2 Samuel 7 - Biblia

Tumpa umbeu David pe mbae uyapota wae

¹ Tumpa omborɨ David jare isɨndaro reta umɨamɨri waerä opaete Israel jowaicho reta. Jayawe mburuwicha wasu David ipɨawiwe rewe uyakao jëta ipɨau ikawiete wae pe.

² Joko wi David ueruruka Tumpa iñee umɨmbeu wae Natán jee wae jare jei chupe: “Mase, che aiko pëti tëta ikawiete wae pe ɨwɨräre pewa. Erëi Tumpa arakae jei wae yemɨmandúa jɨru oï pëti tëta wakapi pewa japɨpe. Kua ikawi’ä etei ko,” jei chupe.

³ Jayawe Natán jei mburuwicha wasu David pe: “Jaekawi,” jei chupe. “Iyapoño nekɨrëɨ ndiyapo wae rupi, echa’ä Tumpa oï nde ndiwe,” jei chupe.

⁴ Erëi jokua pɨ̈tu Tumpa jei Natán pe kuärái:

⁵ “Ekua embeu David pe che jae aï chupe kuärái: “¿Ndiyapota ra chewe cherëtarä aiko pɨpe waerä? ¡Ndarau!

⁶ Mase, aiko’ä ko pëti tëta ikawi wae pe ɨwɨ Egipto wi anoe Israel iñemoñaa reta wiwe añawe rewa. Erëi awatase aiko pëti tëta wakapi pewa pɨpe.

⁷ Jeta año rupi ase Israel iñemoñaa reta ndiwe. Erëitu ayokui’ä etei pëti awe jae reta itenondewa aiparawo wae uyapo waerä chewe pëti tëta ikawiete wae ɨwɨräre pewa chemaerä.’ Jukuärái ere chupe,” jei Tumpa Natán pe.

⁸ Jare jei wi chupe: “Jayawe ere David pe che, peTumpa chembaepuere tuichaete wae, jae aï chupe kuärái: ‘Che nonoe ma owecha reta ndiyandareko jese wae wi jare numbɨjee opaete Israel pewa reta imburuwicha wasurä.

⁹ Che jekuaeño aiko nde ndiwe opaete ndeo wae rupi. Ambɨsɨrɨ opaete nderowaicho reta ndewi. Jare añawe che numɨeräkuakata opaete ɨwɨ rupi nde ko jae mburuwicha wasu ikawiete wae.

^10-11 ‘Che aiparawo ma Israel iñemoñaa reta iɨwɨrä ikawiete wae jare aruyakao ma reta joko pe. Añawe yurekota joko pe ipɨakatu rewe. Israel iñemoñaa reta jaeramo yuweru uwäe kua ɨwɨ pe yawe, jeko pochɨ wae reta uiporaraka chupe reta. Imeño uiporaraka chupe reta jokua año rupi aiparawo chupe reta imburuwicha retarä wiwe. Erëi añawe che aepɨta reta opaete jowaicho reta wi.’ Jukuärái ere David pe,” jei Tumpa Natán pe. Jare Tumpa jei wi chupe: “Ere wi David pe kuärái: ‘Ameeta mbaepuere mburuwicha wasu pewa niñemoñaa reta pe.

¹² Jare nde, David, nemano ma yawe jare niñeñotɨka ma yawe nderamɨkue reta uñeñotɨ ñonoï wae pe, ambɨjeeta pëti nderaɨ Israel pewa reta imburuwicha wasurä. Jare ameeta chupe mbaepuere tuicha wae.

^13-15 Jae ko uyapokata chewe pëti tëta, joko pe cheree umbutuicha reta waerä. Jare jae chekotɨ uyawɨ yawe, che aiporarakata chupe pëti tu uinupa taɨ rami. Erëi jekuaeño aipararekota, jare ndarau ambɨsɨrɨ chuwi aiparareko wae kërái Saúl wi ambɨsɨrɨ wae rami. Echa’ä anoe Saúl numbɨjee waerä Israel pewa reta imburuwicha wasurä. Jare nderaɨ iñemoñaa ipɨte wi ikota mburuwicha wasurä jaeño mái pewa. Che aikota chupe tuurä jare jae ikota cheraɨrä.

¹⁶ Jayawe nde jare niñemoñaa jekuaeño pikota mburuwicha wasurä jaeño mái pewa.’ Jukuärái ere David pe,” jei Tumpa Natán pe.

¹⁷ Jayawe Natán umbeu yuapɨ ye David pe opaete jokua ñee Tumpa uikuaaka chupe wae.