2 Corintios 9 - Biblia

Yemborɨ Cristo re wɨrowia wae reta pewarä

¹ Che aipota pumbɨarakuaa ye kërái pemborɨ waerä jokua hermano Cristo re wɨrowia wae ikuasɨ ñonoï wae reta. Erëi añetete kua pikuaa kawi ma ko aikuatía mbae pewe rewe.

² Echa’ä che aikuaa pe reta pipotaete piyapo, jare jokua re che amɨmbeu kawi ma peré kua Macedonia pewa reta pe. Che jae chupe reta kuärái: “Jokua Corinto pewa reta, pëti año ma oï uipotaete oporomborɨ reta,” jae chupe reta. Jare jae reta uikuaa yawe pipota peporomborɨ wae, jayawe jae reta ikɨrëɨ wi oporomborɨ.

³ Erëi che amondo aï pewe kua yanderɨwɨ reta, jae reta ndiwe piyapɨkatu waerä jokua yemborɨ peraaka waerä kuri. Echa’ä che amɨmbeu ma opaete wae pe ayerowia rewe piyapo peï jukuärái, jare aipota’ä ñemɨmaraka pe cheritɨka waerä.

⁴ Aramoi amokue kua Macedonia pewa reta yuraata che ndiwe che a yawe pepɨ. Jare ore ndoo ma nuwäe yawe pepɨ, jare aramoi pe reta pembatɨ'ä yawe yemborɨ, jayawe oremarata ndupɨta. “Yarowia katu tëi ma jese reta,” ndoeta. Jare pe reta wi pemarata pepɨta.

⁵ Jáeramo chepɨa pe ayemɨngeta: “Ikawi ko yanderɨwɨ reta yuraa waerä tenonde Corinto pe. Jukuärái jae reta ipuereta omborɨ joko pewa reta opa umbatɨ reta waerä jeta yemborɨ tenonde yawe jei umeeta yureko wae.” Jukuärái ko chepɨayemɨngeta, echa’ä aipota uyekuaa waerä che a yawe pepɨ kërái pekɨrëɨ rewe pemee wae – mbaetɨ ko kía jei pewe ramoño.

⁶ Pemandúa kua re: Kía jeta’ä umaetɨ wae, jetata’ä umbaewɨro wi. Jare kía jeta umaetɨ wae, jetata umbaewɨro wi.

⁷ Jayawe pëti pëti tumee ipɨa jei wae rupi. Awɨye kía tumee jakatëɨ rewe jare kía jei chupe ramoño. Echa’ä kía uyerowia rewe umee wae, jokua Tumpa umbɨyerowia.

⁸ Tumpa imbaepuerete ko. Jare jae ipɨakawi rupi ipuerete uyapo pewe piyekou waerä jeta mbaembae re. Jare jukuärái ndarau uata pewe mbae awe, jare jokua penoi wae wi pepuereta jekuaeño peporomborɨ ipotawe mbaembae ikawi wae rupi.

⁹ Añetete ko, kía umee uyerowia rewe wae, ikota kërái uyekuatía oï Tumpa iñeerɨru pe wae rami. Echa’ä joko pe jei kuärái: “Ime yawe kía jeta omborɨ iparawete reta wae, jupi wae ko uyapo. Jare Tumpa jaeño mái pewa imanduata oï jese.” Jukuärái uyekuatía oï.

¹⁰ Tumpa ko umee yandewe yanderemitɨrä ñañotɨ waerä jare yanderembiurä yau waerä. Jare jae ko umeeta oï pewe opaete mbaembae uata oï pewe wae. Jare jokuaño’ä ko. Jae umbɨjetata oï pewe mbaembae ime penoi wae, jukuärái pepuere waerä pemborɨ ïru wae reta ipotawe mbae ikawi wae rupi.

¹¹ Jukuärái pe reta penoita opaete mbaembae ikawi wae pepuere jeta pemee waerä. Jare ore nduraa yawe ïru wae reta pe jokua pemeeta wae, jae reta umeeta yasurupái Tumpa pe jokua re.

¹² Jayawe kua mbae piyapota wae rupi uyeyapota oï mokui mbae ikawi wae. Tenonde jokua wɨrowia Cristo re wae reta Jerusalén pe ñonoï wae uyemborɨkata ñonoï. Jare joko wi jae reta umeeta ñonoï yasurupái tuicha Tumpa pe.

¹³ Añetete jae reta uecha yawe jokua jeta yemborɨ peraakata chupe reta wae, jae reta umbutuichata Tumpa jee. Jare uikuaata reta pe reta perowia ma ko añetete rewe ñee ikawi wae Cristo rewa, jare mbaetɨ ko peyuru peño piyeyokui peï Tumpa pe.

¹⁴ Jare jae reta uyerureta Tumpa pe peré perau rewe, Tumpa ipɨakawi uyekuaa peré ramo.

¹⁵ ¡Yasurupái Tumpa pe mbae ikawiete ye umee yandewe wae re! Yandepuere rape’ä opa ñanemiäri jese.