2 Tesalonicenses 3 - Biblia

Pablo ueka chupe reta yerure

¹ Jayawe hermano mii reta, kuaño ma aipota pe reta piyapo waerä: Piyerure mii Tumpa pe oreré yandeYa iñee jekuaeño uñemɨái waerä ɨmambae, jare opaete wae wɨrowia waerä jese pe reta perowia jese rami.

² Jare piyerure mii wi chupe orerepɨ waerä kuimbae jeko kachi jare pɨchɨ̈i wae reta wi. Echa’ä jeta wae reta wɨrowia’ä oriñee Cristo re wae.

³ Erëi yandeYa jupi ko yanemborɨ waerä. Jáeramo jae pemɨmɨrätata jare perepɨta Añawasu wi.

⁴ Jare ore ndorowia katu noï peré jekuaeño piyapo waerä ore ndoe pewe wae yandeYa re perowia ramo.

⁵ Ayerure aï yandeYa pe jae pemborɨ pikuaa kawi waerä kërái Tumpa perau wae, jare kërái pepɨawasu waerä yembɨawái reta rupi Cristo ipɨawasu rami.

Pablo umbɨarakuaa awɨye waerä iyakɨ reta

⁶ Añawe hermano mii reta, ime yawe kía iyakɨ wae pepɨte pe oï, ore ndoe pewe yandeYa Jesucristo jee re piyembɨsɨrɨ waerä chuwi. Echa’ä jae uipota’ä iko kërái ore pomboe wae rupi.

⁷ Pe reta etei pikuaa peï kërái ikawi ko piko waerä ore rami. Echa’ä ore nduiko yawe pepɨ, oreakɨ'ä.

⁸ Jare ndueka’ä pewe oremɨngaru waerä. Ore täta nduparawɨkɨ ara rupi jare pɨ̈tu rupi awɨye waerä kía uyembɨpɨa’ä oreré.

⁹ Añetete jupi iko tëi ndueka waerä pewe yemborɨ. Erëi ore nduipota nduikuaaka pewe orereko, pe reta piko waerä wi jukuärái.

¹⁰ Pemandúa kawi peï, ore nduiko yawe pepɨ, mbowɨ wese ndoe pewe kuärái: “Ime yawe kía ñatëɨ uparawɨkɨ wae, awɨye pemɨngaru.”

¹¹ Ore pumɨmandúa noï kua mbaembae re, echa’ä jeräkua orewe ime ñonoï pepɨte rupi iyakɨ wae reta. Jae reta ndaye ikïi’äraanga iyupe reta, erëi añetete uyapo’ä mbae awe reta. Jaeño uipota uyemɨinge reta opaño mbaembae pe.

¹² Erëi ore ndoe jokua nunga reta pe yandeYa Jesucristo jee re uparawɨkɨ reta waerä iyupe ime waerä onoi jembiurä. Jukuärái numɨatangätu reta.

¹³ Erëi hermano mii reta, awɨye pekueri ikawi wae piyapo wae wi.

¹⁴ Jare kía nunga wae uyapo’ä yawe kua nduikuatía pewe wae, pemae kawi jese kía ra jae. Jare awɨye piñemɨïru jae ndiwe jae imara waerä.

¹⁵ Erëi awɨye pemae jese towaicho rami. Pembɨarakuaa kawi pëti perɨwɨ pembɨarakuaa rami.

Pablo umbɨyapɨ uikuatía wae

¹⁶ YandeYa ko jae yanembɨpɨakatu wae. Jare jae jekuaeño tuyapo pewe pepɨakatu waerä ipotawe mbae uyeyapo pewe wae rupi. YandeYa toï opaete pe reta ndiwe.

¹⁷ Jayawe cheïru mii reta, Tumpa ndiweño peï. Kua chepo pe etei aikuatía aï pewe pikuaa waerä che ko amondo aï pewe kua tupapire wae. Jukuäraiñoi ambɨyapɨ opaete tupapire aikuatía wae reta.

¹⁸ YandeYa Jesucristo jekuaeño tipɨakawi pewe. Jukuärái tuiko.