2 Corintios 7 - Biblia

¹ Opaete kua mbaembae Tumpa uikuaaka ma yandewe jae uyapota oï. Jáeramo cheïru puau mii wae reta, yamombota ko yandeyuwi ipotawe mbae yandererukachi Tumpa kotɨ wae – jae ko mbae ikawi mbae yayapo yandepɨa pe wae jare yanderete pe wi. Yandereko toya katu too jupi wae re Tumpa wi yaipɨu ramo.

Pablo uyerowia Corinto pewa reta uyapo wae re

² Pipea mii pepɨa orekotɨ. Ore parawete reta nduyapo’ä etei mbae ikawi mbae wae kía pe awe. Ndurukachi’ä etei kiawe teko kawi wi. Jae nunga wi ndupurumbɨtawɨ'ä etei.

³ Kua jae’ä aï pewe pumbɨjeko waerä. Echa’ä che jae ma pewe kërái ore puauete wae. Jare numano yawe ani imeño nduiko yawe, jekuaeño puaueteta noï.

⁴ Che arowia che chepuere ayemɨngeta pewe añetete rewe. Che ayerowia katu aï peré. Jare jokua pereräkua chewe wae chembɨyerowia wi. Jáeramo yepe tëi ore tuicha nduiporara noï kua pe, erëi che ayerowiaete aï.

⁵ Añetete, ore ndoyu nuwäe yawe kua Macedonia pe, orepuere’ä etei nduputuu kawi. Echa’ä ime iko opaño kërái rái yembɨawái reta. Jeta wae reta orembowaicho yureko, jare jokua re ore parawete nduyembɨpɨa’ä.

⁶ Erëi Tumpa umbɨpɨakatu ipɨatɨtɨ wae reta. Jare jukuärái jae orembɨpɨakatu ombou yawe Tito orepɨ.

⁷ Jare mbaetɨ orepɨakatu jokua reño. Orepɨakatu wi nduikuaa yawe kërái pe reta pembɨpɨakatu Tito. Jae imiäri orewe kërái pe reta pipotaete cherecha ye, jare kërái pipotaete chembɨyerowia, jare kërái pepɨatɨtɨete peï jokua mbae uasa pepɨte pe wae re. Jáeramo kua che ayandu yawe, ayerowiaete apɨta.

⁸ Che aikuaa jokua tenonde aikuatía pewe wae pembɨpɨatɨtɨ ko. Jare jokua re che chepɨatɨtɨ aiko wi. Erëitu che aikuaa aï jaekawi ko araaka pewe jokua tupapire. Añetete pepɨatɨtɨ piko jokua kuatía rupi jae pewe wae jeko pewa. Erëi jokua michi pewaño ko.

⁹ Jare añawe che ayerowia aï. Erëi mbaetɨ ayerowia aï pepɨatɨtɨ ramoño. Ayerowia aï, echa’ä jokua mbɨatɨtɨ jeko pewa peya pepɨayemɨngeta jupi mbae wae. Jokua nunga mbɨatɨtɨ ikawi oï Tumpa pewarä. Jayawe che ayapo’ä mbae ikawi mbae wae pewe pumbɨpɨatɨtɨ yawe.

¹⁰ Añetete, ime yawe kía ipɨatɨtɨ oï jae Tumpa kotɨ uyawɨ ramo, jare jokua jeko pewa ueya yawe ipɨayemɨngeta jupi mbae wae jokua jae uyawɨ wae rewa, jokua nunga mbɨatɨtɨ Tumpa umbɨyerowia. Jare kua re ndarau kiawe ipɨatɨtɨ upɨta, echa’ä jokua ueruta chupe tekowe opa mbae wae. Erëi ime mbɨatɨtɨ ambɨe ye wae. Jae ko mbɨatɨtɨ kua ɨwɨ pewaño. Kua nunga yaecha kía ipɨatɨtɨ oï yawe Tumpa kotɨ uyawɨ ramo, erëi ueya’ä ipɨayemɨngeta jupi mbae wae jokua jae uyawɨ wae rewa. Kua nunga mbɨatɨtɨ jaeño ueru yandewe mano – jae ko yembɨsɨrɨ Tumpa wi jaeño mái pewa Tatawasurenda pe.

¹¹ Erëi aikuaa ko pe reta pepɨatɨtɨ piko jokua piyawɨ wae re kërái Tumpa uipota wae rupi. Mase kërái etei añawe jokua pepɨatɨtɨ piko wae jeko pewa opa piyeapɨkatu jare pekɨrëɨ pechaka peï mbaetɨ ma teko penoi. Mase kërái etei uyekuaa ma pipɨu waerä Tumpa wi, jare kërái etei pechaka peï pipota piyapo jupi wae. Mase kërái etei pekɨrëɨete cherecha ye waerä. Opaete kua mbaembae rupi pikuaaka peï mbaetɨ etei ma ko penoi teko jokua uyeyapo pepɨte rupi wae re.

¹² Che aikuatía araaka pewe yawe, mbaetɨ aikuatía jokua kuimbae mbae ikawi mbae wae uyapo chewe wae jeko pewa. Aikuatía ko pewe pe reta pikuaa waerä Tumpa jowai kërái ko peï orepepɨka pe wae.

¹³ Jukuärái uyekuaa ma orewe jare jokua orembɨpɨakatuete. Jare ore nduyerowia noï wi kërái Tito ou pewi uyerowia rewe ramo, echa’ä pe reta pemɨkɨrëɨ pɨau ye.

¹⁴ Tenonde yawe che chemiäri kawi ma Tito pe peré, jare pe reta chemɨmaraka’ä wi jokua re. Jokua Tito pe chemiäri peré wae añetete ko, kërái opaete mbae ore ndoe pewe wae añetete ko wi.

¹⁵ Jare Tito imandúa kërái pe reta piyapo jae jei pewe wae re, jare kërái pembɨasa kawi pipɨu rewe. Jáeramo añawe Tito jeiete perau oï.

¹⁶ Jare che wi ayerowiaete, echa’ä añawe arowia katu aï peré opaete mbaembae re.