2 Pedro 2 - Biblia

Awɨye yayapɨsaka oporomboeraanga wae reta re

¹ Erëi yanemandúa kawi ñaï, jokua ara reta rupi ime iko wi Israel iñemoñaa reta ipɨte rupi Tumpa iñee umɨmbeuraanga wae reta. Jare jukuärái wi añawe rupi imeta wi pepɨte rupi Tumpa iñee re oporomboeraanga wae reta. Jae reta ikatu oporomboe waerä tëi, erëi kachi oporomboeta, jare jukuärái umbɨtawɨta jeta wae reta. Jare yepe tëi yandeYa umbɨepɨ juwɨ pe jae reta iko waerä tëi jae imaerä, erëi jae reta mbaembae oporomboe wae rupi uikuakuta yandeYa. Jare jukuärái jae reta ueruta iyupe ɨmambae Tumpa iarasɨ.

² Jare jae reta jeko ikawi mbae re jeta wae reta Cristo re wɨrowia wae uyemboeta jese. Jare jokua jeko pewa Cristo re wɨrowia mbae wae reta kachita uyemɨngeta Tumpa iñee añetete wae re.

³ Jare jokua oporomboe kachi wae reta uipotaeteta korepoti. Jare imiärita reta iyapu rewe pembɨtawɨ waerä ipuere waerä umɨngana pewi korepoti. Erëi ɨma rupi Tumpa jei uiporaraka waerä chupe reta. Jare chupe reta waerä Tatawasurenda uyeyapɨkatu ma oï.

⁴ Yaikuaa Tumpa uiporarakata oï chupe reta, echa’ä araɨwa retawe ipuere’ä oyepe Tumpa iarasɨ wi arakaete uyawɨ reta Tumpa kotɨ yawe. Echa’ä Tumpa ara wi omombo reta pɨ̈tumimbiete oï wae pe, jare joko pe uñeñapɨ̈ti ñonoï reta ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

⁵ Jare yanemandúa kawi ñaï wi, arakaete Tumpa uiporaraka opaete ɨwɨ pewa reta pe ɨporu wasu pe. Jaeño uepɨ chuwi Noé jare ïru chiu wae. Noé umɨmbeu tëi ïru wae reta pe kërái yureko reta waerä jupi Tumpa kotɨ. Erëitu jae reta uipɨu’ä Tumpa wi; jáeramo Tumpa opa umbái reta.

⁶ Jare jae nunga wi yandepuere yanemandúa mbae uasa arakaete tëta wasu reta Sodoma jare Gomorra pe. Jokua tëta wasu pewa reta jeko kachi Tumpa jowai. Jáeramo Tumpa ombou tata jokua tëta wasu reta re jare opa umbái reta. Jaeño upɨta tanimbu joko pe. Tumpa jokua uyapo uikuaaka waerä yandewe mbae uasata oï wae Tumpa wi uipɨu’ä wae reta pe.

^7-8 Jare Tumpa opa umbái yawe jokua tëta wasu reta, jae uepɨ Lot. Echa’ä Lot ko jae kuimbae jupi wae Tumpa kotɨ. Opa ara rupi jae uecha mbaembae kachi jokua tëta wasu pewa reta uyapo wae, jare uyandu wi kachi kachi uyemɨngeta reta. Jare Lot jupi ramo, uiporara jare ipɨatɨtɨ parawete jokua uyandu jare uecha wae re. Jáeramo Tumpa uiparareko jare uepɨ.

⁹ Jayawe opaete kua mbaembae rupi yaikuaa Tumpa ikatuete yanderepɨ waerä mbaesusere reta wi, yande jae yambɨyerowia wae reta. Jare jae ikatuete wi oñono tee waerä opaete mbae jupi mbae uyapo wae reta ara taɨkuewa uwäe rewa. Jokua ara uwäe yawe, jae reta uyemboɨta ñonoï Tumpa jowai Tumpa uiporaraka waerä chupe reta jaeño mái pewa.

¹⁰ Jare oete uiporarakata oï opaete kía uipota’ä Tumpa jei wae rupi yureko wae reta pe. Jae reta jei wae rupiño ko yureko reta, jare opa ma uñererükumewa reta jeko kachi rupi. Jokua oporomboe kachi wae reta ikate iyé reta. Mbaetɨ etei ukɨye reta uyemɨngeta waerä ipotawe mbaepuere onoi wae reta kotɨ.

¹¹ Erëi araɨwa retawe, yepe tëi jae reta imbaepuerete chuwi reta jare Tumpa jowai ñonoï, erëi jae retawe ndarau kachi uyemɨngeta reta jokua mbaepuere onoi wae reta kotɨ.

