2 Tesalonicenses 1 - Biblia

Pablo wɨraaka saludo

¹ Pe reta yandeRu Tumpa jare yandeYa Jesucristo jee re piyembatɨ tëta wasu Tesalónica pe peï wae, ore ko Pablo jare Silas jare Timoteo nduikuatía noï pewe kua tupapire.

² YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Pablo umɨkɨrëɨ reta jae reta uiporara wae rupi

³ Ore jekuaeño numee yasurupái Tumpa pe peré, hermano mii reta. Jare jupi ko jukuärái nduyapo waerä. Echa’ä jekuaeño ukuakuaa oo oï kërái perowia Tumpa re wae, jare jekuaeño wi tuicha rupi piyerau peï päwe rewe.

⁴ Jáeramo ore nduyembatɨ yawe kerupi rupi Cristo re wɨrowia wae reta ndiwe, nduyemɨngeta kawi peré nduyerowia rewe. Numɨmbeu chupe reta pe rewa kërái yepe tëi peasa peï yembɨawái reta rupi jare täta piporara peï Cristo re wɨrowia mbae wae reta ipo pe, jesewe pemɨawäta peï jare jekuaeño perowia peï Tumpa re.

⁵ Pëti ara yayemboɨ yawe opaete wae Tumpa jowai jae jei waerä yandereko re, Tumpa jeita pewe: “Jupi ko peï waerä che ndiwe jaeño mái pewa,” jeita pewe. Jare ore nduecha yawe kërái pemɨawäta peï piporara peï wae, jokua uikuaaka orewe Tumpa jupi ko jei waerä pewe jukuärái.

⁶ Tumpa jupi ko. Jáeramo jae uiporarakata oï wi jokua uiporaraka pewe wae reta pe.

⁷ Jare jukuärái pe reta piporara peï wae, oyowake peputuuta peï kuri ore ndiwe kua yaiporara ñaï wae wi. Jokua uyeyapota oï yandeYa Jesucristo uyekuaa yawe ara wi tata jendɨ rewe jare iaraɨwa ipɨrätaete wae reta ndiwe,

⁸ uiporaraka waerä opaete uikuaa’ä Tumpa wae reta pe. Echa’ä jae reta wɨrowia’ä ñee ikawi wae yandeYa Jesucristo rewa.

⁹ Jáeramo jokua jeko pewa Tumpa opata omombo reta Tatawasurenda pe, jare joko pe jae reta uiporarata ñonoï jaeño mái pewa mbɨrɨete yandeYa wi. Jare ndarau etei uecha reta yandeYa imbaepuere jembipete wae.

¹⁰ Jukuärái uyeyapota oï jokua ara yandeYa ou ye yawe. Erëi yandeYa ou yeta’ä oï jaeño uiporaraka waerä jokua jese wɨrowia mbae wae reta pe. Jae nunga wi ou yeta oï opaete jese wɨrowia wae reta ipɨakañɨ umae jese waerä. Jukuärái opaete kía kía jae imaerä iko wae reta umbutuichata jae jee. Jare pe reta joko pe peïta jokua ara, echa’ä perowia ma ñee ikawi wae numɨmbeu pewe ramo.

¹¹ Jayawe ore jekuaeño nduyerure noï peré. Echa’ä yandeYa ou ye yawe, ore nduipota Tumpa uyerowia rewe umae waerä peré jare jei waerä pewe: “Che jaekawi puparawo.” Jae nunga wi ore nduikuaa noï pe reta perowia Cristo re ramo, ime mbaembae ikawi wae pipota piyapo jae imaerä. Jare ore nduyerure noï Tumpa pe jae pemborɨ waerä imbaepuere rupi pe reta opa piyapo waerä.

¹² Jukuärái ore ndueka noï Tumpa pe uyembutuichaka waerä yandeYa Jesucristo jee pe reta rupi, jare jae uyemɨngeta kawi waerä peré wi. Jukuärái tuyeyapo yandeRu Tumpa jare yandeYa Jesucristo ipɨakawi rupi.