2 Corintios 2 - Biblia

¹ Jáeramo che jae cheyupe ndarau ikawi a waerä chepɨatɨtɨ rewe jeiete pumbɨpɨatɨtɨ waerä.

² Echa’ä che pumbɨpɨatɨtɨ yawe, jayawe, ¿kía ra umeeta chewe yerowia? Yawaita ko pewe pe reta chembɨyerowia waerä che pumbɨpɨatɨtɨ yawe.

³ Jokua jeko pewa ko ndei a ye apou pepɨ. Jáeramo aikuatía pewe jokua tupapire pumbɨarakuaa waerä. Jukuärái che a yawe apou pepɨ, ndarau chepɨatɨtɨ peré. Erëi ayerowiata aï kërái imeta ko ayerowia. Jare jukuärái yawe, aikuaa kërái päwe rewe yayerowiata ñaï.

⁴ Che aikuatía pewe yawe jokua tupapire, aikuatía aiko cheresaɨ rewe jare tuicha chepɨatɨtɨ rewe. ¡Jasɨ katu ayao parawete! Erëi mbaetɨ aikuatía aiko pewe pumbɨpɨatɨtɨ waerä. Jaeño aipota aikuaaka aiko pewe che tuicha rupi puau wae.

Pablo umbɨarakuaa reta jokua kuimbae ikawi mbae uyapo wae rewa

⁵ Añawe che aipota pumbɨarakuaa jokua kuimbae mbae ikawi mbae uyapo wae rewa. Añetete cheño’ä chembɨpɨatɨtɨ. Opaete pe reta wi ko pembɨpɨatɨtɨ jae mbae kachi uyapo wae rupi.

⁶ Pe reta piporaraka chupe yawe, jupi wae ko piyapo. Erëi añawe jae ueya ma jokua jeko kachi wae.

⁷ Jáeramo ikawi ko pe reta peakañɨ chupe waerä jare pemɨkɨrëɨ ye waerä Tumpa kotɨ. Awɨye ma jekuaeño piporaraka chupe awɨye waerä uasaete ipɨatɨtɨ.

⁸ Jáeramo che pumɨñera pemɨmbeu waerä chupe kërái jekuaeño ko peau wae.

⁹ Che aikuatía pewe jokua tupapire aikuaa waerä piyapota ra opaete jokua che pumbɨarakuaa wae. Erëi añawe aikuaa ma.

^10-11 Jáeramo añawe pe reta pemandua’ä ma yawe jokua kuimbae pe jeko kachi re, che jae nunga wi chemanduata’ä ma chupe jokua re. Kua re imeta ko yayowake ñaï awɨye waerä ñanerëwa ñaï Añawasu pe. Echa’ä yaikuaa kawi ñaï mbaembae Añawasu uipota yandekotɨ wae. Jae jaeño uipota yande yayembɨyao ñaï waerä yandeyuwi. Jáeramo ime yawe mbae jokua kuimbae uyapo pewe wae jare pe reta pemandua’ä ma chupe yawe, che jae nunga wi chemanduata’ä ma chupe Cristo jowake. Che jaeño aipota ikawi wae pemaerä.

Pablo umɨmbeu chupe reta jae uwata wae rewa

¹² Jayawe cheïru mii reta, che a tëta wasu Troas pe amɨmbeu waerä joko pewa reta pe ñee ikawi wae Cristo rewa. Jare añetete yandeYa umee chewe aporomboe waerä joko pe.

¹³ Erëi mbaetɨ chepɨawiwe aiko. Echa’ä awäe’ä yanderɨwɨ Tito joko pe. Jae ueruta tëi iko chewe ñee pe reta rewa. Jáeramo che aeya Troas pewa reta jare ayu chuwi reta kua Macedonia kotɨ.

¹⁴ Erëitu orepɨakatu noï. Numee yasurupái Tumpa pe, echa’ä jae jekuaeño oremborɨ ndupurumɨamɨri waerä, echa’ä ore noï pëti ramiño Cristo re ramo. Jare ore rupi opaete kerupi rupi uikuaa ñonoï Cristo rewa.

^15-16 Jare ore numɨmbeu yawe Cristo rewa ïru wae reta pe, numbɨyerowia noï Tumpa kërái mbae utimbo kawi wae yanembɨyerowia wae rami. Añetete kua ñee numɨmbeu noï wae, jae ko mbae utimbo oï wae rami opaete wae reta pewarä. Erëi mbaetɨ oyowake opaete pewarä. Echa’ä Tatawasurenda kotɨ oo ñonoï wae reta pewarä, oriñee ko jae mbae ine oï wae rami, echa’ä jae reta uipota’ä etei uikuaa Cristo rewa. Erëi jokua tekowe opa mbae wae onoita wae reta pewarä, oriñee ko jae mbae jëe ngatu utimbo wae rami. Kua mbarawɨkɨ tuicha ko jare yawái. Orepuere rape’ä nduyapo tëi.

¹⁷ Erëi pëti ramiño noï Cristo re ramo, orepuere nduyapo. Tumpa oreñono numɨmbeu waerä Cristo rewa. Jare jukuärái nduyapo noï ndupurumbɨtawɨ mbae rewe Tumpa jowake. Pe reta pikuaa ko jeta wae reta umɨmbeu ñonoï Tumpa iñee umɨngana iyupe waeräño. Erëi ore reta jukuärai’ä ko.