¹² Erëi jokua oporomboe kachi wae reta uyemɨngeta kachi mbaembae uikuaa mbae wae kotɨ. Jae reta uikuaa mbae rewe uyapo ikɨrëɨ uyapo wae rupiño mbaemɨmba jesaete wae rami. Jokua nunga mbaemɨmba reta jaeño ikawi yaipɨsɨ waerä jare yayuka wɨrae waerä. Jare jukuärái rami wi uyeyapota kua kuimbae reta pe.

¹³ Echa’ä Tumpa tuicha uiporarakata oï chupe reta jae reta mbae ikawi mbae wae uyapo reta ramo. Echa’ä jae reta ikatu pe etei uyapo mbaembae kachi wae. Ikaruete reta jare ikause reta. Jae nunga wi jae reta uyembatɨ jare ukaru pe reta ndiwe peïru reta rami. Erëi jae reta pembɨtawɨ ñonoï. Jokua pëti ñemɨmaraka ko pemaerä.

¹⁴ Jae reta ipotawe kuña re umae yawe, umae jese uipota rewe. Jare ikueri’ä reta Tumpa kotɨ uyawɨ wae wi. Jae nunga wi jae reta uyawɨka Tumpa kotɨ jokua ipɨräta’ä ñonoï Tumpa re wae reta pe. Jare jekuaeño umae reta japicha imbaembae re uipota rewe. Jáeramo Tumpa iarasɨ uitɨta oï jese reta.

¹⁵ Añetete jae reta ueya tape sɨmi wae jare omomoe ñonoï kuimbae Beor taɨ Balaam jee wae jeko. Echa’ä kërái Balaam uyapo rami, jae reta uipotaete korepoti mbae ikawi mbae uyapo wae rupi.

¹⁶ Jokua Balaam, yepe tëi jae ko Tumpa iñee umɨmbeu wae, erëi jae opia Tumpa jape wi korepoti re. Erëi Tumpa umbɨeta chupe jae jeko kachi re pëti mburika rupi, jare jukuärái umaeño’ä Balaam re uyapo waerä jokua uyapota tëi iko iyarakuaa mbae rewe wae. Yepe tëi mburika reta ipuere’ä uyemɨngeta, erëi Tumpa umbɨyemɨngetaka jokua mburika pëti kuimbae rami.

¹⁷ Jokua oporomboe kachi wae reta ko jae ɨkua opa ma tɨpa wae rami, echa’ä jae reta oporomboe wae yanemborɨ'ä maeräwe – jaeño upurumbɨtawɨ waerä. Jare jae nunga wi jae reta ko jae amapɨ̈tu ɨwɨtu täta wae opa wɨraa wae rami, jare okɨ'ä. Jukuäraiete wi kua kuimbae reta upurumbɨtawɨ. Jáeramo Tumpa uyapɨkatu ma chupe reta kiape pɨ̈tumimbiete oï wae pe jae reta jendarä, joko pe omombo reta waerä jaeño mái pewa.

¹⁸ Jare jokua oporomboe kachi wae reta, ime ye ambɨe mbae kachi uyapo reta wae. Jae reta uyemɨngeta uyembɨkate rewe. Yepe tëi iñeengatu reta, erëi jokua usiriwe’ä etei kía imaeräwe. Jae reta jei tëi: “Yandepuere yaiko yanderete uipota wae rupiño. Jokua mbae’ä ko,” jei reta. Jukuärái jae reta umbɨtawɨ jaeramo wɨrowia Cristo re wae reta. Echa’ä umɨkɨrëɨ uyapo reta ye waerä jokua jaeramo mbaembae kachi opa tëi ueya reta wae.

¹⁹ Jae reta jei tëi wi: “Tumpa yandeyora ma ko. Jáeramo yandepuere yaiko yande yae wae rupiño,” jei reta tëi. Erëi añetete jae reta mbae kachi wae pe täta rupi uyeyokui wae reta ko, echa’ä teko kachi imbaepuere pe ñonoï reta. Jare mbae uyemɨmbaepuere yanderé yawe, ñanerenoi ipo íɨwɨ pe.

²⁰ Kua pëti mbɨatɨtɨ ko. Echa’ä ipuere kía uikuaa yandeRepɨ wae yandeYa Jesucristo rewa, jare jokua arakuaa rupi ipuere ueya ɨwɨ jeko kachi wae. Erëi jokua nunga kía taɨkue rupi uñatima ye yawe jeko indechikue pe jare ipuere’ä ueya ye yawe, jae oeteta upɨta tenonde iko wae wi.

²¹ Añetete ikawita tëi ko jae awɨye uikuaa waerä tape jupi wae rewa. Erëi jokua tape uyemɨmbeu ma ko chupe jare jae uikuaa tëi. Erëi jae wɨrɨ̈ro jokua tape.

²² Jukuärái uyeyapo chupe jokua proverbio pe jei wae rami: “Yɨmba oo ye jou iwëekue, jare kuchi oyoe reta wae oo ye uyembɨsapayu tuñuu pe.”