerɨru pe uyekuatía oï wae. Jare jokua uyekuatía oï wae ko nembɨarakuaa kërái Tumpa yanderepɨ Jesucristo re yarowia wae rupiño.

¹⁶ Opaete Tumpa iñeerɨru pe uyekuatía oï wae Tumpa wi etei ko ou. Jáeramo ikawiete yandewe. Echa’ä yanemboe kawi, jare umbɨeta yandewe yayawɨ yawe, jare yanembɨarakuaa añetete rupi, jare uikuaaka yandewe kërái yaiko jupi waerä Tumpa kotɨ.

¹⁷ Jukuärái kía Tumpa pe uyeyokui wae ipuere uyapo kawi opaete Tumpa uipota wae.